މިކަން ދޮގުކޮށް މާލޭސިޓީ ކައުންސިލުން ބުރާސްފަތި ދުވަހު ނެރެފައިވާ ނޫސްބަޔާނުގައި ބުނެފައި ވަނީ، ވެޓް މާރުކޭޓް މައްސަލައިގައި މާލޭސިޓީ ކައުންސިލް ބަދުނާމުކޮށް މި ސަރުކާރުން ދައްކަނީ ދޮގުވާހަކަ ކަމަށް ރަސްމީކޮށް ހާމަކުރާ ކަމަށާ، މާލޭގެ ވެޓް މާކެޓް ތަރައްގީކުރުމަކީ 2022 ވަނަ އަހަރު މާލޭސިޓީކައުންސިލުން ފާސްކޮށްފައިވާ އެ ކައުންސިލްގެ 4 ވަނަ ދައުރުގެ ސްޓްރެޓީޖިކް އެކްޝަން ޕްލޭންގައި ހިމެނޭ މުހިންމު އެއް މަޝްރޫއުގެ ގޮތުގައި ކަނޑައަޅާފައިވާ މަސައްކަތެއް ކަމަށް ވުމާއެކު،

މަޝްރޫއު ކުރިއަށް ގެންދިއުމަށްޓަކައި ޝައުގުވެރިވާ ފަރާތްތަކުން ޕްރޮޕޯޒަލް ހުށަހެޅުމުގެ ފުރުސަތު ހުޅުވާލައި، ސަރުކާރުގެ ގެޒެޓުގައި އިއުލާން ކުރެވި، ޕްރޮޖެކްޓް ހިންގުމަށް ތަފާތު 2 ކުންފުންޏަކާ ހަވާލުކޮށް އޭގެތެރެއިން އެއް ކުންފުންޏަކާ ބިން ހަވާލުކޮށްފައިވާކަން ވެސް އިންޓަރނަލް އޮޑިޓް ރިޕޯޓުން ފެންނަން އޮތް ޕްރޮޖެކްޓެއްކަމުގައި އެންމެހާފަރާތްތަކުގެ ސަމާލުކަމަށް ގެންނަ ކަމަށެވެ.

އަދި، މަސްްރޫއަށް ކަނޑައަޅާފައިވާ ސަރަހއްދުގައި މިހާރު ހުރި ލޯކަލް މާރުކޭޓު ހުސްކޮށް އެ ބިން ހަވާލުކުރުމަށް އެދި 29 މާރިޗު 2026 ގައި މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމެންޓް އިން މާލޭ ސިޓީ ކައުންސިލަށް އެންގުމާ ގުޅިގެން އެކަމާގުޅޭ ކަންކަން ވިލަރެސްކުރުމާ ބެހޭގޮތުން މަޝްވަރާކުރުމަށް ކަމާ ބެހޭ މިނިސްޓަރާ އެޕޮއިންޓްމަންޓެއް ހަމަޖައްސައި ދިނުމަށް އެދި މާލޭސިޓީ ކައުންސިލުން، ރަސްމީކޮށް ސިޓީއަކުން އެދިފައިވީ ނަމަވެސް މިހާތަނަށް އެކަމަށް އެއްވެސް އިޖާބައެއް ދީފައިި ނުވާކަމަށާ، އަދި މާލެ ސިޓީކައުންސިލާ ވާހަކަދައްކާނީ ލިޔެކިޔުމުން އެކަނިކަމުގައި މިނިސްޓަރު އެ ކައުންސިލަށް އަންގާފައިވާ ކަމަށް ވެސް ނޫސްބަޔާނުގައި ބުނެފައި ވެއެވެ.

އެހެންކަމުން މާލޭ ސިޓީކައުންސިލުގެ ޕްލޭންގައި ހިމެނޭ މަޝްރޫއެއް ހަމަ ކުއްލިއަކަށް މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމެންޓް މިނިސްޓްރީ ހިންގަންރާވާ، ސިޓީކައުންސިލާ މަޝްވަރާއެއް ނުކޮށް ތިބެމެ އަދި މި ކައުންސިލުން މީގެ ކުރިން އެ ޕްރޮޖެކްޓް ހިންގުމަށް ދެ ކުންފުންޏަކާ ހަވާލުކޮށްފައިވާ ކަން ވެސް ހަމަ ރަނގަޅަށް މިނިސްޓްރީއަށް އެނގިތިބެމެ އެ ކައުންސިލުން އެއްބާރުލުން ނުދެއޭ ބުނެ އާންމުންނަށް މައުލޫމާތު ފަތުރަމުންދާކަން ސިޓީ ކައުންސިލުން ފާހަގަކޮށް އެކަން ސިޓީ ކައުންސިލުން ރަސްމީކޮށް ދޮގުކުރާ ކަމަށް ވެސް އެ ނޫސްބަޔާނުގައި ވެއެވެ.

އަދި އެ މައްސަލައިގައި ސިޓީކައުންސިލުން ހުރި ކަންބޮޑުވުންތައް ވެސް މި ނޫސްބަޔާނުގައި ވަނީ ހިމަނާފައެވެ:

ވެޓް މާރުކޭޓް މައްސަލައިގައި ބިން ހަވާލުކުރެވޭނީ ގާނޫނާ ގަވާއިދުގެ ތެރެއިން ކަމަށް ސިޓީ ކައުންސިލުން ބުދަދުވަހު ބޭއްވި އެ ކައުންސިލްގެ 5 ވަނަ ދައުރުގެ 4 ވަނަ އާންމު ޖަލްސާގައި ވަނީ ނިންމާފައި ކަން ފާހަގަކޮށްލެވެއެވެ.

ވެޓް މާރުކެޓް ހުރި ބިން، މިނިސްޓްރީ އޮފް ފިޝަރީޒް އެގްރިކަލްޗަރ އެންޑް އޯޝަން ރިސޯސަސްއާ ހަވާލުކުރުމަށް އެދި އެ މިނިސްޓްރީން ކައުންސިލަށް ސިޓީ ފޮނުވުމާ ގުޅިގެން އެ ކަމަށް ގޮތެއް ނިންމުމަށް ކުރެވުނު މަޝްވަރާގައި، ކައުންސިލުން ބުނެފައިވަނީ، އެ މައްސަލައިގައި މީގެ ކުރިން ވެސް ތަކުރާރުކޮށް ހައުސިންގ މިނިސްޓްރީން ވެސް އެ ބިން ހަވާލުކުރުމަށް އެދި ކައުންސިލަށް ސިޓީ ފޮނުވާފައިވާ ކަމަށެވެ.

އެހެން ނަމަވެސް އެ ތަނަކީ، ނިމިދިޔަ ދައުރުގައި އެ ތަން ތަރައްގީ ކުރުމަށް ދެ ކުންފުންޏަކަށް އެގްރީމެންޓް ކޮށްފައިވާ ތަނެއް ކަމުން، އެ ކޮންޓްރެކްޓް ބާތިލް ކުރުމަށް ފަހު މެނުވީ އެހެން ފަރާތަކަށް ބިން ނުދެވޭނެ ކަމަށް މޭޔަރ އާދަމް އާޒިމް އެ ޖަލްސާގައި ވިދާޅުވެ، އެކަމާ ގުޅޭ ހުރިހާ މައުލޫމާތެއް ސަރުކާރުގެ ކަމާ ބެހޭ މުއައްސަސާތަކާ ހިއްސާ ކޮށްފައިވާނެ ކަމަށް ވެސް މޭޔަރ އާޒިމް ވިދާޅުވިއެވެ.

އަދި، މާލެ މާސްމާރުކޭޓަކީ، ވަރަށް ބޮޑަށް ވިރާނާވެފައިވާ ތަނެއް ކަމަށާ، ރަނގަޅު ފެންވަރުގައި، ވީހާ ވެސް އަވަހަށް ތަރައްގީކޮށް ރައްޔިތުންނަށް ހިދުމަތް ލިބޭނެ މަގު ފަހިކުރުމަކީ ވަރަށް މުހިންމު ކަމެއް ކަމުގައި ދެކޭ ކަމަށް ވެސް މޭޔަރ އާޒިމް ވަނީ ވިދާޅުވެފައެވެ.

ބުދަދުވަހުގެ ޖަލްސާގައި، އެ މައްސަލައާއި ގުޅިގެން ސިޓީ ކައުންސިލުން ހައުސިންގް މިނިސްޓްރީއަށް ފޮނުއްވި ސިޓީ ވެސް ވަނީ ހަމާކުރައްވާފައެވެ. އެ ސިޓީގައި، ކައުންސިލުން ދެ ފަހަރެއްގެ މަތިން އެގްރީމެންޓް ކުރެވުނު ގޮތުގެ ތަފްސީލު ބަޔާންކޮށްފައިވާއިރު، އެ ރޮޖެކްޓް އޭރުގެ ހައުސިންގ މިނިސްޓްރީން ކުރިޔަށް ގެންދިއުމަށް ނިންމުމުން، އެ ޕްރޮޖެކްޓާ ގުޅޭ ލިޔެކިއުންތައް ހައުސިންގ މިނިސްޓްރީއަށް ގެންގޮސްފައިވާކަން އެ ސިޓީގައި ބަޔާންކޮށްފައިވެއެވެ.

އަދި އެ ލިޔެ ކިއުންތައް ގެންގޮސްފައިވަނީ، އުސޫލްތަކާ ޚިލާފަށް ކަމަށާ، އަދި އެ ބިން ހަވާލުކުރެވޭނީ އެ އެއްބަސްވުންތައް ބާތިލުކުރުމަށް ފަހުގައި ކަމަށާ، މީގެއިތުރުން ވެސް ގާނުނީ ގޮތުން އެ މައްސަލައާ ގުޅުން ހުރި އެތައް ކަމެއް އެ ސިޓީގައި ބަޔާން ކޮށްފައިވާކަން ފާހަގަކޮށްލެވެއެވެ.

ބުދަދުވަހުގެ ޖަލްސާގައި، އެކަމާ ގުޅިގެން ކައުންސިލަރުން ދެއްކެވި ވާހަކަފުޅުގައި، ހައުސިންގ މިނިސްޓްރީއާ ބައްދަލުކޮށް، އެ މައްސަލައަށް އެދެވޭ ހައްލެއް ހޯދުމަށް މަސައްކަތް ކުރުމަށާއި، ހައުސިންގ މިނިސްޓްރީން އެ ކަމަށް އެއްބާރުލުން ލިބެންދެން މަސައްކަތް ހުއްޓައިނުލާ ކުރިއަށް ގެންދިއުމަށް ވެސް، ކައުންސިލަރުން އެދުވަހުގެ ޖަލްސާގައި ނިންމާފައި ވެއެވެ.