ފައިނޭންޝަލް ހަބަރުތަކާއި ތަފާސްހިސާބުތައް އަދި އެނެލެސިސް ގެނެސްދޭ "ފިންޓެކްސް ނިއުސް ބީޑީ" އިން ނެރުނު މި ތަފާސްހިސާބުތައް ބިނާކޮށްފައިވަނީ ރަސްމީ ނަމްބަރުތަކާއި ދިރިއުޅުމުގެ ހާލަތާއި އަގުތައް ވަޒަންކުރާ ނަމްބިއޯގެ ހިސާބުތަކަށް ބިނާކޮށެވެ.

އެގޮތުން، އެޕާޓްމަންޓު، ފުލެޓު ނުވަތަ ގޭގެ ކުލި ނުހިމަނާ މަހެއްގެ މައްޗަށް ދިވެއްސެއްގެ ދިރިއުޅުމުގެ ހަރަދަށް އެވްރެޖްކޮށް 840 ޑޮލަރު ނުވަތަ ބޭންކް ރޭޓުން ބަލާނަމަ 12،952ރ. ހަރަދުވެ އެވެ. ރާއްޖޭގެ ޑޮލަރުގެ އަގުތަކަށް އެއް ހަމަ ކުރާނަމަ 840 ޑޮލަރަކީ 16،800ރ. އެވެ.

ސަރަހައްދުގެ އެހެން ގައުމުތަކުގައި ދިރިއުޅުމުގެ ހަރަދު

• ސްރީލަންކާ - މަހެއްގެ މައްޗަށް 508 ޑޮލަރު
• ބޫޓާން - މަހެއްގެ މައްޗަށް 387 ޑޮލަރު
• އަފްގާނިސްތާން - 382 ޑޮލަރު
• ބަންގްލަދޭޝް - 349 ޑޮލަރު
• ޕާކިސްތާނު - 340 ޑޮލަރު
• ނޭޕާލް - 336 ޑޮލަރު
• އިންޑިއާ - 313 ޑޮލަރު

ދިރިއުޅުމުގެ ހާލަތު ސަރަހައްދީ ރެކޯޑެއްގައި ހުރިއިރު، ރާއްޖޭގައި ކުދި ވިޔަފާރިތަކަށް މިނިމަމް ވޭޖަކީ 4،500ރ. އެވެ. މިނިމަމް ވޭޖުގެ ގޮތުގައި އެންމެ ބޮޑެތި ވިޔަފާރިތަކަށް 8،000ރ. އަދި، ސިވިލް ސާވިސް މުވައްޒަފުންނާއި މެދު ފަންތީގެ ވިޔަފާރިތަކުގެ މިނިމަމް ވޭޖަކީ 7،000ރ. އެވެ.

މި ފަހުން މަރުކަޒީ ބޭންކް، އެމްއެމްއޭ އިން ހެދި ދިރާސާއަކުން ދެއްކި ގޮތުގައި މާލޭގައި އެއް ކޮޓަރީގެ އެޕާޓްމަންޓެއް އެންމެ އަގުހެޔޮކޮށް ވެސް ލިބެނީ 8،000ރ. އަށެވެ. ރަނގަޅު ފެންވަރުގެ އެއް ކޮޓަރީގެ އެޕާޓްމަންޓުތައް އާންމުކޮށް ލިބެނީ 12،000ރ. އިން މަތީގެ ރޭޓުތަކެއްގަ އެވެ.

ސާވޭއިން ދައްކާ ގޮތުގައި މާލޭގައި ދިރިއުޅޭ އާއިލާތަކުން، މުސާރައިގެ 35 އިންސައްތަ ޚަރަދުކުރަނީ ކުއްޔަށެވެ. އާދައިގެ އާއިލާތަކުން 68 އިންސައްތައެއްހާ ފައިސާ ކުއްޔަށް ހޭދަކުރާއިރު ތަނަވަސް އާއިލާތަކުން ވެސް މުސާރައިގެ 28 އިންސައްތަ ކުއްޔަށް ހޭދަކުރެއެވެ.