ދެފުށް ފެންނާނޭހެން އާންމުކޮށް ހުޅުވާލެވިގެން ކުރިއަށްގެންދާ މި ކޮންގްރެސް ފަށާފައި ވަނީ، މާލެ ސިޓީ ކައުންސިލް ހޯލުގައެވެ. މި ރެއިން ފެށިގެން އަންނަ ހޮނިހިރު ދުވަހާ ހަމައަށް ކޮންގްރެސް ކުރިއަށްދާނެ ކަމަށް އެމްޑީޕީން ބުނެއެވެ.

މިރޭ ކޮންގްރެސް ފެށުމަށް ބާއްވާ މި ރަސްމިއްޔާތުގައި، އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވާހަކަދެއްކެވުމަށް ހަމަޖެހިފައި ވާއިރު، މީގެ އިތުރުން ކުރީގެ ރައީސް އިބްރާހީމް މުހައްމަދު ސޯލިހާއި، ތިނަދޫ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ރައީސް ވެސް ވާހަކަދެއްކުމަށް ވަނީ ހަަމަޖެހިފައެވެ.

އެމްޑީޕީގެ މި ކޮންގްރެސްއާ ގުޅޭ ގޮތުން އެ ޕާޓީ އިން ބުނެފައި ވަނީ، މި ކޮންގްރެސް އަކީ ހުރިހާ ގޮތަކުން ވެސް ތަފާތު ކޮންގްރެސްއަކަށް ވާނެ ކަމަށާ، މި ކޮންގްރެސްގެ ތެރެއިން ޕާޓީގެ ކުރިމަގުގެ ގިނަ ކަަންތައްތަކެއް ނިންމިގެން ދާނެ ކަމަށް ވެސް އެ ޕާޓީ އިން ބުނެފައިވެ އެވެ.

ރާއްޖޭގެ ހުރިހާ ރަށަކުން މަންދޫބުން ބައިވެރިވާ ކޮންގްރެސް ހުޅުވުމުގެ ރަސްމިއްޔާތު މިރޭ ބޭއްވުމަށްފަހު، މާދަމާ އިންވެސްޓްމަންޓް ފޯރަމެއް ބާއްވަން ވެސް ވަނީ ތާވަލުކޮށްފައެވެ. އެއަށްފަހު އަންނަ ހޮނިހިރު ދުވަހު ރަސްމީ ކޮންގްރެސްގެ ޖަލްސާތައް ކުރިއަށްގެންދިޔުމަށް ވެސް ވަނީ ހަމަޖެހިފައެވެ. އެ ދުވަހު ކޮންގްރެސްގެ ރިޕޯޓު ހުށަހެޅުމާއި، އެމްޑީޕީގެ އެޕްލިކޭޝަން ލޯންޗުކުރުން އަދި، ޕާޓީގެ އަސާސީ ގަވާއިދަށް އިސްލާހު ގެނައުމާއި، ސިޔާސަތު ކަރުދާހުގެ ގޮތުގައި ބޮޑު ބަދަލު ގަރާރު ހުށަހަޅާ، އެ ގަރާރަށް ބަހުސް ކުރުން ވެސް އެ ދުވަހު އޮންނާނެ އެވެ.

އަދި، ލާމަރުކަޒީ ގަރާރެއް ވެސް ކޮންގްރެސްގައި ހޮނިހިރު ދުވަހު، ހުށަހަޅާއިރު، އެއަށް ފަހު އަސާސީ ގަވާއިދަށް ހުށަހެޅުނު އިސްލާހުތަކަށް ވޯޓަށް އެހުން ވެސް އޮންނާނެކަމަށް އެމްޑީޕީން ބުނެއެވެ.

އެމްޑީޕީގެ މި ކޮންގްރެސްގެ ޝިއާރަކީ ”ރަށްވެހި އުފެއްދުން“ މިއެވެ. އެހެންކަމުން މި ޝިއާރުގެ ދަށުން، އެ ޕާޓީގެ މެޖޯރިޓީ އޮންނަ ރަށު ކައުންސިލްތަކުން ރަށްރަށުގައި ހިންގަން ބޭނުންވާ ތަރައްގީގެ މަޝްރޫއުތައް ދެނެގަނެ، އެ މަޝްރޫއުތަކަށް ބޭނުންވާ އިންވެސްޓަރުން ހޯދާ ޕާޓީގެ އެހީތެރިކަމާއެކު އެ މަސައްކަތްތައް ކުރިއަށް ގެންދެވޭނެ އިންތިޒާމުތައް ފަހިކޮށް ދޭނެ ކަމަށް އެމްޑީޕީން ބުނެއެވެ.

ކޮންގްރެސް ނިންމުމުގެ ރަސްމިއްޔާތު ހޮނިހިރު ދުވަހުގެރޭ އޮންނައިރު، އެ ރަސްމިއްޔާތުގައި ޕާޓީގެ އިސްވެރިން ވާހަކަ ދައްކަވާނެކަމަށް ވެސް އެމްޑީޕީން މައުލޫމާތު ދެއެވެ. އެމްޑީޕީން އެންމެ ފަހުން ބޭއްވި ކޮންގްރެސް ބާއްވާފައިވަނީ 2022 ވަނަ އަހަރުއެވެ.