އޮޑިޓް އޮފީހުން އާންމުކުރި ހިސާބުތަކުން އެނގޭ ގޮތުން 2019 އިން 2024 އަށް ސަރުކާރުގެ ހަރަދުގައި ޑިގްރީ ހެދުމަށް 19،265 އެޕްލިކޭޝަން އެޑިއުކޭޝަން މިނިސްޓްރީއަށް ލިބުނެވެ. އޭގެ ތެރެއިން އެ ސްކީމަށް ހޮވިފައިވަނީ 16،388 އެޕްލިކޭޝަނެވެ. އެއީ ސްކީމަށް އެދި ހުށަހެޅި މީހުންގެ 85 ޕަސެންޓެވެ.

އެ ސްކީމަށް އެންމެ ބޮޑު އަދަދެއް ހޭދަކޮށްފައިވަނީ 2022 އާއި 2023 ވަނަ އަހަރު އެވެ. އެ ދެ އަހަރު ހިލޭ ޑިގްރީ ސްކީމަށް 163 މިލިއަން ރުފިޔާ ހޭދަކޮށްފައިވެ އެވެ. ސްކީމު ފެށި ފަހުން ފަސް އަހަރު ތެރޭގައި ކޮންމެ އަހަރަކު ވެސް ސްކީމަށް ކުރި ހޭދަވަނީ އިތުރުވެފަ އެވެ. އޭގެ ފަހުން 2024 ވަނަ އަހަރު ސްކީމަށް ކުރި ހޭދަ ކޮންމެވެސް ވަރަކަށް ދަށަށް ގޮސްފައިވެ އެވެ.

ފުރަތަމަ ޑިގްރީއަށް ކުރި ހަރަދުގެ ތަފްސީލު:

• 2019: 85 މިލިއަން ރުފިޔާ
• 2020: 133 މިލިއަން ރުފިޔާ
• 2021: 141 މިލިއަން ރުފިޔާ
• 2022: 163 މިލިއަން ރުފިޔާ
• 2023: 163 މިލިއަން ރުފިޔާ
• 2024: 150 މިލިއަން ރުފިޔާ

އޮޑިޓްގެ ހިސާބުތަކުން ދައްކާ ގޮތުން ފްރީ ޑިގްރީ ސްކީމުގައި ބައިވެރިވާ ދަރިވަރުން، ކިޔެވުން ފުރިހަމަ ކުރޭތޯ ނުވަތަ ނޫންތޯ ބެލުމުގެ ނިޒާމެއް ހަމަޖައްސާފައި ނެތުމުން އެ ޕްރޮގްރާމް ކާމިޔާބުކަން ދެނެގަތުމަށް ދައްޗެވެ. ނަމަވެސް، ސްކީމުގައި ބައިވެރި 790 ދަރިވަރަކަށް 19 މިލިއަން ރުފިޔާ ހަރަދުކުރި ނަމަވެސް  ޕްރޮގްރާމު ފުރިހަމަ ނުކުރާކަން ފާހަގަކުރެވިފައިވީ ނަމަވެސް، އެ ފައިސާ ހޯދުމަށް އެޑިއުކޭޝަން މިނިސްޓްރީން މަސައްކަތްކޮށްފައި ނުވާ ކަމަށް އޮޑިޓް އޮފީހުން ބުންޏެވެ.

އެ ސްކީމުގައި ބައިވެރިވާ ކުދިންނަކީ ކުރިން ޑިގްރީ ފުރިހަމަ ކޮށްފައިވާ ކުދިންކަން ބެލޭނެ ނިޒާމެއް ނެތުމުގެ ސަބަބުން، ކުރިން ޑިގްރީ ފުރިހަމަކޮށްފައިވާ 271 މީހަކަށް އިތުރު ޑިގްރީ ޕްރޮގްރާމެއް ފުރިހަމަ ކުރުމަށް 9.4 މިލިއަން ރުފިޔާ ޕްރޮގްރާމުގެ މަގްސަދާ ހިލާފަށް ހޭދަކުރި ކަމަށް ވެސް އޮޑިޓް އޮފީހުން ބުނެފައި ވެއެވެ.

ރިޕޯޓުގައިވާ ގޮތުން ސްކީމުގެ ދަށުން ދަރިވަރުން ކިޔަވަމުން ދިޔަ ނަމަވެސް، ޕްރޮގްރާމްގެ ފީއަށް އައި ބަދަލާ އެކު އެއް އަހަރުން އަހަރު ދަރިވަރުން ހޭދަކުރަންޖެހޭ ވަރު ވެސް އިތުރުވިއެވެ. އެގޮތުން ދަރިވަރުންގެ ޖީބުން 60،000ރ. ހޭދަކޮށްފައިވެއެވެ. އެއީ ޕްރޮގްރާމްގެ ފީ 15 ޕަސެންޓުން 46 ޕަސެންޓަށް އިތުރުވުމުންނެވެ.

އޮޑިޓް އޮފީހުން ބުނެފައިވާގޮތުން، އެ ސްކީމުގެ ދަށުން ކިޔެވުން ފުރިހަމަ ކުރާ ދަރިވަރުންގެ އަދަދު ފުރިހަމައަށް ރެކޯޑު ކުރެވިފައި ނުވުމުން، އެ މީހުންގެ ފަރާތުން ގައުމަށް ހިދުމަތް ކުރާ ވަރު ދެނެގަނެވިފައެއް ނުވެއެވެ.

މިފަދަ ސްކީމެއް ހިންގާ އިރު، ރާއްޖެއަށް އެންމެ ބޮޑަށް ބޭނުންވާ ދާއިރާތަކާއި ސްކީމުގެ ދަށުން އެންމެ ގިނައިން ކިޔަވަމުންދާ ދާއިރާތަކުގެ މެދުގައި ވެސް ބޮޑެތި ފަރަގުތަކެއް ހުރިކަމަށް އޮޑިޓް ރިޕޯޓުން ދައްކައެވެ.

މި ރިޕޯޓުން ފާހަގަވި ކަންކަން އިސްލާހުކުރުމަށް ރިޕޯޓުގައި ވަނީ ލަފާދީފައެވެ. އެގޮތުން މި ސްކީމުން ކިޔަވާ ދަރިވަރުންނާއި ކޯސް ފުރިހަމަ ނުކުރާ ދަރިވަރުންގެ މައުލޫމާތު ހޯދާ ބެލެހެއްޓޭނެ ނިޒާމެއް ގާއިމްކުރުމަށާއި ޕްރޮގްރާމް ފުރިހަމަ ނުކޮށް ހުއްޓާލާފައިވާ މީހުން ދެނެގަނެ އެމީހުންނަށް ހޭދަވެފައިވާ ފައިސާ އަނބުރާ ހޯދުމަށް ލަފާދީފައިވެއެވެ.

މީގެ އިތުރުން އެންމެ ބޭނުންތެރި ދާއިރާތަކަށް އިސްކަންދެވޭނެހެން ސްކީމް ބައްޓަންކުރުމަށްޓަކައި ސްކީމް ހިންގާ ގޮތް މުރާޖާ ކުރުމުގެ އިތުރުން ވޮކޭޝަނަލް ތަމްރީން ޕްރޮގްރާމަތައް ހިމެނުމަށް ކަނޑައަޅާފައިވާ ލަނޑުދަނޑި ތަންފީޒުކުރުމަށްވެސް ލަފާދީފައި ވެއެވެ.