ކިއާ ސްޓާމާ، މަގާމުން އިސްތިއުފާ ދެއްވާނެކަން އިއްޔެ އިއުލާން ކުރެއްވުމާއެކު، ފާއިތުވެގެން މިދާ ދިހައަހަރު ތެރޭގެ ހަވަނަ ބޮޑުވަޒީރުގެ ދައުރު ނިމުމަކަށް އައީއެވެ. އަންނަ ޖުލައިމަހުގެ ތެރޭގައި ހަތްވަނަ ބޮޑުވަޒީރު މަގާމާ ހަވާލުވެވަޑައިގަންނަވާނެ އެވެ.  

އަވަސް އަވަހަށް ބޮޑުވަޒީރުން ބަދަލުވެ، މި ބަދަލުތައް އައުމަށް މެދުވެރިވި ސަބަބުތަކުގެ ތެރޭގައި "ބްރެކްސިޓް" (ޔޫރަޕިއަން ޔޫނިއަނުން ވަކިވުން)، ސިޔާސީ ހިޔާލުތަފާތުވުންތައް، އިގްތިސޯދީ ހީނަރުކަން، ސިޔާސީ ހަމަނުޖެހުންތަކާއި ފަލީހަތްތައް، އަދި އާންމު އިންތިހާބުތައް ހިމެނެއެވެ.

މިއީ އިނގިރޭސިވިލާތުގެ ފަހުގެ ސިޔާސީ ތާރީހުގައި އެންމެ ބޮޑު ހަލަބޮލިކަމެއް ދެކުނު ދުވަސްވަރެވެ.

ޑޭވިޑް ކެމަރަން (2010–2016)

ބޮޑުވަޒީރުކަމުގެ ފަހު އަހަރަށް ޑޭވިޑް ކެމަރަން ކުރިމަތިލެއްވީ 2016 ވަނަ އަހަރެވެ. އޭނާގެ ވެރިކަން ކުއްލި ގޮތަކަށް ނިމުމަކަށް އައީ ޔޫރަޕިއަން ޔޫނިއަން (އީޔޫ) އިން ވަކިވުމަށް އިނގިރޭސި ރައްޔިތުން ނިންމި "ބްރެކްސިޓް" ރެފަރެންޑަމަށްފަހުއެވެ. އީޔޫގައި އިނގިރޭސިވިލާތް ދެމިއޮތުމަށް ކެމްޕޭން ކުރެއްވި ކެމަރަން، މި ނިންމުން ތަންފީޒުކުރުމަށްޓަކައި ގައުމަށް އައު ލީޑަރެއް ބޭނުންވާކަމަށް ވިދާޅުވެ މަގާމުން އިސްތިއުފާ ދެއްވިއެވެ.

ތެރޭސާ މޭ (2016–2019)

އީޔޫއިން އިނގިރޭސިވިލާތް ވަކިވުމުގެ އުނދަގޫ މަޝްވަރާތައް ކުރިއަށްގެންދިއުމުގެ ބުރަ ޒިންމާއާ ހަވާލުވެވަޑައިގަތީ ތެރޭސާ މޭ އެވެ. ބްރެކްސިޓްގެ އެއްބަސްވުމަށް ޕާލަމެންޓުގެ ރުހުން ހޯދުމަށް އެކަމަނާގެ ސަރުކާރުން ކުރި މަސައްކަތް ނާކާމިޔާބުވެ، ސިޔާސީ ގޮތުން ގައުމު ބޮޑު މަރުތަޅަކަށް ވެއްޓުނެވެ. ޕާލަމެންޓުގައި ތަކުރާރުކޮށް ކުރިމަތިވި ނާކާމިޔާބީތަކާއި، އަމިއްލަ ޕާޓީ ކޮންޒަވޭޓިވްގެ އެތެރެއިން ކުރިމަތިވި ފިއްތުންތަކާ ހުރެ 2019 ވަނަ އަހަރު ތެރޭސާ މަގާމުން އިސްތިއުފާ ދެއްވިއެވެ.

ބޮރިސް ޖޯންސަން (2019–2022)

ބޮރިސް ޖޯންސަން ވެރިކަމަށް ވަޑައިގަތީ ބްރެކްސިޓްގެ ކަންކަން އެއްކޮށް ނިންމާލުމުގެ ("Get Brexit Done") ވައުދާއެކުއެވެ. އޭނާގެ ވެރިކަމުގައި އިނގިރޭސިވިލާތް ރަސްމީކޮށް އީޔޫއިން ވަކިވިއެވެ. އަދި އޭގެ ފަހުން ކޮވިޑް-19 ގެ ބަލިމަޑުކަމާ ކުރިމަތިލިއެވެ. ނަމަވެސް، ލޮކްޑައުންގެ އުސޫލުތަކާ ހިލާފަށް ބޭއްވި ޕާޓީތަކާ ގުޅުންހުރި "ޕާޓީގޭޓް" ފަދަ އެތައް ސިޔާސީ ފަލީހަތްތަކެއްގެ ތެރެއަށް އޭނާގެ ސަރުކާރު ގެނބުނެވެ. ސަރުކާރުގެ ވަޒީރުން ތަކުރާރުކޮށް އިސްތިއުފާ ދެއްވަން ފެއްޓެވުމާއެކު، 2022 ވަނަ އަހަރު ޖޯންސަންއަށް މަގާމުން ވަކިވެވަޑައިގަތުމަށް މަޖުބޫރުވިއެވެ.

ލިޒް ޓްރަސް (2022)

ލިޒް ޓްރަސްއަކީ އިނގިރޭސި ތާރީޚުގައި އެންމެ ކުރު މުއްދަތަކަށް ބޮޑުވަޒީރުކަން ކުރެއްވި ބޭފުޅާއެވެ. އެކަމަނާ މަގާމުގައި ހުންނެވީ އެންމެ 49 ދުވަހުއެވެ. އެކަމަނާގެ ސަރުކާރުން އިއުލާންކުރި އިގުތިސޯދީ ސިޔާސަތުތަކުގެ ތެރޭގައި ހިމެނޭ، ބަޖެޓުން ދެކޮޅުނުޖެހޭ ޓެކްސް ކުޑަކުރުމުގެ "މިނީ ބަޖެޓު" ގެ ސަބަބުން މާލީ ބާޒާރުތަކަށް ބޮޑު ލޮޅުމެއް އަރައި، ސަރުކާރަށް އޮތް އިތުބާރު އެއްކޮށް ގެއްލުނެވެ. ޕާޓީގެ ތެރެއިން ކުރިމަތިވި ޕްރެޝަރުތަކާއެކު 2022 ވަނަ އަހަރުގެ އޮކްޓޫބަރު މަހު އެކަމަނާ އިސްތިއުފާ ދެއްވިއެވެ.

ރިޝީ ސުނަކް (2022–2024)

ލިޒް ޓްރަސްއަށްފަހު ވެރިކަމާ ހަވާލުވެވަޑައިގަތީ، އިގްތިސޯދީ ހަމަޖެހުން ގާއިމުކޮށް އަލުން އިތުބާރު ހޯދައިދޭނެ ކަމަށް ވައުދުވަމުން ރިޝީ ސުނަކް އެވެ. އޭނާގެ ސަރުކާރުން އިންފްލޭޝަން ކޮންޓްރޯލްކޮށް، މަސްތަކަކަށް ދެމިގެންދިޔަ ސިޔާސީ ހަލަބޮލިކަމަށްފަހު މަސްރަހު ފިނިކުރިއެވެ. ނަމަވެސް، ގާތްގަނޑަކަށް ދެ އަހަރު ދުވަހު ވެރިކަން ކުރެއްވުމަށްފަހު، 2024 ވަނަ އަހަރު ބޭއްވި އާންމު އިންތިޚާބުގައި ކޮންޒަވޭޓިވް ޕާޓީއަށް ކުރިމަތިވި ބޮޑު ނާކާމިޔާބީއާއެކު، އެ ޕާޓީގެ 14 އަހަރުވީ ވެރިކަން ނިމުމަކަށް އައެވެ.

ކިއާ ސްޓާމާ (2024–2026)

ލޭބަރ ޕާޓީގެ ލީޑަރު ކިއާ ސްޓާމާ ބޮޑުވަޒީރުކަމާ ހަވާލުވެވަޑައިގަތީ 2024 ޖުލައި މަހު ބޭއްވި އިންތިޚާބުގައި ހޯއްދެވި ބޮޑު ކާމިޔާބީއަށްފަހުއެވެ. އޭނާގެ ވެރިކަމާއެކު، ދިހަ އަހަރަށްވުރެ ގިނަ ދުވަހު އިދިކޮޅުގައި އޮތުމަށްފަހު ލޭބަރ ޕާޓީ އަލުން ވެރިކަމަށް އެނބުރި އައެވެ. ސްޓާމާ މަގާމާ ހަވާލުވެވަޑައިގަތީ ސަރުކާރަށް އޮތް އިތުބާރު އާލާކޮށް، އާންމު ޚިދުމަތްތައް ރަނގަޅުކޮށް، އިގްތިސޯދީ ކުރިއެރުން ހޯދައިދޭނެ ކަމަށް ވިދާޅުވަމުންނެވެ. އެހެންނަމަވެސް އޭނާގެ ވެރިކަމުގެ ދޮޅުއަހަރެއްހާ ދުވަސް ފާއިތުވިއިރު، ބައި-އިލެކްޝަންތަކާއި ލޯކަލް ކައުންސިލް އިންތިހާބުގެ ނަތީޖާތަކުން ކުރިމަތިވީ ނާކާމިޔާބެވެ. ސިޔާސީ އިސްވެރިންގެ މެދުގައި ވެސް ސްޓާމާގެ މަގުބޫލުކަން ކުޑަވިއެވެ. ސަރުކާރުގެ އިސް މަގާމުތަކުން ބައެއް ބޭފުޅުން އިސްތިއުފާ ދެއްވުމާއި ސްޓާމާގެ އިސްތިއުފާއަށް ގިނަބަޔަކު ގޮވަން ފެށުމުން އޭނާ އިސްތިއުފާ ދެއްވީއެވެ.

އަވަސް އަވަހަށް ބޮޑުވަޒީރުން ބަދަލުވީ ކީއްވެ؟

ބޮޑުވަޒީރުން މިހާ އަވަސް އަވަހަށް ބަދަލުވާން މެދުވެރިވި ބައެއް މުހިންމު ސަބަބުތައް އެބަހުއްޓެވެ. ބްރެކްސިޓްގެ ސަބަބުން ސިޔާސީ ގޮތުން ބޮޑެތި ބައިބައިވުންތަކެއް އުފެދުނެވެ. އަދި ޕާޓީތަކުގެ އެތެރޭގައި ބޭއްވުނު ލީޑަރޝިޕް އިންތިޚާބުތަކުގެ ސަބަބުން، އާންމު އިންތިހާބަކާ ނުލައިވެސް ބޮޑުވަޒީރުން ބަދަލުކުރުމުގެ ފުރުސަތު ލިބުނެވެ. މީގެ އިތުރުން އިގްތިސޯދީ ގޮންޖެހުންތަކާއި، ސިޔާސީ ފަލީހަތްތަކާއި، އަދި އިންތިޚާބުތަކުން ކުރިމަތިވި ނާކާމިޔާބީތަކަކީވެސް މި ބަދަލުތަކަށް މަގުފަހިވި ކަންކަމެވެ.

2016 ވަނަ އަހަރުގެ ކުރިން، މާގްރެޓް ތެޗާ، ޓޯނީ ބްލެއާ، އަދި ޑޭވިޑް ކެމަރަން ފަދަ ލީޑަރުން ވަނީ އެކަށޭނަ މުއްދަތެއްގައި ބޮޑުވަޒީރުކަން ކުރައްވާފައެވެ. ނަމަވެސް، ބްރެކްސިޓް ރެފަރެންޑަމަށްފަހު، އިނގިރޭސިވިލާތުގެ ވެރިކަމަށް އައިސްފައިވާ ގިނަގުނަ ބަދަލުތަކުން ރަމްޒުކޮށްދެނީ މިއީ ޔަގީންކަމެއް ނެތް، ބޮޑެތި ސިޔާސީ ބަދަލުތަކެއްގެ ދިހަ އަހަރު ކަމެވެ.

މި އަވަސް ބަދަލުވުންތަކުގެ ސިލްސިލާ ނިމުމަކަށް އައިސް، އިނގިރޭސި ސިޔާސީ މަސްރަހަށް ދާއިމީ ހަމަޖެހުމެއް އަންނާނީ ކޮންއިރަކުންތޯ އެއީ މިއަދު އުފެދޭ ސުވާލެކެވެ.