ރަސްމާލެއިން ހިއްކާ 1010 ހެކްޓަރުގެ ތެރެއިން 500 ހެކްޓަރު ދިނީ ޔޫއޭއީގެ އީގަލް ހިލްސްއަށެވެ. ބިދޭސީ މަހުޖަނުންނަށް ދާއިމަށް ދިރިއުޅެވޭ ގޮތަށް ހަދާ "މޯލްޑިވްސް ވޯޓާ ފްރަންޓު އެންޑް މެރީނާ" އެޕާޓްމަންޓްތައް ވިއްކުމުގެ މަސައްކަތް މިހާރު އެ ކުންފުނިން ވަނީ ފަށާފައެވެ.

އަދާލަތު ޕާޓީގެ ތަރުޖަމާނު، ހުސައިން އަންސާރު ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ ރަސްމާލެ މަޝްރޫއު އާއި ރެޒިޑެންސީ ވިސާ އަދި، ޓައުންޝިޕް ޕްރޮގްރާމާ ގުޅޭގޮތުން ސާފުކުރަންޖެހޭ މައުލޫމާތުތައް ސާފުކުރަމުންދާ ކަމަށެވެ.

"މި ކަންކަމާ ގުޅޭ ސައްހަ މައުލޫމާތު ސަރުކާރުގެ ފަރާތުން ހޯދުމަށްފަހު، ކަންބޮޑުވުންތަކެއް ހުރިނަމަ، އެކަންށީގެންވާ ހައްލު ހޯދުމަށްޓަކައި ކަމާގުޅުންހުރި މުއައްސަސާތަކަށް އެ ކަންކަން ހުށަހަޅާނެކަމުގެ ޔަގީންކަން ވެސް އަރުވަމެވެ،" އަންސާރު އެކްސްގައި ކުރެއްވި ޕޯސްޓުގައި ވިދާޅުވިއެވެ.

ސަރުކާރުން ތައާރަފު ކޮށްފައިވާ "މޯލްޑިވްސް ޕާރލް ރެސިޑެންސީ" ޕްރޮގްރާމާ ގުޅޭ މައުލޫމާތު ސާފުކުރުމަށް ޢަދާލަތު ޕާޓީގެ ފަރާތުން، މި މަހު 27 ގައި ވަނީ އިކޮނޮމިކް މިނިސްޓަރު މުޙައްމަދު ސައީދުއާ ވެސް ބައްދަލުކޮށްފައެވެ. 

ރަސްމާލޭ މަޝްރޫއާ ގުޅޭގޮތުން ސަލަފް ޖަމިއްޔާގެ ތަރުޖަމާނު، ހަސަން ފިކުރީ އެކްސްގައި ކުރެއްވި ޕޯސްޓެއްގައި ވިދާޅުވީ އެ މަޝްރޫއާމެދު ކަންބޮޑުވުންތަކެއް ހުރިތޯ ބެލުމަށް ދިރާސާ ކުރަމުންދާ ކަމަށެވެ.

"ސަރުކާރުން ރަސްމާލޭގައި ހިންގުމަށް އިއުލާނުކޮށްފައިވާ މޯލްޑިވްސް ވޯޓާ ފްރަންޓު އެންޑް މެރީނާ މަޝްރޫއުއާމެދު ކަންބޮޑުވުންތަކެއް ހުރިކަމަށް ފެންނާތީ ޖަމިއްޔަތުއްސަލަފުން ސަރުކާރުގެ ކަމާބެހޭ ފަރާތްތަކާ ބައްދަލުކޮށްގެންނާއި އެހެނިހެން ގޮތްގޮތުން މައުލޫމާތު ސާފުކޮށް މަޝްރޫއު ދިރާސާ ކުރަމުންދާ ވާހަކަ ރައްޔިތުންގެ މައުލޫމާތަށްޓަކައި ދަންނަވަމެވެ،" ފިކުރީ ކުރެއްވި ޕޯސްޓުގައި ލިޔުއްވާފައިވެއެވެ.

އީގަލް ހިލްސްއަށް ރަސްމާލެ ދޭން ސިއްރު އެގްރިމެންޓެއްގައި ސޮއި ކުރީ ސެޕްޓެމްބަރު 21 ވަނަ ދުވަހެވެ. އެ އެގްރިމެންޓު ހާމަނުކޮށް ސަރުކާރުން ބުނަމުން އައީ ރަސްމާލެ ދިނީ 99 އަހަރަށް ކަމަށެވެ. އެތަން ދިނީ، ލީސް އެކުއިޒިޝަން ކޮސްޓެއް އަދި ކުއްޔެއް ވެސް ނުނަގާ ގޮތަށް މުޅިން ހިލެއެވެ.

މި މައްސަލައިގައި ސަރުކާރަށް އިންތިހާއަށް ފާޑުކިޔުން އަމާޒުވި ނަމަވެސް ސަރުކާރުން މަސައްކަތް ކުރަމުން އަންނަނީ މިއީ ރަނގަޅު މުއާމަލާތެއް ކަމުގައި ދައްކާށެވެ. އެ ގޮތުން މިއީ އާންމު އުސޫލުން ރިސޯޓުތައް ދޭ ގޮތަށް ދީފައިވާ ތަނެއް ކަމަށާއި މި އިންވެސްޓުމަންޓުން ރާއްޖެ ނުދެކޭ ވަރުގެ އާމްދަނީ ވަންނާނެ ކަމަށް އަންނަނީ ބުނަމުންނެވެ.

ސަރުކާރުން މިހެން ބުންޏަސް، ފާޑުކިޔާ މީހުންނަނީ އެ މުއާމަލާތާ ގުޅޭގޮތުން އެކި އެކި ސުވާލު އުފައްދަމުންނެވެ. އެތަނުގައި ޔަހޫދީން ވަޒަންވެރި ކުރުމުގެ ޕްލޭނެއް އޮތް ކަމަށް ބުނެވެސް ބައެއް ފަރާތްތަކުން ވާހަކަ ދައްކައެވެ.

އަދި އެ މުއާމަލާތް ހިންގާފައިވަނީ ގާނޫނުއަސާސީގެ 250 ވަނަ މާއްދާއާ ހިލާފަށް ކަމަށް ބުނެ، އެ މައްސަލަ އިއްޔެ ވަނީ ސުޕްރީމް ކޯޓަށްވެސް ހުށަހަޅާފައެވެ.