ރައީސް މުއިއްޒުގެ މި ސަރުކާރަކީ ލައިހޫރޭ އިގުތިސޯދީ ސިޔާސަތެއް އޮތް ސަރުކާރެއް ކަމަށާ، އެހެން ނަމަވެސް އެކަންކަން އަނެއްކާ ވެސް ބަދަލުކުރާނެ ޕާޓީއަކީ އެމްޑީޕީ ކަމަށާ، ރައްޔިތުންނަށް ލާބަހުރި ޤާނޫނުއަސާސީއެއް އެމްޑީޕީގެ މަސައްކަތުން އަނެއްކާވެސް ހޯދައިދޭނެ ކަމަށް އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އެމްޑީޕީގެ ކޮންގްރެސް ފެށުމަށް މިރޭ މާލެ ސިޓީ ހޯލްގައި ކުރިއަށްގެންދާ ރަސްމިއްޔާތުގައި ވާހަކަދައްކަވަމުންނެވެ.

އިދިކޮޅު އެންމެބޮޑު ޕާޓީ އެމްޑީޕީ (ދިވެހި ރައްޔިތުންގެ ޑިމޮކްރަޓިކް ޕާޓީ) ގެ ކޮންގްރެސް ދެންމެ ފަށާފައި ވާއިރު، އެ ކޮންގްރެސްގައި ރައީސް ނަޝީދު ވިދާޅުވީ، ރައީސް މުއިއްޒުގެ މި ސަރުކާރަކީ އެއްވެސް މިސްރާބެއް ނެތް ލައިހޫރޭ އިގުތިސޯދީ ސިޔާސަތެއްގެ މައްޗަށް ބިނާވެފައިވާ ސަރުކާރެއް ކަމަށާ، އެކަމުގެ ސަބަބުން ބޭރުގެ ފަރާތްތަކުން ވެސް ރާއްޖެއާމެދު މިހާރު އެއްވެސް އިތުބާރެއް ނެތް ކަމަށެވެ.

އަދި ރައީސް މުއިއްޒުގެ މި ވެރިކަން ކޮންމެހެން ވެސް ބަދަލުކުރަން މިހާރު މަޖުބޫރުވެއްޖެ ކަމަށް ވިދާޅުވަމުން ރައީސް ނަޝީދު ވިދާޅުވީ، އެކަން ކުރާނީ އެމްޑީޕީން ކަމަށާ، މި ސަރުކާރުގައި މުޅިން ވެސް އޮތީ ދޮގާއި މަކަރުހަދައިގެން ރައްޔިތުންނަށް ކަންކަން އޮޅުވާލައިގެން ކޮރަޕްޝަނާއި ފަސާދަ ހިންގުން ކަމަށެވެ.

ރައީސް ނަޝީދުގެ އިތުރުން ވެސް މިރޭގެ ރަސްމިއްޔާތުގައި ކުރީގެ ރައީސް އިބްރާހީމް މުހައްމަދު ސޯލިހާއި، ތިނަދޫ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ރައީސް ވެސް ވާހަކަދެއްކުމަށް ވަނީ ހަަމަޖެހިފައެވެ.

ދެފުށް ފެންނާނޭހެން އާންމުކޮށް ހުޅުވާލެވިގެން ކުރިއަށްގެންދާ މި ކޮންގްރެސް ފަށާފައި ވަނީ، މާލެ ސިޓީ ކައުންސިލް ހޯލުގައެވެ. މި ރެއިން ފެށިގެން އަންނަ ހޮނިހިރު ދުވަހާ ހަމައަށް ކޮންގްރެސް ކުރިއަށްދާނެ ކަމަށް އެމްޑީޕީން ބުނެއެވެ.

އެމްޑީޕީގެ މި ކޮންގްރެސްއާ ގުޅޭ ގޮތުން އެ ޕާޓީ އިން ބުނެފައި ވަނީ، މި ކޮންގްރެސް އަކީ ހުރިހާ ގޮތަކުން ވެސް ތަފާތު ކޮންގްރެސްއަކަށް ވާނެ ކަމަށެވެ. މި ކޮންގްރެސްގެ ތެރެއިން ޕާޓީގެ ކުރިމަގުގެ ގިނަ ކަަންތައްތަކެއް ނިންމިގެން ދާނެ ކަމަށް ވެސް އެ ޕާޓީ އިން ބުނެފައިވެ އެވެ.

ރާއްޖޭގެ ހުރިހާ ރަށަކުން މަންދޫބުން ބައިވެރިވާ ކޮންގްރެސް ހުޅުވުމުގެ ރަސްމިއްޔާތު މިރޭ ބޭއްވުމަށްފަހު، މާދަމާ އިންވެސްޓްމަންޓް ފޯރަމެއް ބާއްވަން ވެސް ވަނީ ތާވަލުކޮށްފައެވެ. އެއަށްފަހު އަންނަ ހޮނިހިރު ދުވަހު ރަސްމީ ކޮންގްރެސްގެ ޖަލްސާތައް ކުރިއަށްގެންދިޔުމަށް ވެސް ވަނީ ހަމަޖެހިފައެވެ. އެ ދުވަހު ކޮންގްރެސްގެ ރިޕޯޓު ހުށަހެޅުމާއި، އެމްޑީޕީގެ އެޕްލިކޭޝަން ލޯންޗުކުރުން އަދި، ޕާޓީގެ އަސާސީ ގަވާއިދަށް އިސްލާހު ގެނައުމާއި، ސިޔާސަތު ކަރުދާހުގެ ގޮތުގައި ބޮޑު ބަދަލު ގަރާރު ހުށަހަޅާ، އެ ގަރާރަށް ބަހުސް ކުރުން ވެސް އެ ދުވަހު އޮންނާނެ އެވެ.

އަދި، ލާމަރުކަޒީ ގަރާރެއް ވެސް ކޮންގްރެސްގައި ހޮނިހިރު ދުވަހު، ހުށަހަޅާއިރު، އެއަށް ފަހު އަސާސީ ގަވާއިދަށް ހުށަހެޅުނު އިސްލާހުތަކަށް ވޯޓަށް އެހުން ވެސް އޮންނާނެކަމަށް އެމްޑީޕީން ބުނެއެވެ.

އެމްޑީޕީގެ މި ކޮންގްރެސްގެ ޝިއާރަކީ ”ރަށްވެހި އުފެއްދުން“ މިއެވެ. އެހެންކަމުން މި ޝިއާރުގެ ދަށުން، އެ ޕާޓީގެ މެޖޯރިޓީ އޮންނަ ރަށު ކައުންސިލްތަކުން ރަށްރަށުގައި ހިންގަން ބޭނުންވާ ތަރައްގީގެ މަޝްރޫއުތައް ދެނެގަނެ، އެ މަޝްރޫއުތަކަށް ބޭނުންވާ އިންވެސްޓަރުން ހޯދާ ޕާޓީގެ އެހީތެރިކަމާއެކު އެ މަސައްކަތްތައް ކުރިއަށް ގެންދެވޭނެ އިންތިޒާމުތައް ފަހިކޮށް ދޭނެ ކަމަށް އެމްޑީޕީން ބުނެއެވެ.

ކޮންގްރެސް ނިންމުމުގެ ރަސްމިއްޔާތު ހޮނިހިރު ދުވަހުގެރޭ އޮންނައިރު، އެ ރަސްމިއްޔާތުގައި ޕާޓީގެ އިސްވެރިން ވާހަކަ ދައްކަވާނެކަމަށް ވެސް އެމްޑީޕީން މައުލޫމާތު ދެއެވެ. އެމްޑީޕީން އެންމެ ފަހުން ބޭއްވި ކޮންގްރެސް ބާއްވާފައިވަނީ 2022 ވަނަ އަހަރުއެވެ.