ފަތުރުވެރިކަމުގެ ސިނާއަތުގައި މަސައްކަތް ކުރާ މުވައްޒަފުންނަށް ދޭން ޖެހޭ ސާވިސް ޗާޖް ވަޒީފާ ދޭ ފަރާތުން ރުފިޔާއަށް މާރު ކުރުން ހުއްޓުވައި އެ ފައިސާ މުވައްޒަފުންނަށް ޑޮލަރުން ނުވަތަ ސާވިސް ޗާޖު ފަތުރުވެރިންގެ އަތުން ނެގި ބާވަތަކުން ދޭން ލާޒިމް ކުރާ ގޮތަށް ގާނޫނު އިސްލާހުކުރަން އެމްޑީޕީގެ ފަރާތުން މަޖިލީހަށް ހުށަހެޅި އިސްލާހު މިއަދު ބަލައިގަނެފި އެވެ.

ވަޒީފާއާބެހޭ ގާނޫނަށް މި އިސްލާހު ހުށަހެޅުއްވީ، ކެންދޫ ދާއިރާގެ މެންބަރު މައުރޫފް ޒާކިރެވެ. 

މި ބިލުގެ ބަހުސްގެ މަރުހަލާ މިއަދު އޮތް މަޖިލިސް ޖަލްސާގައި ކުރިއަށްދިޔައިރު، މައުރޫފް ވިދާޅުވީ 2022 ވަނަ އަހަރު ސާވިސްޗާޖް ދިނުމަށް ލާޒިމްކޮށް ގާނޫނަށް ގެނެވުނު ބަދަލާއެކު، އެ ގޮތަށް ސާވިސްޗާޖު ނެގިނަމަވެސް، އެ ފައިސާގެ ބާވަތުން ބެހުމުގެ ބަދަލުގައި، އެ ފައިސާ މާރުކޮށްގެން ބައެއް ތަންތަނުން ދިވެހި ފައިސާ ދިވެހިންނަށް ދެމުންދާ ކަމަށެވެ.

މި ބަދަލު މިގޮތަށް ގެނައީ ޑޮލަރު މާރުކުރުމަށް ސަރުކާރުން ހެދި ގަވާއިދާ ގުޅިގެން ކަމަށް ވަޒީފާ ދޭފަރާތްތަކުން ބުނި ނަމަވެސް އެގޮތަށް އެކަން ކުރަން ނެތްކަން މައުރޫފް ފާހަގަ ކުރެއްވިއެވެ.

"އެހެންނަމަވެސް ވަޒީފާ ދޭފަރާތްތަކުން އެ މާރުކޮށްފައި ސާވިސްޗާޖް އަދި މުސާރަވެސް ދިނުމުގެ ސަބަބުން މިދެންނެވި އާމްދަނީއަށް އޭގެން އަސަރުކުރަމުން މިދަނީ." މައުރޫފް ވިދާޅުވިއެވެ.

ރާއްޖޭގެ މަސައްކަތްތެރިންގެ ޔޫނިއަންތައް ތަމްސީލް ކުރާ މައި ޖަމިއްޔާ، މޯލްޑިވްސް ޓްރޭޑް ޔުނިއަން ކޮންގްރެސް (އެމްޓީޔޫސީ) ރައީސްކަން ވެސް ކުރައްވަމުން ގެންދަވާ މައުރޫފް އިސްލާހު ހުށަހެޅުއްވީ، 52 ވަނަ މާއްދާ (ށ)ގެ ދެވަނަ ނަންބަރުގެ ފަހަތަށް ދެ އަކުރެއް އިތުރު ކުރުމަށެވެ.

ފުރަތަމަ އިސްލާހުގައި ބުނަނީ:

• ސާވިސް ޗާޖުގެ ގޮތުގައި ނަގާ ފައިސާގެ ތެރެއިން، މުވައްޒަފުންނަށް ބަހަންޖެހޭ ފައިސާގެ ބާވަތް ބަދަލުކުރުމުގެ ގޮތުން ވަޒީފާދޭ ފަރާތުން އެ ފައިސާ ދިވެހި ރުފިޔާއަށް މާރުކޮށްގެން ނުވާނެ ކަމަށް
• އަދި ސާވިސް ޗާޖު ބެހުމުގައި މުވައްޒަފުންނަށް ދޭންވާނީ ސާވިސް ޗާޖުގެ ގޮތުގައި އެ ފައިސާއެއް ލިބުނު ބާވަތަކުން،

ބިލުގައި ދެން އޮތް އިސްލާހަކީ:

• ފަތުރުވެރިކަމުގެ ސިނާއަތުގައި ހިންގާ ވިޔަފާރިތަކުން ހިދުމަތް ފޯރުކޮށްދިނުމުގައި މަސައްކަތްކުރާ މުވައްޒަފަކު ވަޒީފާ އަދާކުރަނީ ވަގުތީ އެއްބަސްވުމެއް ނުވަތަ ތިންވަނަ ފަރާތެއްގެ މުވައްޒަފެއްގެ ގޮތުގައި ވިޔަސް އެފަދަ މުވައްޒަފުންނަށް ވެސް ސާވިސް ޗާޖު ދިނުމުގައި ތަފާތުކޮށްގެން ނުވާނެ

މި ބިލަށް ބަހުސް ކުރެއްވުމުގައި ސަރުކާރަށް ނިސްބަތްވާ ޕީއެންސީގެ މެންބަރުން، ބިލާ ދެކޮޅަށް ވާހަކަ ދެއްކެވިއެވެ.

އަދި ރިސޯޓް އޯނަރު އަހުމަދު ސިޔާމް މުހައްމަދުގެ އެމްޑީއޭ އަށް ނިސްބަތްވާ ވެލިދޫ ދާއިރާގެ މެންބަރު މުހައްމަދު އައްބާސްވެސް ވަނީ ބިލަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވާފައެވެ.

ބިލާ ދެކޮޅަށް ވާހަކަ ދެއްކެވި ބޭފުޅުންނަށް ރައްދު ދެއްވައި މައުރޫފް ވިދާޅުވީ ސާވިސްޗާޖަކީ ޓޫރިސްޓުންނަށް ހިދުމަތްދޭ މުވައްޒަފުންނަށް ދިނުމަށްޓަކާ ނަގާ އެއްޗެއް ކަމަށާ، އެއީކީ ރިސޯޓް އޯނަރާ ސަރުކާރާ ވިޔަފާރި ހިންގާ ފަރާތާ އެއްވެސް ގުޅުމެއް އޮތް އެއްޗެއް ނޫން ކަމަށެވެ.

މިއަދު ބޭއްވި މަޖިލީހުގެ ޖަލްސާގައި ބިލު ބަލައިގަތުމަށް ފާސްވީ، ޕީއެންސީގެ ވެސް ގިނަ އަދަދެއްގެ މެންބަރުންގެ ވޯޓާއެކު، ޖުމްލަ 67 މެންބަރުންގެ ވޯޓުންނެވެ. ބިލާދެކޮޅަށް އެއްވެސް މެންބަރަކު ވޯޓް ނުދެއްވިނަމަވެސް ވޯޓްގައި ބައިވެރިވެވަޑައި ނުގަންނަވާ މެންބަރުންތަކެއް ޖަލްސާގައި ތިއްބެވިއެވެ.

މި ބިލު މަޖިލީހަށް ބަލައިގަނެ، ދިރާސާކުރުމަށް ސަލާމަތީ ހިދުމަތްތަކާ ބެހޭ ކޮމެޓީއަށް މިއަދު ވަނީ ފޮނުވައިފައެވެ.