ފިނޭންސް މިނިސްޓަރު މޫސާ ޒަމީރު.--
ތެލުގެ އަގު ބޮޑުކުރުމުގެ ވިސްނުމެއް ސަރުކާރުން ނުގެންގުޅޭ
"ސިންގަޕޫރުން ތެޔޮ ބަރުކޮށްގެން އަންނަ އުޅަނދެއް މިމަހު އަންނާނެ. އަދި އޮމާންގެ ސޮހާރުން ތެޔޮ ބަރުކޮށްގެން އަންނަ ވެސަލްއެއްވެސް މިމަހު އަންނާނެ" - މިނިސްޓަރު ޒަމީރު
ޖުނާން އަޙުމަދު 22 މާރޗް 2026 (އާދީއްތަ) 17:23
ޔަހޫދީ އިޒްރޭލާއި އެމެރިކާ ގުޅިގެން މެދުއިރުމަތީގައި މިހާރު ކުރަމުންގެންދާ ހަނގުރާމައާ ގުޅިގެން، ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލެމުންދާ ދަނޑިވަޅެއްގައި، ކުރިއަށް އޮތް ދުވަސްތަކުގައި ރާއްޖޭގައި ތެލުގެ އަގު ބޮޑުކުރުމުގެ އެއްވެސް ވިސްނުމެއް ސަރުކާރުގެ ނެތް ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރު ޒަމީރު ވިދާޅުވީ، މިހާރު ހިނގަމުންދާ ހަނގުރާމައާ ގުޅިގެން ތެލުގެ އަގު ދެގުނައަށް ވުރެ ބޮޑުވެފައިވީ ނަމަވެސް ކުރިއަށް މި އޮތް ދުވަސްތަކުގެ ތެރޭގައި ތެލުގެ އަގު ދެން އިތުރަށް ބޮޑުކުރުމުގެ ވިސްނުމެއް ސަރުކާރުން ނުގެންގުޅޭ ކަމަށެވެ.
މިނިސްޓަރު ޒަމީރު މިހެން ވިދާޅުވެފައިވާއިރު މެދުއިރުމަތީގައި އީރާނާ ދެކޮޅަށް ކުރަމުންގެންދާ ހަނގުރާމަ ފެށުނު ފަހުން ރާއްޖޭގައި ޕެޓްރޯލް ލީޓަރެއްގެ އަގު 29 ރުފިޔާއަށް އުފުލިފައިވާ ކަން ފާހަގަކޮށްލެވެއެވެ.
"މި ދަނޑިވަޅުގައިވެސް ރައްޔިތުންނަށް އަތްފޯރާ ފަށެއްގައި ތެޔޮ ފޯރުކޮށްދިނުމަކީ ސަރުކާރުގެ އަމާޒެއް، ކުރިއަށް މި އޮތް ދުވަސްތަކުގެ ތެރޭގައި ތެލުގެ އަގު އަނެއްކާވެސް އިތުރަށް ބަދަލު ކުރުމުގެ ވިސްނުމެއް ސަރުކާރުގައެއް ނެތް." - މިނިސްޓަރު ޒަމީރު
ތެލުގެ އަގު ބޮޑުނުކޮށް ހިފެހެއްޓުމަށްޓަކައި، މަސްވެރިންނަށް ފޯރުކޮށްދޭ ތެލާއި، މާލޭގެ ޕެޓްރޯލް ޝެޑްތަކުން އާންމުން ގަންނަ ތެޔޮ ހިމެނޭހެން، ސަރުކާރުން ދަނީ ތެލުގެ ސަބްސިޑީ ދެމުން ކަން ފާހަގަކުރައްވާ ޒަމީރު ވިދާޅުވީ، އެކަން އެގޮތުގައި ސަރުކާރުން ހިފަހައްޓަނީ، ބައެއް ދާއިރާތަކަށާއި އާންމު ރައްޔިތުންނަށް ކުރިމަތިވެދާނެ ތަކުލީފުތަކަށް ވިސްނައިގެން ކަމަށެވެ.
މިނިސްޓަރުގެ ވާހަކައިގައި، ރާއްޖެއަށް ދުވަހުން ދުވަހަށް ބޭނުންވާ ތެޔޮ، މާތްﷲގެ އިރާދަފުޅާއެކު މެދުކެނޑުމެއް ނެތި ލިބެމުންދާނެ ކަމުގެ ޔަގީންކަން ރައްޔިތުންނަށް އަރުވާކަމަށް ވިދާޅުވެ، ކުރިއަށް އޮތް ދުވަސްތަކުގައިވެސް ތެޔޮ ހިފައިގެން އިތުރު އުޅަނދުތައް ރާއްޖެ އަންނާނެ ކަމަށް މިނިސްޓަރު ޒަމީރު ވިދާޅުވިއެވެ.
"މިމަހުގެ ދޭއް ނުވަތަ ތިނެއް ހިސާބުގައި ސިންގަޕޫރުން ބަރުކޮށްގެން އަންނަ އުޅަނދެއް އަންނާނެ. އޭގައި ޑީސަލާއި ޕެޓްރޯލް ހުންނާނެ. އަދި އޭޕްރިލް ހަތަރެއް ނުވަތަ ފަހެއް ހިސާބުގައި އޮމާންގެ ސޮހާރުން ބަރުކޮށްގެން އަންނަ ވެސަލްއެއްވެސް އައުމަށް މިހާރުވަނީ ހަމަޖެހިފައި." - މިނިސްޓަރު ޒަމީރު
ރާއްޖޭގައި އެކަށީގެންވާ ވަރަށް ތެލުގެ ސްޓޮކް އެބަހުރި ކަމަށް ވިދާޅުވެ، ރާއްޖޭގައި ތެޔޮ ރައްކާކޮށްފައި ހުރި މިންވަރާ ގުޅޭގޮތުން ޒަމީރު ވިދާޅުވީ، އެސްޓީއޯގެ ތެޔޮ އުފުލާ ދެ ބޯޓުކަމަށްވާ 'ނިއޯން' އަދި 'އަލިމަސް' އިން ދާދި ފަހުން ތެޔޮ ބާލާފައިވާ ކަމަށެވެ.
ކުރިއަށް އޮތް ދުވަސްތަކުގައި ރާއްޖޭގައި ތެލުގެ އަގު ބޮޑުކުރުމުގެ އެއްވެސް ވިސްނުމެއް ސަރުކާރުގެ ނެތް ކަމަށް ފިނޭންސް މިނިސްޓަރު ވިދާޅުވި ނަމަވެސް، އެކަން އެގޮތުގައި ކުރިއަށްގެންދެވޭނީ މިހާރު ރައްޔިތުންގެ ކުރިމަތީގައި މިއޮތް ކައުންސިލް އިންތިހާބުގެ ދާއިމީ ނަތީޖާ އިއުލާންކުރުމާ ހަމައަށް ކަމަށް ރާއްޖޭގެ އިގުތިސޯދީ މަސްރަހު ދިރާސާކުރައްވާ ގިނަ ބޭފުޅުން ވިދާޅުވެއެވެ.
އަދި ހަމަ ރާއްޖެއާ އަވައްޓެރި ގައުމުތަކުން މިހާރު ވެސް ތެލުގެ އަގު ވަނީ ދެގުނައަށް ނުވަތަ ބައެއްގައުމުތަކުގައި އެއަށްވުރެ ވެސް މައްޗަށް އުފުލިފައި ކަން ފާހަގަކޮށްލެވެއެވެ.
ކޮމެންޓް
