ބައިނަލްއަގުވާމީ މީޑިއާތަކުން އާންމުކޮށްފައިވާ ވީޑިއޯތަކުން ފެންނަ ގޮތުގައި ބުރާސްފަތި ދުވަހުގެ ފަތިސް ވަގުތު ފަލަސްތީނުގެ ގިނަ އަދަދެއްގެ ރައްޔިތުން ވަނީ މިސްކިތުގެ ދޮރުތަކުން އެތެރެއަށް ވަދެފައެވެ. އަދި ފަތިސް ނަމާދުގެ ޖަމާއަތުގައި ގާތްގަނޑަކަށް 3،000 މީހުން ބައިވެރިވިއެވެ.

ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލުން އީރާނާ ދެކޮޅަށް ފެށި ހަނގުރާމައާ ގުޅިގެން، ނަޞާރާ، ޔަހޫދީ އަދި މުސްލިމުންގެ މުޤައްދަސް ބިނާތަކަށް ވަނުން އޮތީ މުޅިން މަނާކޮށްފައެވެ. ނުވަތަ ވަރަށް މަދު ބަޔަކަށް ނޫނީ ނުވަދެވޭ ގޮތަށް ހިފަހައްޓާފައެވެ. އިސްރާއީލުން އާންމުކޮށްވެސް، ހާއްސަކޮށް ފަލަސްތީނުގެ އަޅުވެރިންނަށް މިފަދަ ހުރަސްތައް ކުރިމަތިކުރުވައެވެ.

އިސްތިއުމާރުކޮށްފައިވާ ގުދުސްގެ އިސްލާމިކް ވަޤުފް ޑިޕާޓްމަންޓުން ކަށަވަރުކޮށްދިން ގޮތުގައި، ފަތިސް ނަމާދުން ފެށިގެން އަލްއަޤްޞާގެ ދޮރުތައް ހުރިހާ އަޅުވެރިންނަށް ހުޅުވާލެވޭނެއެވެ. މިސްކިތް ބެލެހެއްޓުމުގެ މަސްއޫލިއްޔަތު އުފުލާ އުރުދުންއާ ގުޅުން އޮންނަ ދީނީ އިދާރާއިން އިތުރު ތަފްސީލެއް ދީފައެއް ނުވެއެވެ.

ކުރިން ފެނުނު ވީޑިއޯތަކުން ފެންނަ ގޮތުގައި، މިސްކިތުގެ ގޯތިތެރެއާއި ނަމާދުކުރާ ސަރަހައްދުތަކުގައި ވޮލަންޓިއަރުންނާއި ބަލަހައްޓާ މީހުން ދިޔައީ އަޅުވެރިންނަށް މަރުހަބާ ކިޔުމަށާއި ދީނީ ކަންކަން ކުރިއަށް ގެންދިއުމަށް ތައްޔާރުވަމުންނެވެ.

އިސްރާއީލުގެ ކަމާބެހޭ ފަރާތްތަކުން ބުދަ ދުވަހުގެ އިރުއޮއްސުނު ވަގުތު އިއުލާންކުރީ، އިރުމަތީ ގުދުސްގައި ހުންނަ އަލްއަޤްޞާ މިސްކިތާއި 'ޗާޗް އޮފް ދަ ހޮލީ ސެޕަލްކާ' ހުޅުވާލުމަށް ނިންމާފައިވާ ކަމަށެވެ.

އިސްރާއީލު ފުލުހުން ބުނި ގޮތުގައި މުޤައްދަސް ބިނާތައް ހުޅުވާލީ އިސްރާއީލުގެ 'ހޯމް ފްރަންޓް ކޮމާންޑުން' ދީފައިވާ އާ އިރުޝާދުތަކާ އެއްގޮތަށެވެ.

އެ ބަޔާނުގައި ފާހަގަކޮށްފައިވާ ގޮތުގައި، ގުދުސްގެ އޯލްޑް ސިޓީގެ ގޯޅިތަކާއި މުޤައްދަސް ބިނާތަކަށް ދާ މަގުތަކުގައި ސަލާމަތީ ފިޔަވަޅުތައް ވަނީ ވަރުގަދަކޮށްފައެވެ. އޭގެ ތެރޭގައި އެތައް ސަތޭކަ ފުލުހުންނާއި ބޯޑަރު ގާޑުން ހަރަކާތްތެރިވަނީ "ޒިޔާރަތްކުރާ މީހުންގެ ސަލާމަތްތެރިކަން ކަށަވަރުކުރުމަށް" ކަމަށް ބުނެފައިވެއެވެ.

ނަމަވެސް، ބުރާސްފަތި ދުވަހުގެ ފަހުގެ ވަގުތެއްގައި، އިސްރާއީލުގެ ވަޒަންވެރިން އަލްއަޤްޞާ މިސްކިތުގެ ގޯތިތެރެއަށް ވަދެގަނެ، އިސްރާއީލު ފުލުހުންގެ ހިމާޔަތުގައި ތަލްމޫދީ އަޅުކަންތައްތަކެއް އަދާކޮށްފައިވާ ކަމަށް ފަލަސްތީނުގެ ރަސްމީ ނިއުސް އެޖެންސީ 'ވަފާ' އިން ރިޕޯޓުކޮށްފައިވެއެވެ.

ވަފާ އިން އިތުރަށް ރިޕޯޓުކުރި ގޮތުގައި، އިސްރާއީލުގެ ކަމާބެހޭ ފަރާތްތަކުން ވަނީ ވަޒަންވެރިން މިސްކިތަށް ވަދެގަންނަ ވަގުތު އިތުރު 30 މިނެޓަށް އިތުރުކޮށްފައެވެ. އެހެންކަމުން މިހާރު ހެނދުނު 06:30 އިން 11:30 އަށް އަދި މެންދުރުފަހު 13:30 އިން 15:00 އަށް އެމީހުންނަށް އެތަނަށް ވަދެގަނެވޭނެއެވެ.

ފަލަސްތީނުގެ ޗީފް ޖަސްޓިސް އަދި ދީނީ ކަންކަމާއި އިސްލާމީ ގުޅުންތަކާ ބެހޭ ރައީސްގެ މުޝީރު މަހްމޫދު އަލް-ހައްބާޝް ވަނީ މި އަމަލު ކުށްވެރިކުރައްވާފައެވެ. އޭނާ ވިދާޅުވި ގޮތުގައި ވަޒަންވެރިންގެ މި އަމަލަކީ "މުޤައްދަސް ބިނާގެ ތާރީޚީ އަދި މިހާރު އޮތް ހާލަތާ ހިލާފުވުމުގެ ބޮޑު އަމަލެއް" ކަމަށާއި، މީގެ ސަބަބުން ދީނީ ހަނގުރާމައަކަށް މަގުފަހިވެ، ސަރަހައްދާއި ދުނިޔޭގެ ސަލާމަތާއި ހަމަޖެހުމަށް ނުރައްކާވާނެ ކަމަށެވެ.

އޭނާ އިތުރަށް ވިދާޅުވީ، ވަޒަންވެރިންނަށް ގިނަ ވަގުތު އެތަނުގައި ތިބެވޭ ގޮތަށް ހެދި އާ އުސޫލުތަކުގެ ސަބަބުން، މުސްލިމުންނަށް އެމީހުންގެ އަޅުކަން ކުރުމުގެ މިނިވަންކަމަށް ހުރަސް އެޅެމުންދާ ކަމަށެވެ.

ވޭތުވެދިޔަ ހަ ހަފުތާގެ ތެރޭގައި ހިނގަމުންދާ ސަރަހައްދީ ހަނގުރާމައިގެ ސަބަބުން، ގުދުސް އާއި އެތަނުގެ މުޤައްދަސް ބިނާތަކުގައި ވަނީ ސަލާމަތީ ފިޔަވަޅުތައް އިންތިހާއަށް ވަރުގަދަކޮށް، ތަފާތު އެކި ފަހަރު މަތިން އެތަންތަން ބަންދުކޮށްފައެވެ.

މި ހުރަސްތަކުގެ ސަބަބުން ނަޞާރާ، އިސްލާމް އަދި ޔަހޫދީ ދީނުގެ އެންމެ މުޤައްދަސް ބިނާތަކުގައި ފާހަގަކުރާ ލެންޓް، ޕާސްއޯވަރ އަދި ރަމަޟާން މަހުގެ ހަރަކާތްތަކަށް ގިނަ ބަޔަކަށް ވަނީ ހުރަސް އެޅިފައެވެ.

މީގެ އިތުރުން، މިއަހަރުގެ ފިޠުރުޢީދު ނަމާދު އަލްއަޤްޞާ މިސްކިތުގައި ކުރުންވެސް ކަމާބެހޭ ފަރާތްތަކުން ވަނީ މަނާކޮށްފައެވެ. މިއީ 1967 ވަނަ އަހަރު އިސްރާއީލުން އިރުމަތީ ގުދުސް ޣައިރުޤާނޫނީ ގޮތެއްގައި ހިފި ފަހުން މިފަދަ ހުރަހެއް ކުރިމަތިކުރުވި ފުރަތަމަ ފަހަރެވެ.