ސޯޝަލް މީޑިއާގައި އިސްލާމްދީނާ ދެކޮޅަށް ކުރި ޕޯސްޓެއްގެ ސަބަބުން ސައޫދީ އަރަބިއްޔާގައި މަރުގެ ހުކުމް އިއްވާފައިވާ ސްރީލަންކާގެ ރައްޔިތެއް ކަމަށްވާ އަނޯޖަން ސިވަރާސާގެ ފުރާނަ ސަލާމަތްކުރުމުގެ މަސައްކަތަށް އެހީތެރިވެދެއްވާނެ ކަމަށް ރާއްޖޭގެ ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

މި މައްސަލާގައި ޑިޕްލޮމެޓިކް ގޮތުން ކުރާ ފުރަތަމަ މަސައްކަތެއްގެ ގޮތުން، ލަންކާގެ ޕްރެޒިޑެންޓްސް ކައުންސެލް ފައިޒަރު މުސްތަފާ އާއި ޕްރެޒިޑެންޓްސް ކައުންސެލް އުޕުލް ކުމާރައްޕެރުމާ މިއަދު ރާއްޖެ ވަޑައިގެން ނަޝީދާ ބައްދަލުކުރެއްވިކަމަށް ނިއުސްވަޔާ ލަންކާ ނޫހުން ރިޕޯޓްކޮށްފައި ވެއެވެ. އަދި އެ ދެބޭފުޅުންނާއެކު ނަޝީދު ނަންގަވާފައިވާ ފޮޓޯއެއް އެ ނޫހުން ވަނީ އާންމުކޮށްފައެވެ.

ލަންކާ ސަރުކާރުގެ ބަޔާނަކާ ހަވާލާދީ، އެ ނޫހުން ބުނީ މުސްލިމް އުންމަތަށް ނިސްބަތްކޮށް ސިވަރާސާ ދައްކާފައިވާ ވާހަކަތަކުގެ ނުރައްކާތެރިކަން ނަޝީދު ފާހަގަކުރެއްވި ކަމަށެވެ. އެހެންނަމަވެސް އިންސާނީ ކަރާމާތަށްޓަކައި އެ ޒުވާނާގެ ފުރާނަ ސަލާމަތްކުރަން ކުރާ މަސައްކަތްތަކަށް އެހީތެރިވެ ދެއްވާނެކަމަށް އެ މަނިކުފާނު ވިދާޅުވިއެވެ.

މުސްތަފާ އާއި ކުމާރައްޕެރުމާ ސައޫދީ އަރަބިއްޔާއަށް ފޮނުވާ ހާއްސަ މަންދޫބުންގެ ގޮތުގައި ހަމަޖެއްސިކަން ލަންކާ ޕާލަމެންޓުގައި އިއުލާންކުރެއްވީ އެ ގައުމުގެ ފޮރިން މިނިސްޓަރު ވިޖިތަ ހޭރަތެވެ. އެ ބޭފުޅުން މި މިޝަން ކުރިއަށް ގެންދަވަނީ ލަންކާގެ ރައީސާއި ފޮރިން މިނިސްޓަރުގެ ސީދާ އިރުޝާދުގެ ދަށުން ކަމަށާއި، މި ދަތުރުތަކުގެ ޚަރަދު ކުރައްވާނީ ސަރުކާރުގެ ފައިސާއިން ނޫން ކަމަށް ވެސް އޭނާ ވިދާޅުވިއެވެ.

ކުމާރައްޕެރުމާއާ ހަވާލާދީ ނޫހުން ބުނި ގޮތުގައި، ރާއްޖޭގެ ކުރީގެ ރައީސް ނަޝީދާ އެކު ބޭއްވީ ކާމިޔާބު ބައްދަލުވުމެކެވެ. އަދި ކުރިއަށް އޮތް ދުވަސްތަކުގައި ސައޫދީ އަރަބިއްޔާއަށް ދަތުރުފުޅެއް ކުރެއްވުމަށް ނަޝީދު ތައްޔާރުވެވަޑައިގަންނަވަމުން ގެންދަވާ ކަމަށް ވެސް ކުމާރައްޕެރުމާއާ ހަވާލާދީ އެ ނޫހުން ބުނެފައި ވެއެވެ.