އެމްޑީޕީ ކެންދޫ ދާއިރާގެ ކަންބޮޑުވުންތައް ހައްލުނުކޮށް ކޮންގްރެސް ބާއްވައިފި ނަމަ، އެ ދާއިރާގެ އެތައްކެއް އެމްޑީޕީ މެންބަރުންނެއްގެ ހައްގު ގެއްލޭނެކަމަށްޓަކާ، މައްސަލަތައް ހައްލުކޮށްދީފައި މެނުވީ އަންނަ މަހުގެ އެއްވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ކޮންގްރެސް މަނުން ފައިނަލް ނުކުރުމަށް ބ.ކެންދޫ ދާއިރާގެ ރައްޔިތުންގެ މަޖުލީހުގެ އެމްޑީޕީ މެންބަރު މައުރޫފް ޒާކިރް (މަޓޭ) އެމްޑީޕީގެ ޗެއާޕާސަން މުހައްމަދު ނަޝީދުގެ އަރިހުން އެދިވަޑައިގެންފިއެވެ.

މިކަމަށް އެދިވަޑައިގެން، އެ ދާއިރާގެ ހުރި ކަންބޮޑުވުންތައް ހިއްސާކުރައްވާ އެމްޑީޕީގެ ޗެއާޕާސަން މުހައްމަދު ނަޝީދަށް އެޑްރެސް ކުރައްވާ މިދިޔަ އޮގަސްޓު މަހުގެ 19 ވަނަ ދުވަހު މަޓޭ ވަނީ ސިޓީއެއް ފޮނުއްވާފައެވެ. އަދި އެ ސިޓީއަށް އެއްވެސް ޖަވާބެއް ނުލިބި ލަސްވާތީ އެކަން އެމްޑީޕީ ގައުމީ މަޖިލީހުގެ މެންބަރުން ހިއްސާކުރައްވާ ވަޓްސްއެޕް ގްރޫޕުގައި އެމްޑީޕީގެ ޗެއާޕާސަނަށް ޓެގް ކުރައްވާ މަޓޭ މިއަދު ވަނީ ތަކުރާރުކޮށް އެ ކަންކަން ހަނދުމަކޮށްދެއްވާފައެވެ.

ކަންބޮޑުވުން ފާޅުކުރައްވާ މަޓޭ ޗެއާޕާސަނަށް ފޮނުއްވާފައިވާ ސިޓީގައި ވިދާޅުވެފައި ވަނީ، ކޮންގްރެސްގެ ބައިވެރިން ކަނޑައަޅަންޖެހޭނީ، އެމްޑީޕީން މިހާރު އަމަލުކުރަމުންގެންދާ އަސާސީ ގަވާއިދާ އެއްގޮތްވާ ގޮތުގެމަތިން ކަމަށް ދެކެވަޑައިގަންނަވާ ކަމަށާ، އެހެންކަމުން ދާއިރާތަކުގެ ނައިބު ރައީސުންނަށް ކޮންގްރެސްގައި ބައިވެރި ވެވޭނެކަމަށް އަސާސީގަވާއިދުގައި ބަޔާންކޮށްފައިވުމުން ކެންދޫ ދާއިރާ އަކީ 5 ރަށުގެ މައްޗަށް އެކުލެވޭ، ދާއިރާއެއްކަމަށް ވާއިރު، އަސާސީގަވާއިދުގައިވާ ގޮތުގެމަތީން 5 ރަށުން ނައިބު ރައީސުން ކެންދޫ ދާއިރާއިން އިންތިހާބުކޮށް ދާއިރާގެ ހިންގާކޮމެޓީ އަލުން އެކުލަވާލަންޖެހޭ ކަމަށެވެ.

އަދި އަސާސީ ގަވާއިދަށް އެންމެ ފަހުން ގެނެވުނު އިސްލާހަށް ފަހު ވެސް، ކެންދޫ ދާއިރާގެ ހިންގާ ކޮމިޓީ އިންތިހާބު ކުރުމަށް އަދި ދާއިރާގެ ނައިބު ރައީސުން އިންތިހާބު ކުރުމަށް، ކެންދޫ ދާއިރާގެ އެއްވެސް ރަށެއްގައި އެއްވެސް އިންތިހާބެއް ބާއްވާފައި ނުވާއިރު، މިހާރު އެކުލަވާލާފައިވާ ކޮންގްރެސް ގުރޫޕުގައި ކެންދޫ ދާއިރާގެ ރަށްރަށުގެ ނައިބު ރައިސުންގެ ގޮތުގައި ކަނޑައަޅާ ގުރޫޕްގައިވާ ފަރާތްތަށް އިންތިހާބަކާނުލާ ކަނޑައެޅުނުގޮތެއް އެނގިވަޑައިނުގަންނަވާ ކަމަށާ، އަދި އިންތިހާބަކާ ނުލާ، އެ ނައިބު ރައީސުންގެ މަގާމުތައް ސައްހާވާނެ ކަމަށް ގަބޫލު ނުކުރައްވާ ކަމަށް ވެސް މަޓޭ ފޮނުއްވި ސިޓީގައި ވިދާޅުވެފައި ވެއެވެ.

"މިފަރާތްތަށްވެސް، އިންތިހާބު ކުރެވިފައިނުވާއިރު، ދާއިރާގެ ރަށު ނައިބު ރައީސުންގެ ގޮތުގައި އެފަރާތްތަށް އަށްޔަން، ކުރެވިގެން ވާނެކަމުގައި ނުދެކެމެވެ. އެހެންކަމުން ދާއިރާގެ ހިންގާ ކޮމިޓީ އިންތިހާބު ކުރުމަކާ ނުލާ މިދެންނެވި ރަށު ނައިބު ރައީސުންގެ މަގާމުތަށް ސައްހާވާނެ ކަމަށް ގަބޫލު ނުކުރާތީ އާއި، ކޮންގްރެސް ގްރޫޕްގައި ހިމަނާފައިވާ ބައެއްފަރާތްތަށް ނިމިދިޔަ ކައުންސިލް އިންތިހާބުގައި ސީދާ ޕާޓީގެ ކެނޑިޓޭޓުންނާ ދެކޮޅަށް ޕީއެންސީއާ އެކު މަސައްކަތްކޮށްފައިވާ ފާރާތްތަށް ކަމުން، އަލުން ދާއިރާގެ ރަށްރަށުގައި އިންތިހާބުތަށް ޕާޓީގެ ބެލުމުގެ ދަށުން، ބާއްވައިދެއްވާ ދާއިރާގެ ހިންގާކޮމެޓީ އިންތިހާބު ކޮށްދެއްވައި ސައްހަ ފަރާތްތަށް ކޮންގްރެސްގައި، ބައިވެރިވެވޭނެ އިންތިޒާމުތަށް، ހަމަޖައްސައިދެއްވުން އެދި ދަންނަވަމެވެ." - މަޓޭއެހެންކަމުން، ޕާޓީގެ ޗެއާޕާސަން، ޕާޓީ ހިންގެވުމުގައިވެސް އަމަލުކުރައްވަން ޖެހިވަޑައިގަންނަވާނީ އަސާސީ ގަވާއިދުގެ އިމުގެތެރެއިން ކަމަށް ގަބޫލު ކުރެވޭއިރު، މިފަދަ އިދާރީ މަސައްކަތްތައް ދާނުދާގޮތް ބެއްލެވުން އެއީ އަސާސީ ގަވާއިދުގެ 69 ވަނަ މާއްދާގެ (ނ) އިން ޗެއާޕާސަންގެ މައްޗަށް ލާޒިމުކުރާ ކަމެއް ކަމަށްވާތީ، ކުރިއަށް އޮތް ކޮންގްރެސް ބައްދަލުވުން ބޭއްވުމަށްޓަކާ، އިދާރިގޮތުން ކުރައްވަމުން ގެންދަވާ ބުރަ މަސައްކަތްތަކުގައި ވީހާވެސް އިންސާފުވެރިކޮށް އަދުލުވެރިކޮށް އުސޫލުގެ ތެރެއިން ކަންކަން ކުރިއަށް ގެންދިއުމަށް އެދިވަޑައިގެން މަޓޭ ވިދާޅުވެފައި ވަނީ، އެކަންކަން ރަނގަޅުކޮށްދެއްވާ އެކުވެރިކަމާ، އެއްބައިވަންތަކަމުގެ މަތީގައި ޕާޓީ ހިންގެވުން އެއީ އެމްޑީޕީއަށް 2028 ވެސް ކާމިޔާބުކުރުމަށް އެޅޭނެ އެންމެ މުހިންމު ފިޔަވަޅުކަމުގައި ދެކެވަޑައިގަންނަވާ ކަމަށެވެ.