ރައީސް ޑރ.މުޙައްމަދު މުޢިއްޒު، މިއަދު ނޫސްވެރިންނާ ބައްދަލުކުރައްވަނީ.-- ފޮޓޯ: ރައީސް އޮފީސް
ދެ އިންތިހާބު އެއްކޮށްލުމުގެ އިތުރުން ގާނޫނުއަސާސީއަށް ގިނަ ބަދަލުތަކެއް ގެންނަނީ
މަރްޔަމް މުޙައްމަދު 23 މާރޗް 2026 (ހޯމަ) 14:16
ރިޔާސީ އިންތިހާބާއެކު ރައްޔިތުންގެ މަޖިލީހުގެ އިންތިހާބު ބޭއްވުމަށް މިހާރު ރައްޔިތުންގެ ފެންނަ ނުފެންނަ ވޯޓަކަށް ހުށަހަޅާފައިވާ ބަދަލުގެ އިތުރުންވެސް ގާނޫނުއަސާސީއަށް ގިނަ ބަދަލުތަކެއް ގެންނަވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެ އެވެ.
ރައީސް މިއަދު ނޫސްވެރިންނާ ބައްދަލުކުރައްވައި ދެއްވި މައުލޫމާތުގައި ވިދާޅުވީ ގާނޫނުއަސާސީއަށް ގެންނަވަން ބޭނުންވާ ބަދަލުތައް 'ރިފޯމް ޕެކޭޖެއް'ގެ ގޮތުގައި ކުރިއަށް އޮތް ދުވަސްތަކުގައި ހުށަހަޅުއްވާނެ ކަމަށެވެ.
"މިއީ އެޑްހެކްކޮށް ނޫނީ ވަކިވަކިން ހިނގާ ކަންކަމެއް ނޫން. ތިބޭފުޅުން ހަނދުމަފުޅު ހުންނާނެ، އަޅުގަނޑު ވާނީ އެކިފަހަރު މަތިން، ރިފޯމް ޕެކޭޖުގެ އެކި ކަންކަން އިއުލާންކޮށްފައި. ދައުލަތުގެ ކަންކަން ރިފޯމް ކުރަންޖެހޭ. ރަނގަޅު ކުރަންޖެހޭ. އިސްލާހުކުރަން ޖެހޭ." ރައީސް ވިދާޅުވިއެވެ.
ރައީސް ވިދާޅުވީ އަންނަ އެޕްރީލް މަހު އޮންނަ ފެންނަ ނުފެންނަ ވޯޓަށްފަހު، ގާނޫނުއަސާސީއަށް އިތުރު އިސްލާހުތައް ހުށަހަޅުއްވާނެ ކަމަށެވެ.
ރައީސް ފާހަގަ ކުރެއްވި އިސްލާހުތަކުގެ ތެރޭގައި؛
- ރައްޔިތުންގެ މަޖިލީހުގެ މެންބަރުންގެ އަދަދު އިތުރުވަމުންދާ ދިއުމަށް ބަދަލު ގެނައުން
- މަޖިލީހުގެ މެންބަރުންގެ އަދަދުގެ ވަކި ޕަސެންޓެއް އެއީ 30 އަހަރުން ދަށުގެ ޒުވާނުން ކަމުގައި ކަނޑައެޅުން
- މަޖިލީހުގެ މެންބަރުންގެ އަދަދުގެ ވަކި ޕަސެންޓެއް އެއީ އަންހެނުން ކަމުގައި ކަނޑައެޅުން
- ރިޔާސީ އިންތިހާބު އެއްބުރުން ބޭއްވުން. ޕްރިފަރެންޝަލް ވޯޓިން ސިސްޓަމްގެ ދިރާސާ ކުރިއަށް ގެންދަވާ ކަމަށް ވިދާޅުވި
- ނޮވެމްބަރު 17 ގެ ބަދަލުގައި ނޮވެމްބަރު 11 ގައި ރިޔާސީ ދައުރު ފެށުން
- މިނިވަން މުއައްސަސާތައް މިހާރު ހިނގާގޮތް އިތުރަށް މިނިވަން ކޮށް ކަށަވަރު ކުރުމަށް، ޗެކް އެންޑް ބެލެންސް ވަރުގަދަ ކުރުމަށްޓަކައި އިސްލާހު ގެނައުން
- ޖޭއެސްސީ ކޮމްޕޮޒިޝަން ބަދަލުކުރުން
- ޖުޑީޝަރީ އިތުރަށް ރިފޯމް ކޮށް މިނިވަން ކުރުމަށްޓަކައި އިތުރު އިސްލާހުތައް ގެނައުން
.
ރައީސް ވިދާޅުވިގޮތުގައި މި އިސްލާހުތައް ގެނައުމުގައި ގާނޫނުއަސާސީ އާއި ގާނޫނުތަކަށްވެސް ބަދަލުތައް ގެނައުމުގެ އިތުރުން އާ ގާނޫނުތައް ވެސް އެކުލަވާލާނެ އެވެ.
އަދި ރިޔާސީ ބަޔާނުގައި ރައީސް ފާހަގަ ކުރެއްވި، ސިޓިޒަންސް ކޮމްޕްލެއިންސް ބިއުރޯ އަކީ ރިފޯމް ޕެކޭޖުގައި ހިމެނޭ މުހިންމު ކަމެއް ކަމަށެވެ. އެ މަސައްކަތް ވަރަށް ބާރަށް ކުރިއަށް ދާކަން ފާހަގަ ކުރައްވައި ރައީސް ވިދާޅުވީ އަންނަ ޖުލައި މަސްތެރޭ އެ އިދާރާ އުފައްދަވާނެ ކަމަށެވެ.
ކޮމެންޓް
