ސަރުކާރުން ފުށިދިއްގަރު ފަޅުގައި ހިއްކާ 1010 ހެކްޓަރުގެ ތެރެއިން 500 ހެކްޓަރު 99 އަހަރަށް ޔޫއޭއީގެ އީގަލް ހިލްސްއަށް ދިނުމާ ގުޅޭގޮތުން ސެޕްޓެމްބަރު 21 ގައި ވަނީ އެއްބަސްވުމެއްގައި ސޮއިކޮށްފަ އެވެ.

"މޯލްޑިވްސް ވޯޓާ ފްރަންޓު އެންޑް މެރީނާ" ނަމުގައި ހިންގާ އެ މަޝްރޫއާ ގުޅޭގޮތުން އެކި ފަރާތްތަކުން އެކިގޮތަށް އެކަން ސިފަކޮށް ކަންބޮޑުވުން ފާޅުކުރަމުން އަންނައިރު، ކުރީގެ ރައީސް އަބްދުﷲ ޔާމީން ގެންދަވަނީ ތަކުރާރުކޮށް އެ މަޝްރޫއަށް ފާޑުވިދާޅުވަމުންނެވެ.

މީގެ ކުރިން ޔާމީން ވިދާޅުވެފައިވަނީ ރަސްމާލެ އީގަލް ހިލްސްއަށް ދިނުމަކީ، ރައީސް މުއިއްޒާއި ސަރުކާރުގެ މުޅި ކެބިނެޓު ވެސް ޖަވާބުދާރީވާންޖެހޭނެ ކަމެއް ކަމަށާއި ހާއްސަކޮށް މިނިސްޓަރު މުއްތޮލިބާއި ބަންޑާރަނައިބު އުޝާމް އެކަމަށް ޖަވާބުދާރީވާންޖެހޭނެ ކަމަށެވެ.

ޔާމީންގެ އެވާހަކައަށް ރައްދު ދެއްވައި ބަންޑާރަނައިބް ވިފދާޅުވެފައިވަނީ "ރަސްމާލެ މަޝްރޫއު ކުރިއަށް ގެންދިއުމުގައި ގާނޫނާ ހިލާފު އެއްވެސް ކަމެއް ނުކުރާނެ" ކަމަށެވެ. އަދި އެ މަޝްރޫއު ކުރިއަށް ގެންދާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށެވެ.

ޕީއެންއެފް އިން ރޭ ބޭއްވި ޖަލްސާގައި ވާހަކަދައްކަމުން ޔާމީން ވިދާޅުވީ މިހާރު ހުރި ގާނޫނުތަކުން މި މަޝްރޫއު ހިންގަން އަދި ބޭރު ކުންފުންޏަށް ދޭންޖެހޭ ރައްކާތެރިކަން ނުދެވޭކަން އުޝާމް ގަބޫލުކުރައްވާ ކަމަށާއި ނަމަވެސް ގާނޫނަކުން އެ ރައްކާތެރިކަން ދިނުމުގެ ބޭނުމެއް ނެތް ކަމަށެވެ.

ރައީސް ޔާމީން ވިދާޅުވީ މި މަޝްރޫއު ގެންނަން ބޭނުންވާ ސަބަބު ސަރުކާރުން ރައްޔިތުންނަށް ކިޔައިދޭންޖެހޭ ކަމަށާއި މި މަޝްރޫއު ގެންނަންޖެހޭ ސަބަބެއް ނެތް ކަމަށެވެ. މި މަޝްރޫއުގައި ސަރުކާރުގެ މަތިފަޑީގައި ތިބި ބަޔަކު ރިޝްވަތަށް ފައިސާ ނެގުން ފިޔަވައި އެހެން އެއްވެސް ކަމެއް މި މަޝްރޫއުގައި ނެތް ކަމަށްވެސް ޔާމީން ވިދާޅުވިއެވެ.

ޔާމީން ވިދާޅުވީ، އެންމެ ބޮޑު އުނދަގުލެއް ވަނީ ދިވެހި ރައްޔިތުން އާބާދުކުރަން އޮތް ބިމެއް ޔަހޫދީންގެ އަތްމައްޗަށް ދޫކޮށްލާތީ ކަމަށާއި ޔަހޫދީންނާއި ދިވެހިން އެކީގައި 'ކޯ-ހެބިޓް' ކުރުވާތީ (އެކުގައި ދިރިއުޅޭ ގޮތް ހަދާތީ) ކަމަށެވެ.

ޔާމީން ސިފަކުރެއްވި ގޮތުގައި އީގަލް ހިލްސްއަކީ "ކަރުދާސް ކުންފުންޏެކެވެ. އެއީ ޒިންމާ އުފުލާނެ ބައެއް ނޫންކަމަށާއި އެ ކުންފުންޏަކީ ނޭދެވޭ ވިޔާނުދާ ކަންތައްތަކެއް ކުރުމަށް އުފައްދާފައިވާ ތަނެއް ކަމަށްވެސް އެމަނިކުފާނު ވިދާޅުވިއެވެ. އަދި މިއީ އަވަސް އަރުވާލައިގެން، ޔަހޫދީންނަށް ފައިސާ ނަގައިދިނުމަށާއި ބޭނުންވާ މިންވަރަށް ފައިސާ ދިނުމަށްޓަކައި ރާއްޖެ ވިއްކާލުން ފަދަ ކަމެއް ކަމަށްވެސް ޔާމީން ވިދާޅުވިއެވެ.

ރަސްމާލެ މަޝްރޫއުގެ ދަށުން ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ވެފައިވާ ވިޔަފާރި އެއްބަސްވުމަކީ ގާނޫނުއަސާސީއާ ޚިލާފު އެއްބަސްވުމެއް ކަމަށް ކަނޑައަޅައި، އެ އެއްބަސްވުން ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ވެސް، ސެޕްޓެމްބަރު 28 ގައި ވަނީ ހުށަހަޅާފައެވެ.