ވެލިދޫގެ ކުލަގަދަ އީދު ކުޅިވަރުތަކުގެ ފެށުން ކަމުގައިވާ، އީދު މަޅި ޖެހުމާ އެކު މާލިބައްތެލީގެ ހަރަކާތްތަކުން ރޭ އީދު ކުޅިވަރުތައް ފެށިގެން ދިޔައިރު، މި ކުޅިވަރު ތަކަކީ ވެލިދޫގެ ފަންނާއި ހުނަރުހުރި ހާއްސަ ޒުވާނުންތަކެއް އެކުލެވޭ ދެ ގްރޫޕް ކަމަށްވާ "ޓީކޭއެފް" އާއި "ބައޮކަލޯ" ގެ ފަރާތުން ގެނެސްދޭ ކުޅިވަރު ތަކެކެވެ.

އީދުއުފާ ނ.ވެލިދޫ 1446 އީދުމަޅި ރޯކުރުން - ފޮޓޯ: ފިޔެސް

ވެލިދޫ އީދުމަޅި ރޯކުރުމަކީ އީދު ލައިގަނެއްޖެކަން، އީދުވިލޭރޭ އިއުލާންކޮށް އީދުގެ ކުޅިވަރުތައް ފެށުމުގެ ގޮތުން ޒަމާނުއްސުރެ ކުރަމުން އަންނަ ސަގާފީ ހަރަކާތެއް.

އީދުއުފާ ނ.ވެލިދޫ 1446 އީދުމަޅި ރޯކުރުން - ފޮޓޯ: ފިޔެސް

އީދު މަޅީގެ މި ހަރަކާތުގައި އީދު މަޅި ރޯކުރުމަށްފަހު ވެސް، ވަރަށް ކުޅަދާނަ ހުނަރުތަކެއް ދައްކުވައިދިން އަލިފާނުގެ ކުޅިވަރުތައް ވެލިދޫ ގޮނޑުދޮށުގައި ކުރިއަށް ގެންދިޔައެވެ.

އީދުއުފާ ނ.ވެލިދޫ 1446 އީދުމަޅި ރޯކުރުން - ފޮޓޯ: ފިޔެސް

މާލިބައްތެއްޔަކީ ރާއްޖޭގެ އެހެނިހެން ރަށްރަށާ ހިލާފަށް ވެލިދޫގައި ބޮޑުއީދަށް ހާއްސަކޮށް ތައްޔާރުކުރާ ވެލިދޫގެ މިދެންނެވި "ޓީކޭއެފް" ގެ އުފެއްދުންތެރި ހިޔާލާއެކު ހުށަހަޅައިދިން އައިޓަމެކެވެ. މާލި ބައްތެލީގައި ދައްކުވައިދިނީ މާލީގެ ތަފާތު ވައްތަރުތައް އެކުލެވޭނޭހެން ބައްތެއްޔެއްގައި ވެލިދޫއަށް ކުރި ހާއްސަ ދަތުރެކެވެ.

އީދުއުފާ ނ.ވެލިދޫ 1446، މާލިބައްތެލި - ފޮޓޯ: ފިޔެސް

މާލިތަށް ވެލިދޫއަށް ކުރި މި ދަތުރުގައި ވެލިދޫއަށް ބަނދަރުކުރުކޮށް، ރަދުންގެ އަރިހުން ރަށަށް ފޭބުމުގެ އިޒުނައަށް އެދި އެއަށްފަހު އިޒުނަ ލިބުމުން މާލިތައް ރަށުތެރޭގައި ވެސް ހިނގިއެވެ.

އީދުއުފާ ނ.ވެލިދޫ 1446، މާލިބައްތެލި - ފޮޓޯ: ފިޔެސް

މާލިބައްތެލީގައި ގިނަ ވައްތަރުތަކެއްގެ، އެކި ގިންތީގެ މާލި ހިމެނޭހެން ތަފާތު މާލިތަކެއް ފެނިގެންދެއެވެ.

އީދުއުފާ ނ.ވެލިދޫ 1446، މާލިބައްތެލި - ފޮޓޯ: ފިޔެސް

މާލިބައްތެލީގެ ހަރަކާތްތައް ބެލުމަށް އެ ސަރަހައްދަށް އެއްވެފައިވާ އާންމުންނަށް، މާލިތައް އެކި ކަހަލަ ވާހަކަތައް ބުނެދީ ތަފާތު ލަވައާއި ރައިވަރުތައް ކިޔައިދޭ އަޑު ވެސް އިވިގެން ދެއެވެ.

އީދުއުފާ ނ.ވެލިދޫ 1446، މާލިބައްތެލި - ފޮޓޯ: ފިޔެސް

މާލިބައްތެލީގެ ހަރަކާތަކީ ވެލިދޫގެ އެކި އުމުރުފުރާގެ ރައްޔިތުންގެ މެދުގައި ވަރަށް ވެސް މަގުބޫލު އީދުކުޅިވަރުގެ ހަރަކާތަކަށް މިހާރު ވެފައިވާ ހަރަކާތެއްކަން ފާހަގަކޮށްލެވެއެވެ.

އީދުއުފާ ނ.ވެލިދޫ 1446، މާލިބައްތެލި - ފޮޓޯ: ފިޔެސް

އަދި ވެލިދޫގައި ކޮންމެ އީދެއްގައި ވެސް ކުރިއަށްގެންދާ މަޖާ ކުޅިވަރެއްކަމަށްވާ "ރަންފޮށި" އުފުލުން ވެސް ރޭ ވެލިދޫ އާރުޑީސީގެ ފަރާތުން ވެލިދޫގެ ބޮޑެތި މަގުތަކުގައި ކުރިއަށް ގެންދިޔައެވެ.

އީދުއުފާ ނ.ވެލިދޫ 1446 ރަންފޮށި އުފުލުން - ފޮޓޯ: ފިޔެސް

ރަންފޮށި އުފުލުމަކީ ވެސް ޒަމާނުއްސުރެ ވެލިދޫގައި ހިނގަމުން އަންނަ ސަގާފީ ކުޅިވަރު ހަރަކާތެކެވެ.

އީދުއުފާ ނ.ވެލިދޫ 1446 ރަންފޮށި އުފުލުން - ފޮޓޯ: ފިޔެސް

މި ހަރަކާތުގައި ދައްކުވައިދެނީ ރަނުގެ ފައިސާ ފޮތިތަކަކާއި ގަހަނާތައް އަޅާ ފުރާފައިވާ ބޮޑު ފޮއްޓެއް ތަންޑިޔަލުގައި ގިނަބަޔަކު އުފުލާ މަންޒަރެވެ.

އީދުއުފާ ނ.ވެލިދޫ 1446 ރަންފޮށި އުފުލުން - ފޮޓޯ: ފިޔެސް

ރަންފޮށި އުފުލުމުގެ އިތުރުން ވެސް ވަރަށް ފޯރިގަދަ ކުޅިވަރު ހަރަކާތްތަކެއް ވެލިދޫގައި މިފަހަރުގެ އީދުގައި ވެސް ހުށަހަޅައިދިނުމަށް ހަމަޖެހިފައި ވާއިރު، މުޅި ރާއްޖޭގެ ނިސްބަތުން ވެސް ނ. ވެލިދޫ އަކީ އީދު ކުޅިވަރު ވަރަށް ފޯރީގައި ކޮންމެ އަހަރަކު ވެސް ކުރިއަށްގެންދާ ރަށެއްކަން ގިނަބަޔަކު ފާހަގަކުރާ ރަށެކެވެ.

އީދުއުފާ ނ.ވެލިދޫ 1446 ރަންފޮށި އުފުލުން - ފޮޓޯ: ފިޔެސް

މީގެއިތުރުން ވެސް އީދު ދުވަހު ވެލިދޫ ރަސްމީ ބޯޅަދަނޑުގައި ބޮޑު ޖަމާއަތުގައި އީދުނަމާދު ކުރުމުން ދުވަސް ފެށުމަށް ހަމަޖެހިފައިވަނީ، ހަމަ އެ މައިދާނުގައި ވެލިދޫ ރައްޔިތުންނަށް ކައުންސިލުންދޭ ހާއްސަ އީދު ސަޔަކަށް ފަހުއެވެ. އަދި ހަމަ އެދުވަހު ހެނދުނު ވެލިދޫ ރައިވެރިޔާ ބީޗުގައި ފައިގަތަޅާ މުބާރާތް ފެށިގެންދާއިރު، ދުވަހުގެ ހަވީރު "ބުރުގާ ގަސް" ނެރުމާ، ގަހާއިއެކު ތަފާތު މާލީގެ ހަރާކާތްތައް ވެލިދޫގެ ބޮޑެތި މަގުތަކުގައި ކުރިއަށް ގެންދިޔުމަށް ވެސް ހަމަޖެހިފައި ވެއެވެ.