މިދިޔަ ހަފުތާ ބަންދުގައި ހަންގޭރީގެ ބުޑަޕެސްޓްގައި އޮތް ފޯމިއުލާ 1 ރޭސް ފޮޓޯ ނަންގަވަން ޕަވެލް ހުންނެވީ ފޮޓޯގްރަފަރުން ލާ ޖެކެޓެއް އަޅުއްވައިގެންނެވެ. އެއީ ރޭސް ކާރުތަކާ ވަރަށް ކައިރިން، ޓްރެކް ކައިރީގައި ހުރެ ފޮޓޯ ނެގުމުގެ ބޭނުމުގައެވެ. އެމަނިކުފާނު ވަޑައިގަތީ ފޮޓޯ ނެގުމަށް ބޭނުންވާ ފުރިހަމަ ސާމާނާއި އެފްއައިއޭ ގެ ރަސްމީ އެކްރެޑިޓޭޝަނާ އެކުގައެވެ.

ހޮނިހިރު ދުވަހުގެ ސެޝަންތައް ޕަވެލް ކަވަރު ކުރެއްވީ ޗެކް ރިޕަބްލިކްގެ އެފް1 ފޮޓޯގްރާފަރު ޖީރީ ކްރެނެކްއާ އެކު އެވެ. އެމަނިކުފާނު ބޭނުންކުރެއްވީ ކެނަން އަދި ނިކޮން ކެމެރާ އެވެ. ކެނަން ބޭނުންކުރެއްވީ ޒޫމް ލެންސަކާއެކު އެވެ. ނިކޮން ބޭނުން ކުރެއްވީ ވައިޑް ލެންސަކާ އެކުއެވެ.

އެފް1 ރޭސް ކަވަރު ކުރެއްވުމުގެ ތެރެއިން އެ ރޭސް އިންތިޒާމުކުރާ އެފްއައިއޭ ގެ ރައީސް މުހައްމަދު ބިން ސުލައިމްގެ އިތުރުން ހަންގޭރީގެ ބޮޑުވަޒީރާވެސް ޕަވެލް ބައްދަލުވެ ވާހަކަ ދެއްކެވިއެވެ.

ޗެކް ރައީސް ޕަވެލް، އެފް1 އިންތިޒާމުކުރާ އެފްއައިއޭ ގެ ރައީސް މުހައްމަދު ބިން ސުލައިމްއާއެކު.--

ޕަވެލް އަކީ ހޮބީއެއްގެ ގޮތުގައި ފޮޓޯ ނަންގަވާ ބޭފުޅަކަށް ވާއިރު، މިއީ ހޮބީ ފޮޓޯގްރާފަރެއްގެ ގޮތުގައި މޮޓޯ ސްޕޯޓްސްގެ ބޮޑު ހަރަކާތަކުން އެމަނިކުފާނު ފެނުނު ފުރަތަމަ ފަހަރެއް ނޫނެވެ. އެންމެ ފަހުން، މިދިޔަ ޖޫން މަހު "ލެ މާންސް 24 އަވާސް" ގައި ބައިވެރިވެވަޑައިގަތުމަށް ފްރާންސަށް ވަޑައިގަތީވެސް ފުރިހަމަ ކެމެރާ ސެޓަޕާ އެކުގައެވެ.

ނޭޓޯގެ މިލިޓަރީ ކޮމިޓީގެ ޗެއާމަން ކަންވެސް ކުރެއްވި ޕަވެލް ވަނީ ގިނަ މޮޓޯ ރޭސްތަކެއް ފޮޓޯ ނަންގަވާފައެވެ. ޗެކް ރިޕަބްލިކްގެ ބްރްނޯގައި ބޭއްވި މޮޓޯޖީޕީ އަދި ވޯލްޑް ސުޕަބައިކް އިވެންޓްތައް ކަވަރުކުރެއްވިއިރު، ނެސްކާ އަދި ޑަކާ ރެލީގެ ފޮޓޯ ނެންގެވުމަށް އެމެރިކާ އަދި ސައުދީ އަރަބިއްޔާ އަށްވެސް ވަނީ ދަތުރުކުރައްވާފައެވެ.

2025ވަނަ އަހަރުގެ ޑަކާ ރެލީ އިވެންޓުގައި ޕަވެލް ނެންގެވި ބައެއް ފޮޓޯތައް، ޕްރާގްގެ ނޭޝަނަލް ޓެކްނިކަލް މިއުޒިއަމްގައި ވަނީ ދައްކާލާފައެވެ. އެ އިވެންޓުގައި އެމަނިކުފާނު ވަނީ ޗެކްގެ ވާދަވެރިންނަށް ހިތްވަރުވެސް ދެއްވާފައެވެ.

ހަމައެކަނި ހޮބީއެއްގެ އިތުރުން، ރައީސް ޕަވެލް ވަނީ ފޮޓޯގްރަފީ ބޭނުންކުރައްވައިގެން ޗެރިޓީ ޖަމާއަތްތަކަށް އެހީތެރިކަންވެސް ފޯރުވައި ދެއްވާފައެވެ. 2025 ވަނަ އަހަރު، ފޮޓޯ އަލްބަމެއް ނީލަން ކިޔައިގެން، 30،000 ޔޫރޯ ހޯއްދެވިއެވެ.  

"މޮޓޯސްޕޯޓަކީ ވަރަށް ހިތްގައިމު ދުނިޔެއެއް. އަދި އަހަންނަށް އެކަން ހަމައެކަނި ބަލާލުމުގެ ބަދަލުގައި، ކޮންމެވެސް ސިފައެއްގައި އެކަން ރެކޯޑުކޮށް އެހެން މީހުންނާ ހިއްސާކުރެވޭތީ އުފާކުރަން. އަހަރެން އުންމީދު ކުރަނީ އަހަރެންގެ ފޮޓޯތަކުން މި ތާރީޚީ ރޭހުގެ ރީތިކަމާއި ގޮންޖެހުންތައް ބެލުންތެރިންނާ ގާތްކޮށްދޭނެ ކަމަށް،" މާރިޗު 2025 ގައި މައުރަޒު ހުޅުވުމުގެ ރަސްމިއްޔާތުގައި އެމަނިކުފާނު ވިދާޅުވެފައި ވެއެވެ.

ޕެޓްރް ޕަވެލް އަކީ ކާކު؟

ޕެޓްރް ޕަވެލް އުފަންވީ 1 ނޮވެމްބަރު 1961 ގައި، އޭރުގެ ޗެކޮސްލޮވޭކިއާގެ ބައެއް ކަމަށްވާ ޕްލާނާގައެވެ. އެމަނިކުފާނުގެ ބައްޕައަކީ 1973 އިން 1989 އަށް ޓާބޯގައި ހުންނަ ވެސްޓަން މިލިޓަރީ ޑިސްޓްރިކްޓް ކޮމާންޑްގައި ޚިދުމަތް ކުރެއްވި އިންޓެލިޖެންސް އޮފިސަރެކެވެ. ގްރެމާ ސުކޫލުގައި އުޅުއްވިއިރު، ޕަވެލް އަކީ ސޯޝަލިސްޓް ޔޫތު ޔޫނިއަންގެ ޕަޔޮނިއަރ އޯގަނައިޒޭޝަންގެ މެންބަރެކެވެ. އެއަށްފަހު 1975 އިން 1979 އަށް އޮޕާވާގެ ޖޭން ޒިޒްކާ މިލިޓަރީ ޖިމްނޭޒިއަމްގައި ކިޔަވައިވިދާޅުވިއިރު، އެތަނުން ސޯޝަލިސްޓް ޔޫތު ޔޫނިއަންގެ މެންބަރަކަށް ވެވަޑައިގަތެވެ. 1979 ގައި ވައިސްކޯވްގެ މިލިޓަރީ ޔުނިވަރސިޓީ އޮފް ދަ ގްރައުންޑް ފޯސަސްގައި ކިޔަވަން ފެއްޓެވިއެވެ. 1980 ވަނަ އަހަރު ސާޖަންޓް ފަސްޓް ކްލާސްގެ ރޭންކުގައި ޗެކޮސްލޮވޭކިއާ ސިފައިންގެ ތެރޭގައި ޕްރޮފެޝަނަލް ސޯލްޖަރަކަށް ވެވަޑައިގަތެވެ. އަދި މާގިނަ ދުވަސްތަކެއް ނުވެ 1982 ގައި ސެކަންޑް ލެފްޓިނެންޓްގެ މަގާމަށް ކުރިއެރުން ލިބިވަޑައިގަތެވެ. ކިޔަވާ ނިމުނު އަހަރު ކަމަށްވާ 1983 ގައި، ޕަވެލް ކޮމިއުނިސްޓް ޕާޓީ އޮފް ޗެކޮސްލޮވޭކިއާގައި ބައިވެރިވުމަށް އެދި ހުށަހެޅުއްވިއެވެ. އަދި ދެ އަހަރުގެ މަޖުބޫރު އިންތިޒާރުގެ މުއްދަތަކަށްފަހު 1985 ގައި އެ ޕާޓީގެ މެންބަރަކަށް ވެވަޑައިގަތެވެ.ވެލްވެޓް ރިވޮލިއުޝަނަށްފަހު، އޭނާ ވަނީ ބެތެސްޑާގެ ޑިފެންސް އިންޓެލިޖެންސް ކޮލެޖާއި، ކެމްބާލީގެ ސްޓާފް ކޮލެޖާއި، ލަންޑަންގެ ރޯޔަލް ކޮލެޖް އޮފް ޑިފެންސް ސްޓަޑީޒްއިން ތަޢުލީމު ހާސިލުކުރައްވައި، ކިންގްސް ކޮލެޖް ލަންޑަނުން އިންޓަނޭޝަނަލް ރިލޭޝަންސްގެ ދާއިރާއިން މާސްޓާސް ޑިގްރީ ހާސިލުކުރައްވާފައެވެ.

ޗެކް ރިޕަބްލިކްގެ ރައީސް ޕެޓްރް ޕަވެލް، ނޭޓޯގެ ޗެއާމަންކަންވެސް ކުރެއްވި.--

ޕަވެލް ވަނީ ބޮސްނިއާގައި އޮތް އދ. ގެ ޕްރޮޓެކްޝަން ފޯސްގެ ފުރަތަމަ ޗެކޮސްލޮވާކް ބަޓާލިއަންގައި ޚިދުމަތް ކުރައްވާފައެވެ. ޖެނުއަރީ 1993 ގައި، ސާބިއާގެ ސިފައިން ވަށާލާފައި އޮތް ފަރަންސޭސި އަސްކަރީ މަރުކަޒެއް ކަމަށްވާ ކާރިން ބޭސްއިން މީހުން ހުސްކުރުމުގެ އޮޕަރޭޝަނެއްގައި އޭނާގެ ޔުނިޓް ބައިވެރިވިއެވެ. ބޮސްނިއާގެ އޮޕަރޭޝަނަށްފަހު، އޭނާ ވަނީ ޗެކް އަސްކަރިއްޔާގެ އެކި މަގާމުތައް ފުރުއްވައި، ބެލްޖިއަމް، ނެދަލޭންޑްސް އަދި އެމެރިކާގައި އަސްކަރީ ޑިޕްލޮމެޓިކް މަގާމުތަކުގައި ގައުމު ތަމްސީލުކުރައްވާފައެވެ. 1993 އިން 1994 އަށް ޕަވެލް ހުންނެވީ ބެލްޖިއަމްގައި ހުންނަ ޗެކް ރިޕަބްލިކްގެ ޑެޕިއުޓީ މިލިޓަރީ އެޓާޗޭގެ މަގާމުގައެވެ. 1997 އިން 1999 އަށް އޭނާ ވަނީ ހަވަނަ ސްޕެޝަލް ބްރިގޭޑްގެ ކޮމާންޑަރުކަން ކުރައްވާފައެވެ. 1999 އިން 2002 އަށް ބްރަންސަމްގައި ހުންނަ ނޭޓޯގެ ހެޑްކުއާޓާޒްގައި މަންދޫބެއްގެ ގޮތުގައި މަސައްކަތް ކުރެއްވިއެވެ. 2003 ވަނަ އަހަރު، ޓާމްޕާގައި ހުންނަ އޮޕަރޭޝަން އެންޑިއުރިން ފްރީޑަމްގެ ހެޑްކުއާޓާޒްގައި ޔުނައިޓެޑް ސްޓޭޓްސް ސެންޓްރަލް ކޮމާންޑްގެ ނޭޝަނަލް މިލިޓަރީ ރެޕްރެޒެންޓޭޓިވްގެ ގޮތުގައި ޚިދުމަތް ކުރެއްވިއެވެ. 2003 ވަނަ އަހަރު އެމެރިކާއިން އިރާގަށް އެރި ދުވަސްވަރު، ގަތަރުގައި ހުންނަ އެމެރިކާގެ ހެޑްކުއާޓާޒްގައި ލިއޭޒަން އޮފިސަރެއްގެ ގޮތުގައި އޭނާ މަސައްކަތް ކުރެއްވިއެވެ. 2007 އިން 2009 އަށް ބްރަސަލްސްގައި ހުންނަ ޔޫރަޕިއަން ޔޫނިއަންގައި ޗެކް ރިޕަބްލިކްގެ އަސްކަރީ މަންދޫބަކަށް ހުންނެވުމަށްފަހު، 2010 އިން 2011 އަށް މޮންސްގައި ހުންނަ ސުޕްރީމް ހެޑްކުއާޓާޒް އެލައިޑް ޕަވަރސް ޔޫރަޕްގައި ޗެކް ރިޕަބްލިކްގެ މަންދޫބަކަށް ހުންނެވިއެވެ. ޕަވެލް 2010 ވަނަ އަހަރު މޭޖަރ ޖެނެރަލްގެ މަގާމަށް އަދި 2012 ވަނަ އަހަރު ލެފްޓިނަންޓް ޖެނެރަލްގެ މަގާމަށް އައްޔަންކުރެވުނެވެ. ޖުލައި 2011 އިން ޖޫން 2012 އަށް ޗެކް ރިޕަބްލިކްގެ އަސްކަރިއްޔާގެ ޑެޕިއުޓީ ޗީފް އޮފް ޖެނެރަލް ސްޓާފްގެ މަގާމު ފުރުއްވުމަށްފަހު، އޭނާ ވަނީ ޗީފް އޮފް ޖެނެރަލް ސްޓާފްގެ މަގާމަށް ކުރިއެރުވިއެވެ.

އޭނާ ވަނީ 2015 އިން 2018 އަށް ނޭޓޯ މިލިޓަރީ ކޮމިޓީގެ ޗެއާގެ މަގާމު ފުރުއްވާފައެވެ. 2018 ވަނަ އަހަރު، 34 އަހަރުގެ ޚިދުމަތަށްފަހު އަސްކަރިއްޔާއިން ރިޓަޔާ ކުރެއްވީ ޝަރަފުވެރިކަމާއެކުގައެވެ. 2021 ވަނަ އަހަރު، 2023 ވަނަ އަހަރުގެ ރިޔާސީ އިންތިޚާބުގައި ވާދަކުރައްވާނެކަން ޕަވެލް އިޢުލާނު ކުރެއްވިއެވެ. އޭނާ ވެވަޑައިގަތީ ޗެކް ރިޕަބްލިކްގެ ހަތަރުވަނަ ރައީސަށެވެ. އަދި 1918 ވަނަ އަހަރު ޗެކޮސްލޮވާކިއާގެ މިނިވަންކަން އިއުލާނުކުރި ފަހުން އެ ގައުމުގެ 12 ވަނަ ރައީސަށެވެ.