ޝަމްހީދު މިކަން ހާމަކުރެއްވީ ސޯޝަލްމީޑިއާގައި ހިއްސާކުރެއްވި ޕޯސްޓުތަކެއްގައެވެ. އޭނާ ވިދާޅުވި ގޮތުގައި މަރުކަޒީ ބޭންކް (އެމްއެމްއޭ) އިން މިދިޔަ އެޕްރީލް މަހުގެ 30 ވަނަ ދުވަހު އާންމުކުރި ތަފާސްހިސާބުތަކުން، ދައުލަތުގެ ބޭރު ފައިސާގެ ރިޒާވް ވަނީ 50 އިންސައްތައަށް ވުރެ ބޮޑަށް ދަށަށް ގޮސްފައެވެ.

އެމްއެމްއޭގެ އެންމެ ފަހުގެ މާލީ ބަޔާނާ ހަވާލާދީ ޝަމްހީދު ފާހަގަކުރައްވާފައިވާ މުހިންމު ކަންކަމުގެ ތެރޭގައި؛

• ބޭރު ފައިސާގެ ނަގުދު ފައިސާ އާއި ބޭންކް ބެލެންސް އެންމެ މަހެއްގެ ތެރޭގައި 17.0 ބިލިޔަން ރުފިޔާ (1.1 ބިލިޔަން ޑޮލަރު) އިން 9.1 ބިލިއަން ރުފިޔާ (590 މިލިޔަން ޑޮލަރު) އަށް ވަނީ ދަށްވެފައި.
• ސަރުކާރުގެ ބޭރު ފައިސާގެ ބެލެންސް ވެސް ވަނީ 5.7 ބިލިޔަން ރުފިޔާ (370 މިލިޔަން ޑޮލަރު) އިން 576 މިލިޔަން ރުފިޔާ (37 މިލިޔަން ޑޮލަރު) އަށް ވަރަށް ބޮޑަށް ދަށްވެފައި.

މިކަންކަން ފާހަގަ ކުރައްވާ ޝަމްހީދު ވިދާޅުވެފައިވަނީ މިއީ ސީރިއަސް ސުވާލުތަކެއް އުފެދޭ ކަމެއްކަމަށެވެ. ޝަމްހީދު އުފެއްދެވި ސުވާލުތަކަކީ؛

• ސަރުކާރުގެ ދަރަނި ދެއްކުމަށް ރިޒާވް ބޭނުންކުރުމުގެ ހުއްދަ އެމް.އެމް.އޭ ގެ ގަވާއިދުތަކުން ގަވަރުނަރަށް ލިބިދީފައިވޭ ހެއްޔެވެ؟
• ބޭނުންކުރެވޭ ފަދަ ރިޒާވެއް ނެތް ނަމަ، ޒަރޫރީ މުދާ އިމްޕޯޓް ކުރުމަށް ފައިސާ ހޯދާނީ ކިހިނެއް ހެއްޔެވެ؟
• ރިޒާވްގެ ހަގީގީ ހާލަތު އެމް.އެމް.އޭ އިން އާންމުންނަށް ސާފުކޮށް ކިޔައިނުދެނީ ކީއްވެ ހެއްޔެވެ؟

ރައްޔިތުންގެ މަޖިލީހުގެ މާލިއްޔަތު ކޮމިޓީގައިވެސް ހިމެނިވަޑައިގަންނަވާ މެންބަރު ޝަމްހީދު މިފަދަ ކަންބޮޑުވުމެއް ފާޅުކުރައްވާފައި ވާއިރު، ސަރުކާރުގެ މާލީ އިދާރާތަކުން ބުނަމުންދަނީ ރިޒާވަށް ބާރުބޮޑުވީ މީގެ ކުރިން ނަގާފައިވާ ބޮޑެތި ދަރަނިތައް ދައްކަން ޖެހުމުން ކަމަށެވެ.

މިގޮތުން، 2021 ވަނަ އަހަރު ދޫކުރު ސުކޫކަށް ދައްކަންޖެހޭ 524.68 މިލިޔަން ޑޮލަރު (8 ބިލިޔަން ރުފިޔާ)، ފާއިތުވި އެޕްރީލް މަހުގެ 2 ވަނަ ދުވަހު ވަނީ ދައްކާފައެވެ. މި ދަރަނި ސަރުކާރުން އަދާކުރީ ސޮވެރިން ޑިވެލޮޕްމަންޓް ފަންޑު (އެސްޑީއެފް) އާއި ދައުލަތުގެ ރިޒާވް ބޭނުންކޮށްގެންނެވެ.