ސިއްރު އެއްބަސްވުމެއްގެ ދަށުން ހިނގާ އެއްވެސް ކަމަކަށް އަޅުގަނޑުމެން އާއެކޭ ބުނެގެން ނުވާނެ ކަމަށާ، އަދި އެމްޑީޕީގެ ސަރުކާރެއްގައި އެފަދަ ގޮތަކަށް ފަށާފައިވާ އެއްވެސް ކަމެއް ކުރިއަށް ވެސް ގެންދިޔަދީގެން ނުވާނެ ކަމަށް، ރާއްޖޭގެ ކުރީގެ ރައީސް އަދި އެމްޑީޕީގެ ކުރީގެ ރައީސް އިބްރާހީމް މުޙަމަދު ސޯލިހު ވިދާޅުވެއްޖެއެވެ.

ރައީސް ސޯލިހު މިހެން ވިދާޅުވީ އިދިކޮޅު އެންމެބޮޑު ޕާޓީ އެމްޑީޕީ (ދިވެހި ރައްޔިތުންގެ ޑިމޮކްރަޓިކް ޕާޓީ) ގެ ކޮންގްރެސް ފެށުމަށް މިރޭ މާލެ ސިޓީ ހޯލްގައި ކުރިއަށްގެންދާ ރަސްމިއްޔާތުގައި ވާހަކަދައްކަވަމުންނެވެ.

ރައީސް ސޯލިހު ވިދާޅުވީ، މިރޭ އެއްވެ މިތިބީ ހަމައެކަނި ސިޔާސީ ލީޑަރުންތަކެއްގެ ހައިސިއްޔަތުން ނޫންކަމަށާ، އެހެން ނަމަވެސް އެކުގައި އެއްދަތުރެއް ކޮށްފައިވާ އެކުވެރިބައެއްގެ ގޮތުގައި ކަމަށެވެ.

މިއަދު މި ގައުމު މިވަނީ އެތައްއެތައް ކަންބޮޑުވުންތަކެއްގެ ތެރޭގައި ކަމަށް ވިދާޅުވެ ރައީސް ސޯލިހު ވިދާޅުވީ، މިއަދު މި ގައުމު މި އޮތް ހާލަތުން އަރައިގަތުމަށް އެންމެފުރަތަމަ ވެސް ކުރަންޖެހޭ ކަމަކީ، ރައީސް މުއިއްޒުގެ މި ވެރިކަން ބަދަލުކުރުން ކަމަށެވެ.

ރައީސް ސޯލިހުގެ އިތުުރުން ވެސް، މި ވެރިކަން ކޮންމެހެން ވެސް ބަދަލުކުރަން މިހާރު މަޖުބޫރުވެއްޖެ ކަމަށް ވިދާޅުވަމުން ރައީސް ނަޝީދު ވެސް މިރޭ ވަނީ ވާހަކަ ދައްކަވާފައެވެ.

އެހެންކަމުން އެކަން ކުރާނީ އެމްޑީޕީން ކަމަށާ، މި ސަރުކާރުގައި މުޅިން ވެސް އޮތީ ދޮގާއި މަކަރުހަދައިގެން ރައްޔިތުންނަށް ކަންކަން އޮޅުވާލައިގެން ކޮރަޕްޝަނާއި ފަސާދަ ހިންގުން ކަމަށް ނަޝީދު ވިދާޅުވިއެވެ.

ރައީސް ނަޝީދާއި ރައީސް ސޯލިހުގެ އިތުރުން ވެސް މިރޭގެ ރަސްމިއްޔާތުގައި ތިނަދޫ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ރައީސް ވެސް ވާހަކަދެއްކުމަށް ވަނީ ހަަމޖެހިފައެވެ.

ދެފުށް ފެންނާނޭހެން އާންމުކޮށް ހުޅުވާލެވިގެން ކުރިއަށްގެންދާ މި ކޮންގްރެސް ފަށާފައި ވަނީ، މާލެ ސިޓީ ކައުންސިލް ހޯލުގައެވެ. މި ރެއިން ފެށިގެން އަންނަ ހޮނިހިރު ދުވަހާ ހަމައަށް ކޮންގްރެސް ކުރިއަށްދާނެ ކަމަށް އެމްޑީޕީން ބުނެއެވެ.

އެމްޑީޕީގެ މި ކޮންގްރެސްއާ ގުޅޭ ގޮތުން އެ ޕާޓީ އިން ބުނެފައި ވަނީ، މި ކޮންގްރެސް އަކީ ހުރިހާ ގޮތަކުން ވެސް ތަފާތު ކޮންގްރެސްއަކަށް ވާނެ ކަމަށެވެ. މި ކޮންގްރެސްގެ ތެރެއިން ޕާޓީގެ ކުރިމަގުގެ ގިނަ ކަަންތައްތަކެއް ނިންމިގެން ދާނެ ކަމަށް ވެސް އެ ޕާޓީ އިން ބުނެފައިވެ އެވެ.

ރާއްޖޭގެ ހުރިހާ ރަށަކުން މަންދޫބުން ބައިވެރިވާ ކޮންގްރެސް ހުޅުވުމުގެ ރަސްމިއްޔާތު މިރޭ ބޭއްވުމަށްފަހު، މާދަމާ އިންވެސްޓްމަންޓް ފޯރަމެއް ބާއްވަން ވެސް ވަނީ ތާވަލުކޮށްފައެވެ. އެއަށްފަހު އަންނަ ހޮނިހިރު ދުވަހު ރަސްމީ ކޮންގްރެސްގެ ޖަލްސާތައް ކުރިއަށްގެންދިޔުމަށް ވެސް ވަނީ ހަމަޖެހިފައެވެ. އެ ދުވަހު ކޮންގްރެސްގެ ރިޕޯޓު ހުށަހެޅުމާއި، އެމްޑީޕީގެ އެޕްލިކޭޝަން ލޯންޗުކުރުން އަދި، ޕާޓީގެ އަސާސީ ގަވާއިދަށް އިސްލާހު ގެނައުމާއި، ސިޔާސަތު ކަރުދާހުގެ ގޮތުގައި ބޮޑު ބަދަލު ގަރާރު ހުށަހަޅާ، އެ ގަރާރަށް ބަހުސް ކުރުން ވެސް އެ ދުވަހު އޮންނާނެ އެވެ.

އަދި، ލާމަރުކަޒީ ގަރާރެއް ވެސް ކޮންގްރެސްގައި ހޮނިހިރު ދުވަހު، ހުށަހަޅާއިރު، އެއަށް ފަހު އަސާސީ ގަވާއިދަށް ހުށަހެޅުނު އިސްލާހުތަކަށް ވޯޓަށް އެހުން ވެސް އޮންނާނެކަމަށް އެމްޑީޕީން ބުނެއެވެ.

އެމްޑީޕީގެ މި ކޮންގްރެސްގެ ޝިއާރަކީ ”ރަށްވެހި އުފެއްދުން“ މިއެވެ. އެހެންކަމުން މި ޝިއާރުގެ ދަށުން، އެ ޕާޓީގެ މެޖޯރިޓީ އޮންނަ ރަށު ކައުންސިލްތަކުން ރަށްރަށުގައި ހިންގަން ބޭނުންވާ ތަރައްގީގެ މަޝްރޫއުތައް ދެނެގަނެ، އެ މަޝްރޫއުތަކަށް ބޭނުންވާ އިންވެސްޓަރުން ހޯދާ ޕާޓީގެ އެހީތެރިކަމާއެކު އެ މަސައްކަތްތައް ކުރިއަށް ގެންދެވޭނެ އިންތިޒާމުތައް ފަހިކޮށް ދޭނެ ކަމަށް އެމްޑީޕީން ބުނެއެވެ.

ކޮންގްރެސް ނިންމުމުގެ ރަސްމިއްޔާތު ހޮނިހިރު ދުވަހުގެރޭ އޮންނައިރު، އެ ރަސްމިއްޔާތުގައި ޕާޓީގެ އިސްވެރިން ވާހަކަ ދައްކަވާނެކަމަށް ވެސް އެމްޑީޕީން މައުލޫމާތު ދެއެވެ. އެމްޑީޕީން އެންމެ ފަހުން ބޭއްވި ކޮންގްރެސް ބާއްވާފައިވަނީ 2022 ވަނަ އަހަރުއެވެ.