ފުލުހުން މީޑިއާތަކަށް ރޭ ފޮނުވި މެސެޖެއްގައި ބުނީ މޭޔަރަށް ހިމާޔަތްދިނުމުގެ ގޮތުން، ފުލުހުންގެ ހިމާޔަތުގައި ޕޮލިސް ސްޓޭޝަނަށް ގެންދެވިފައިވާ ކަމަށެވެ.

މައުލޫމާތު ޔަގީންކުރެވޭ މިންވަރުން، އިތުރު މައުލޫމާތު ހިއްސާ ކުރަމުންދާނެ ކަމަށް ފުލުހުން ބުންޏެވެ. ނަމަވެސް އެ ހަމަނުޖެހުމުގައި މީހަކަށް އަނިޔާއެއް ވެފައިވާ ކަމެއް އަދި މީހަކު ހައްޔަރުކުރި ކަމުގެ މައުލޫމާތެއް ވެސް ފުލުހުން ދީފައެއް ނުވެއެވެ.

އާތިފު މީޑިއާއަށް ދެއްވި މައުލޫމާތުގައި ވިދާޅުވީ އޭނާ ކާރުގައި މީހަކާ ބައްދަލުކުރުން ދަނިކޮށް ޕީއެންސީގެ މެންބަރުންތަކެއް ކާރު ވަށާލައި ހުރަސް އެޅި ކަމަށެވެ.

"މިފަދަ ނާތަހުޒީބު އަމަލުތައް ޕީއެންސީގެ މެންބަރުން އެ ކުރަނީ އިންތިހާބުން ބޮޑުތަނުން ބަލިވާނެކަން އެ މީހުންނަށް އެނގޭތީ." އާތިފް ވިދާޅުވެފައި ވެއެވެ.

މޭޔަރު އާތިފަކީ ކުރިއަށްއޮތް ލޯކަލް ކައުންސިލު އިންތިހާބުގައި ދެވަނަ ދައުރަކަށް އެމްޑީޕީގެ ޓިކެޓުގައި ކުޅުދުއްފުށީގެ މޭޔަރުކަމަށް ވާދަކުރައްވާ ކެންޑިޑޭޓްވެސް މެއެވެ.

އާތިފަށް ހުރަސްއެޅި ޕީއެންސީގެ މެންބަރުންގެ މައްސަލައެއް ބަލާކަންވެސް އަދި މި ހާދިސާއާ ގުޅިގެން އިތުރު މައުލޫމާތެއް މިހާތަނަށް ފުލުހުން ހާމަކޮށްފައެއް ނުވެއެވެ.