އިންސާނިއްޔަތު ދެމިއޮތުމުގެ އެންމެ ބޮޑު އަސާސަކީ ސުލްހައާއި އަމާންކަމެވެ. ނަމަވެސް، ތާރީހުގެ ތެރެއަށް ނަޒަރު ހިންގާލާއިރު، އިންސާނުންގެ މެދުގައި ހިނގާފައިވާ ބޮޑެތި ލޭއޮހޮރުވުންތަކާއި ހަނގުރާމަތަކަކީ މުޅި އިންސާނިއްޔަތު ލަދުގަންނަންޖެހޭ ފަދަ ހާދިސާތަކެކެވެ. މިފަދަ އަނިޔާވެރިކަމާއި ލޭއޮހޮރުވުންތަކާ ދެކޮޅަށް، ބާރުގެ ބޭނުންނުކޮށް ސުލްހަވެރިކަމާއެކު ކަންކަން ހައްލުކުރުމުގެ މުހިންމުކަން ދުނިޔެއަށް ހަނދާންކޮށްދިނުމުގެ ގޮތުން ކޮންމެ އަހަރެއްގެ އޮކްޓޫބަރު މަހުގެ 2 ވަނަ ދުވަސް ފާހަގަކުރަނީ 'ބައިނަލްއަގުވާމީ ނޮން-ވައިލެންސް ޑޭ' ނުވަތަ އަނިޔާވެރިކަން ނައްތާލުމުގެ ބައިނަލްއަގުވާމީ ދުވަހުގެ ގޮތުގައެވެ. މިއީ ހަމައެކަނި ކަލަންޑަރުގައި ބޮޅުއަޅާފައި އޮންނަ ދުވަހެއް ނޫނެވެ. މިއީ މިއަދުގެ ހަލަބޮލި ދުނިޔޭގައި ކޮންމެ އިންސާނަކުވެސް ފުންކޮށް ވިސްނާލަންޖެހޭ ދުވަހެކެވެ. އަދި އަމަލީ ގޮތުން ސުލްހައަށް މަސައްކަތްކުރުމުގެ އަޒުމް ކަނޑައަޅަންޖެހޭ މުހިންމު ދުވަހެކެވެ.

ފާހަގަކުރަން ފެށުނު ގޮތާއި ތާރީހީ ފަސްމަންޒަރު
އަނިޔާވެރިކަން ނައްތާލުމުގެ ބައިނަލްއަގުވާމީ ދުވަސް ފާހަގަކުރުމުގެ އަސްލު ގުޅިފައިވަނީ ދުނިޔެ ދުށް އެންމެ ނުފޫޒުގަދަ، އަދި ސުލްހަވެރި ހަރަކާތްތަކުގެ ބާނީ، މަހާތުމާ ގާނދީގެ ހަޔާތްޕުޅާ އެވެ. ގާނދީޖީއަކީ އިންޑިއާގެ މިނިވަންކަމުގެ ބަތަލެވެ. އޮކްޓޫބަރު މަހުގެ 2 ވަނަ ދުވަހަކީ ގާނދީޖީގެ އުފަންދުވަހެވެ. ގާނދީޖީއަކީ ހަރުކަށިކަމާއި ހަނގުރާމައިގެ ބަދަލުގައި، އަނިޔާވެރިނުވުމާއި އަދި ތެދުވެރިކަމާއެކު ކުރެވޭ ސުލްހަވެރި މުޒާހަރާގެ ފަލްސަފާ ދުނިޔެއަށް ތައާރަފުކޮށްދެއްވި ލީޑަރެކެވެ. އިނގިރޭސި އިސްތިއުމާރީ ބާރުގެ ދަށުން އިންޑިއާ މިނިވަންކުރެއްވުމަށް ގާނދީޖީ މަސައްކަތްޕުޅު ކުރެއްވީ އެއްވެސް ހަތިޔާރެއް ނެތިއެވެ. ހަމައެކަނި ބޭނުން ހިއްޕެވީ އަޒުމާއި ސުލްހަވެރި ހަރަކާތްތަކުގެ ބޭނުމެވެ.

ގާނދީޖީގެ މި މަތިވެރި ފަލްސަފާ މުޅި ދުނިޔެއަށް ފެތުރުމަކީ މުހިންމު ކަމެއްގެ ގޮތުގައި އދ. ގެ މެންބަރު ގައުމުތަކުން ދެކެނުވެ. އެގޮތުން ގާނދީޖީގެ ފަލްސަފާ އަންނަށް އޮތް ޖީލުތަކަށް ދެމެހެއްޓުމުގެ ގޮތުން ބައިނަލްއަގުވާމީ ފެންވަރުގައި ދުވަހެއް ފާހަގަކުރުމުގެ ވިސްނުން ފުރަތަމަ އުފެދުނީ 2004 ވަނަ އަހަރުއެވެ. މި ހިޔާލު އުފެދިގެންއައީ އީރާނުގެ ނޯބެލް އިނާމު ހާސިލްކުރައްވާފައިވާ ޝިރީން އިބާދީގެ ފަރާތްޕުޅުންނެވެ. އޭގެ ފަހުން، އިންޑިއާގެ ކޮންގްރެސް ޕާޓީގެ އިސްނެގުމާއެކު، އދ. ގެ އާންމު މަޖިލީހަށް މިކަމުގެ ގަރާރެއް ހުށަހެޅުނެވެ. ނަތީޖާއެއްގެ ގޮތުން، 15 ޖޫން 2007 ގައި އދ. ގެ އާންމު މަޖިލީހުން ކޮންމެ އަހަރެއްގެ އޮކްޓޫބަރު 2 ވަނަ ދުވަހަކީ ބައިނަލްއަގުވާމީ ގޮތުން އަނިޔާވެރިކަން ނައްތާލުމުގެ ދުވަހުގެ ގޮތުގައި ކަނޑައެޅިއެވެ.

ފާހަގަކުރަން ޖެހުނު މައިގަނޑު ސަބަބުތައް
އދ. އިން އަނިޔާވެރިކަން ނައްތާލުމުގެ ދުވަހެއް ކަނޑައަޅަން ޖެހުނު އެންމެ ބޮޑު ސަބަބަކީ، އިންސާނުންގެ މެދުގައި އުފެދޭ ހިޔާލުތަފާތުވުންތަކާއި މައްސަލަތައް ބާރުގެ ބޭނުން ނުކޮށް ހައްލުކުރުމެވެ. ވާހަކަދައްކައިގެންނާއި ސުލްހަވެރި ސިޔާސީ ވަސީލަތްތައް ބޭނުންކޮށްގެން މައްސަލަތަކާއި، ދެބަސްވުންތައް ހއްލުކުރުމުގެ ސަގާފަތެއް ދުނިޔޭގައި އަށަގެންނެވުމެވެ. ބަދަލުހިފުމުގެ ރޫހަކީ މުޅި މުޖުތަމައު ހަލާކުކޮށްލާ އެއްޗެއްކަން ވިސްނައިދީގެންނެވެ. އަނިޔާވެރިނުވުމުގެ ސިޔާސަތަކީ ބަލިކަށިކަމެއް ނޫންކަން ބުނެދީގެންނެވެ. އެއީ އެންމެ ވަރުގަދަ ހަތިޔާރުކަން ދުނިޔެއަށް ސާބިތުކޮށްދިނުމަކީ މި ދުވަސް ފާހަގަކުރުމުގެ އެންމެ ބޮޑު މަގުސަދެވެ.

މީގެ އިތުރުން، އަނިޔާވެރިކަމެއް ނެތް ސުލްހަވެރި މުޖުތަމައެއް ބިނާކުރެވޭނީ ތައލީމީ ނިޒާމުގެ ތެރެއިންނެވެ. އަދި އާންމުން ހޭލުންތެރިކޮށްގެނެވެ. އެހެންކަމުން، ތައުލީމާއި ހޭލުންތެރިކަން އިތުރުކުރުމަކީވެސް މިދުވަސް ފާހަގަކުރުމުގެ އެއްބޭނުމެވެ. ހިޔާލުތަފާތުވުންތަކަށް ޖާގަދިނުމާއެކު އެކަކު އަނެކަކަށް އިހުތިރާމްކުރުމާއި، ކެތްތެރިކަން އިސްކުރުމުގެ މުހިންމުކަން އަންނަށް އޮތް ޖީލުތަކަށް ދަސްކޮށްދީގެންނެވެ. ލޭއޮހޮރުވުމަކާ ނުލާ، އިންސާނީ ހައްގުތަކަށާއި އިޖުތިމާއީ ބަދަލުތަކަށް ވަކާލާތުކުރާ ޖަމާއަތްތަކަށް ބައިނަލްއަގުވާމީ ފެންވަރުގައި ހިތްވަރުދީގެންނެވެ. އެހެންކަމުން އެ އަޑުތައް އުފުލުމުގެ ފުރުސަތު ދިނުމަކީވެސް މި ދުވަސް ފާހަގަކުރުމުގެ އެއްއަމާޒެވެ.

އިސްލާމްދީނުގައި ސުލްހައަށް ދީފައިވާ އަހަންމިއްޔަތާއި އިސްކަން
އިސްލާމްދީނަކީ ސުލްހައާއި އަމާންކަމުގެ ދީނެވެ. 'އިސްލާމް' މި ލަފުޒުގެ މާނައަކީވެސް ސުލްހަވެރިކަމާއި އަމާންކަމެވެ. މުސްލިމުން އެކަކު އަނެކަކާ ބައްދަލުވާހިނދު ގޮވާލާ ސަލާމުގެ މާނައަކީވެސް ތިޔަބައިމީހުންގެ މައްޗަށް ސުލްހައާއި އަމާންކަން ހުއްޓެވެ. އިސްލާމީ ޝަރީއަތުގައި ހަނގުރާމަކުރުން ހުއްދަކުރައްވާފައިވަނީ ހަމައެކަނި އަމިއްލަ ނަފްސާއި، ދީނާއި، ގައުމުގެ ދިފާއުގައެވެ. ދެބަސްވުންތަކާއި ހިޔާލުތަފާތުވުންތައް ހައްލުކުރުމުގައި އިސްލާމްދީން އަބަދުވެސް ބާރުއަޅަނީ މައާފުކުރުމަށާއި، ކެތްތެރިކަން އިސްކުރުމަށެވެ. ކީރިތި ގުރުއާނުގެ ގިނަ އާޔަތްތަކެއްގައި ސުލްހަވެރިވުމަށް ވަނީ އަމުރުކުރައްވާފައެވެ. އަދި މާތް ﷲ ސުބުހަނަހޫ ވަތައާލާ ވަނީ ހަނގުރާމައިގެ މައިދާނުގައިވެސް ދުޝްމަނުން ސުލްހައަށް އެދިއްޖެނަމަ، އެކަމަށް އިޖާބަދިނުމަށް މުސްލިމުންނަށް އަމުރުކުރައްވާފައެވެ. ކީރިތި ރަސޫލާ ﷺ ގެ ހަޔާތްޕުޅުން ފެންނަން އޮތް 'ހުދައިބިއްޔާގެ ސުލްހަ' ނާމާއަކީ އިސްލާމްދީނުގައި ސުލްހައަށް ދެވިފައިވާ މަތިވެރި ގަދަރާއި، ސިޔާސަތު ހާމަކޮށްދޭ އެންމެ ބޮޑު ތާރީހީ ހެއްކެވެ. މިއިން އެނގެނީ އިސްލާމްދީނަކީ އަބަދުވެސް އަނިޔާވެރިކަމާއި ލޭއޮހޮރުވުންތަކުން ދުނިޔެ ސަލާމަތްކުރުމަށް ގޮވާލާ ދީނެއްކަމެވެ. އަދި އިންސާނުންގެ މެދުގައި ހަމަޖެހުން ގާއިމްކުރުމަށް ވަކާލާތުކުރާ ދީނެއް ކަމެވެ.

ދުނިޔޭގެ ހާލަތާއި ނޮން-ވައިލެންސްގެ މުހިންމުކަން
ދުނިޔޭގެ މަސްރަހަށް ނަޒަރު ހިންގާލާއިރު، އަނިޔާވެރިކަމާ ދެކޮޅު ދުވަހުގެ މުހިންމުކަން ތާރީހުގައިވެސް މުހިންމުނުވާ މިންވަރަށް މިއަދު ވަނީ ބޭނުންވެފައެވެ. ދުނިޔޭގެ އެކި ކަންކޮޅުތަކުގައި ހިނގަމުންދާ ހަނގުރާމަތަކާއި، ލޭއޮހޮރުވުންތަކުގެ ސަބަބުން މިލިއަން މިލިޔަނުން އިންސާނުން ދަނީ ހާލުގައި ޖެހެމުންނެވެ. މެދުއިރުމަތީގެ ހާލަތާއި، ރަޝިޔާ-ޔޫކްރެއިން ހަނގުރާމައިގެ އިތުރުން އެފްރިކާގެ އެކި ގައުމުތަކުގައި ހިނގަމުންދާ ދާހިލީ ހަމަނުޖެހުންތަކުގެ ސަބަބުން ކުށެއްނެތް އެތައް ހާސް ކުޑަކުދިންނާއި އަންހެނުންނެއް ދަނީ މަރުވަމުންނެވެ. ދުނިޔެއޮތީ ޒަމާނީ ހަތިޔާރުތަކާއި، ނިއުކްލިޔާ ބާރުތަކުގެ ވާދަވެރިކަން ބޮޑުވެ، މުޅި އިންސާނިއްޔަތު ނެތިގެން ހިނގައިދާނެ ފަދަ ބިރުވެރިކަމެއްގެ ތެރޭގައެވެ. އެހެންކަމުން، މިކަންކަމުން ބާރުގެ ބޭނުންކުރުމަކީ އެއްވެސް މައްސަލައެއްގެ ދާއިމީ ހައްލެއް ނޫންކަން ދަނީ ސާބިތުވަމުންނެވެ.

ހަމައެހެންމެ، ބައިނަލްއަގުވާމީ ހަނގުރާމަތަކެއް އެކަންޏެއް ނޫނެވެ. މުޖުތަމައުތަކުގެ އެތެރޭގައި ހިނގާ ނަސްލީ ތަފާތުކުރުންތަކާއި، ދީނީ ހަރުކަށިކަމާއި، ގެވެށި އަނިޔާއާއި، ސައިބަރ ބުލީ ފަދަ ނަފްސާނީ އަނިޔާތަކަކީވެސް މިއަދު އިންސާނިއްޔަތަށް ހުރި ބޮޑެތި ގޮންޖެހުންތަކެކެވެ. އަދި ޒުވާނުންނާއި، ކުޑަކުދިން ޑިޖިޓަލް ވަސީލަތްތަކުގެ ޒަރީއާއިން އަނިޔާވެރިކަމަށް ހުށަހެޅޭ މިންވަރު މިއަދު ވަނީ އިތުރުވެފައެވެ. އެހެންކަމުން، ނޮން-ވައިލެންސްގެ މެސެޖަކީ ހަމައެކަނި ބޮޑެތި ބަޑި ބޭނުންކޮށްގެން ކުރާ ހަނގުރާމަ ހުއްޓުވުމެއް ނޫނެވެ. އެއީ ދިރިއުޅުމުގެ ހުރިހާ މައިދާނެއްގައި، އަނެކާއަށް ކުރާ އިހުތިރާމާއި، ދޭ އަޅާލުމާވެސް ގުޅިފައިވާ ކަމެކެވެ.

އދ. އާއި ބައިނަލްއަގުވާމީ ނިޒާމަށް ހުރި ގޮންޖެހުންތައް
ދުނިޔޭގައި ސުލްހަ ގާއިމްކުރުމަށް އެންމެ ބޮޑު ޒިންމާއެއް އެޅިފައިވާ މުއައްސަސާއަކީ އދ. އެވެ. ނަމަވެސް، ދުނިޔޭގެ ބޮޑެތި ބާރުތަކުގެ މެދުގައި އޮންނަ ސިޔާސީ އަދި އިގުތިސޯދީ ވާދަވެރިކަމުގެ ސަބަބުން، އދ. ގެ ސަލާމަތީ މަޖިލީހަށް ގިނަ ފަހަރަށް ހަނގުރާމަތައް ހުއްޓުވުމުގައި އެދެވޭ ނަތީޖާއެއް ނެރެވޭ ގޮތެއް ނުވެއެވެ. ވީޓޯ ކުރުމުގެ ބާރުގެ ބޭނުން ނާޖާއިޒު ގޮތުގައި އެމެރިކާ، ރަޝިޔާ އަދި ޗައިނާފަދަ ގައުމުތަކުން ހިފުމަކީ ކުށެއްނެތް  އެތައް އިންސާނުންނެއް ހާލުގައި ޖެހޭއިރުވެސް ބައިނަލްއަގުވާމީ މުޖުތަމު  ހުއްޓިފައި އޮންނަށްޖެހޭ ކަމެކެވެ. މިފަދަ ހާލަތްތަކުގައި ބައިނަލްއަގުވާމީ ގާނޫނުތަކާއި އިންސާނީ ހައްގުތަކަށް ހުރިހާ ގައުމުތަކުން ހަމަހަމައަށް ބޯލެނބުމުގެ އަހަންމިއްޔަތުކަން ނޮން-ވައިލެންސް ފަލްސަފާގެ ތެރެއިން ހަނދާންކޮށްދެއެވެ. ބާރުގަދަ ގައުމުތަކުން އެމީހުންގެ އަމިއްލަ މަންފާއަށްވުރެ މުޅި އިންސާނިއްޔަތުގެ ސަލާމަތް އިސްކުރުމުގެ މުހިންމުކަން ބުނެދެއެވެ.

ޒަމާނީ ޓެކްނޮލޮޖީއާއި ނަފްސާނީ އަނިޔާވެރިކަން
އަހަރުމެން ދިރިއުޅެމުން މިދަނީ ޑިޖިޓަލް ޒަމާނެއްގައެވެ. މި ޒަމާނުގައި އަނިޔާވެރިކަން ވަނީ ހަމައެކަނި ޖިސްމާނީ ގޮތުން ދެވޭ އަނިޔާއެއްގެ އިމުގެ ތެރޭގައެއް ނޫނެވެ. ސޯޝަލް މީޑިއާގެ އެކި ޕްލެޓްފޯމްތަކުގައި ފެތުރެމުންދާ ނަފްރަތުގެ ބަސްތަކާއި، ފޭކް ނިއުސްތަކާއި، ދޮގު މައުލޫމާތާއި، ބުލީކުރުމަކީ މިއަދު މުޖުތަމައު ބައިބައިކޮށްލާ ކަމެކެވެ. އަދި މީހުންގެ ނަފްސާނީ ދުޅަހެޔޮކަން ހަލާކުކޮށްލާ ވޭންހުރި އަނިޔާތަކެވެ.

ނޮން-ވައިލެންސްގެ އަސާސްތައް އަހަރުމެންގެ އޮންލައިން ދިރިއުޅުމުގައިވެސް ބޭނުންކުރަން ޖެހެއެވެ. ކީބޯޑެއްގެ ފަހަތުގައި ތިބެގެން އަނެކާއަށް ހިތްދަތިކަން ދިނުމުގެ ބަދަލުގައި، އޮންލައިންކޮށްވެސް ސުލްހަވެރިކަމާއި އަޅާލުން އިސްކުރާ ބަޔަކަށް އަހަރުމެން ވުމަކީ ސުލްހަވެރި މުޖުތަމައަކަށް ވަރަށް މުހިންމު ކަމެވެ.

އަނިޔާވެރިކަން ނައްތާލުމުގައި ފަރުދީ އަދި މުޖުތަމައުގެ ދައުރު
ބައިނަލްއަގުވާމީ ފެންވަރުގައި އަނިޔާވެރިކަމާ ދެކޮޅު ދުވަހެއް ފާހަގަކުރާއިރު، އޭގެ ހަގީގީ ނަތީޖާ ފެންނާނީ ފަރުދީ ފެންވަރުގައި އަހަރުމެން ކުރާ މަސައްކަތުންނެވެ. ކޮންމެ މީހަކީވެސް އެމީހެއްގެ އަމިއްލަ ނަފްސުންނާއި، އާއިލާގެ ތެރެއިން ސުލްހަވެރިކަން އިސްކުރާ މީހަކަށް ވަމާހިނގާށެވެ. ހިޔާލުތަފާތުވުމެއް އުފެދޭ ހިނދު، ރުޅިވެރިކަން އިސްކުރުމުގެ ބަދަލުގައި މަޑުމައިތިރިކަމާއެކު ވާހަކަދައްކައިގެން ހައްލު ހޯދަން ދަސްކުރަމާ ހިނގާށެވެ. އެކި މީހުންގެ ވިސްނުމާއި، ދީނާއި، ނަސްލާއި، ސަގާފަތް ތަފާތުވެދާނެއެވެ. އެ ތަފާތުތަކާއެކުވެސް އަނެކާގެ އިންސާނީ ކަރާމާތަށް އިހުތިރާމްކުރުމަކީ އަނިޔާވެރިކަން ހުއްޓުވުމުގެ ފުރަތަމަ ފިޔަވަޅެވެ.

ނިންމުން
'ބައިނަލްއަގުވާމީ ނޮން-ވައިލެންސް ޑޭ' އަކީ ދުނިޔެއަށް ސުލްހައިގެ މެސެޖު ދިނުމަށް ލިބޭ ވަރަށް އަގުހުރި ފުރުސަތެކެވެ. މިއަދުގެ ހަލަބޮލި ދުނިޔޭގެ ހާލަތު ބަދަލުކުރެވޭނީ، ހަތިޔާރުގެ ބާރުން އެހެން މީހުން ބިރުގަންނަވައިގެންނެއް ނޫނެވެ. އޭގެ ބަދަލުގައި، ލޯތްބާއި، ކެތްތެރިކަމާއި، ސުލްހަވެރިކަމުގެ ބާރުންނެވެ. މަހާތުމާ ގާނދީ ދައްކަވައިދެއްވި މަތިވެރި ނަމޫނާއިން ހިތްވަރު ލިބިގަނެގެނެވެ. ކޮންމެ މީހަކީވެސް ސުލްހައިގެ މެސެންޖަރަކަށް ވުމަށް މިއަދު އަޒުމް ކަނޑައަޅަމާތޯއެވެ؟

އަނިޔާވެރިކަމުން ފުރިގެންވާ ދުނިޔެއެއްގެ ބަދަލުގައި، އަންނަން އޮތް ޖީލުތަކަށް އަމާން، ސުލްހަވެރި އަދި ރައްކާތެރި ދުނިޔެއެއް ބިނާކޮށްދިނުމަކީ މިއަދު އަޅުގަނޑުމެން އެންމެންގެ ކޮނޑުގައި އެޅިފައިވާ ބޮޑު މަސްއޫލިއްޔަތެކެވެ. ދުނިޔޭގެ ކޮންމެ ގައުމެއްގައި، ކޮންމެ ގެއެއްގައި ސުލްހަ ގާއިމްވެގެން މެނުވީ އިންސާނިއްޔަތަށް ހަގީގީ އުފާވެރިކަމެއް ނެތެވެ.