ރަސްމާލޭގައި ހިންގުމަށް ރާވާފައިވާ ބޮޑު މަޝްރޫއު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށާއި، ރާއްޖޭގެ ގާނޫނުއަސާސީއާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމަށް ބަންޑާރަނައިބު އަހުމަދު އުޝާމް ވިދާޅުވެއްޖެ އެވެ.

މި ސަރުކާރުން ފުށިދިއްގަރު ފަޅުގައި ހިއްކާ 1010 ހެކްޓަރުގެ ތެރެއިން 500 ހެކްޓަރު 99 އަހަރަށް ޔޫއޭއީގެ އީގަލް ހިލްސްއަށް ދިނުމާ ގުޅޭގޮތުން ސެޕްޓެމްބަރު 21 ގައި ވަނީ އެއްބަސްވުމެއްގައި ސޮއިކޮށްފަ އެވެ.

"މޯލްޑިވްސް ވޯޓާ ފްރަންޓު އެންޑް މެރީނާ" ނަމުގައި ހިންގާ އެ މަޝްރޫއާ ގުޅޭގޮތުން އެކި ފަރާތްތަކުން އެކިގޮތަށް އެކަން ސިފަކޮށް ކަންބޮޑުވުން ފާޅުކުރަމުން އަންނައިރު، ކުރީގެ ރައީސް އަބްދުﷲ ޔާމީން ވަނީ އެ މަޝްރޫއަށް ވަރަށް ބޮޑަށް ފާޑުވިދާޅުވެފައެވެ.

އެގޮތުން ޕީއެންއެފުން ބޭއްވި ޓައުން ހޯލް ޖަލްސާގައި ރަސްމާލެ 99 އަހަރަށް ބޭރުގެ ބަޔަކަށް ދިނުމާ ދެކޮޅަށް ވާހަކަ ދައްކަވަމުން ޔާމީން ވިދާޅުވީ، އެކަމަކީ ރައީސް މުއިއްޒާއި ސަރުކާރުގެ މުޅި ކެބިނެޓު ވެސް ޖަވާބުދާރީވާންޖެހޭނެ ކަމެއް ކަމަށެވެ. ހާއްސަކޮށް މިނިސްޓަރު މުއްތޮލިބާއި ބަންޑާރަނައިބު އުޝާމް އެކަމަށް ޖަވާބުދާރީވާންޖެހޭނެކަން ފާހަގަކުރެއްވި އެވެ.

"ހަގީގަތުގައި ރައީސް މުއިއްޒު ބުނިގޮތަކަށް ބުނިކަމެއް ކޮށްދޭން ތިބި އިސް ވަޒީރުންގެ ތެރޭގައި އެންމެ ގާތް ދެމީހުންނަކީ ތި ކިޔާ ދެމީހުން. އެއީ މިނިސްޓަރު މުއްތޮލިބަކީ އެކަކު. އަނެކަކަކީ [ބަންޑާރަ ނައިބު] އުޝާމް. މިކަމުގައި މި މީހުންނާ ގާނޫނު އަރާ ހަމަކުރާނެ ﷲ އިރާދަކުރެއްވިއްޔާ މި ވެރިކަން ނިމުނީމަ އިނގޭތޯ. އިންޝާﷲ. އޭގައި ހަމަ މުއިއްޒާއި އެއްވަރަށް ބައިވެރިވާ ކުށްވެރިން މި މީހުންނަކީ،" ޔާމީން ވިދާޅުވި އެވެ.

ޔާމީންގެ އެވާހަކަތަކަށް ރައްދު ދެއްވައި އުޝާމް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައި ވަނީ ރައީސް ޔާމީންގެ ވެރިކަމުގައިކަން އެމަނިކުފާނު މިއަދު ހަނދުމަފުޅުނެތީ ކަމަށް ވެދާނެ ކަމަށެވެ.

އުޝާމް ވިދާޅުވީ ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ގާނޫނެއް އެކުލަވާލެވުނީ 1999 ވަނަ އަހަރު ކަމަށާއި އޭރު ގާނޫނުގެ ދަށުން ޓޫރިސްޓް ރިޒޯޓުތައް ކުއްޔަށް ދެމުން އައިސްފައިވަނީ ގިނަވެގެން 25 އަހަރު ދުވަހުގެ މުއްދަތަށް ކަމަށެވެ. އަދި ގާނޫނަށް ގެނެވުނު އިސްލާހަކުން އެ މުއްދަތު 50 އަހަރަށް އިތުރުކޮށްފައި ވަނީ 2010 ވަނަ އަހަރު ރައީސް ނަޝީދުގެ ވެރިކަމުގައި ކަމަށް ވިދާޅުވިއެވެ. އެއަށްފަހު މި މުއްދަތު 99 އަހަރަށް އިތުރުކޮށްފައި ވަނީ 2015 ވަނަ އަހަރު ރައީސް ޔާމީންގެ ވެރިކަމުގައި ކަމަށް އޭނާ ވިދާޅުވިއެވެ.

މީގެ އިތުރުން ޓޫރިޒަމާބެހޭ ގާނޫނުގެ އަށް ވަނަ މާއްދާގައި ބަޔާންކޮށްފައިވާ ގޮތުން ޓޫރިސްޓް ރިޒޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެ ރަށެއްގައި ކޮށްފައިވާ އިންވެސްޓްމަންޓެއްގެ އަގުން ބޮލަކަށް ކެނޑުމަށްފަހު ޖެހޭ އަގު އިންވެސްޓްކޮށްފައިވާ ފަރާތަށް ސަރުކާރުން ދައްކަން ޖެހޭ ކަމަށް އުޝާމް ވިދާޅުވިއެވެ.

ނަމަވެސް މިއާ ޚިލާފަށް ރަސްމާލޭގައި ހިންގުމަށް ރާވާފައިވާ މަޝްރޫއު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށް އުޝާމް ވިދާޅުވިއެވެ. އަދި މި މަޝްރޫއާ ގުޅިގެން މިހާތަނަށް ސޮއިކޮށްފައި ވަނީ ހަަމައެކަނި ލެޓާ އޮފް އިންޓެންޓް (ކޮމާޝަލް ޓާމްސް އެގްރީމެންޓް) އެއްގައި ކަމަށް ވެސް އޭނާ ވިދާޅުވިއެވެ.

ހަމައެއާއެކު މަޝްރޫއު ފެށުމުގެ ކުރިން މި އެގްރީމަންޓްގައިވާ މާއްދާތަކުގެ މައްޗަށް ބިނާކޮށް އިތުރަށް މަޝްވަރާކޮށްގެން އެކުލަވާލާ ޑެފިނިޓިވް އެގްރީމަންޓްތަކެއްގައި ސޮއިކުރުމުގެ އިތުރުން މިކަމާ ގުޅުންހުރި ގާނޫނުތައް މަޖިލީހުން ފާސްކުރަން ޖެހޭނެ ކަމަށް އުޝާމް ވިދާޅުވިއެވެ. އަދި މި މަޝްރޫއު ކުރިއަށް ގެންދިއުމުގައި ދިވެހިރާއްޖޭގެ ގާނޫނުއަސާސީއާއި ގާނޫނުތަކާ ޚިލާފު އެއްވެސް ކަމެއް ސަރުކާރުން ނުކުރާނެ ކަމުގެ ޔަގީންކަން އުޝާމް ވަނީ ދެއްވާފައެވެ.

އުޝާމް އެފަދައިން ވިދާޅުވިއިރު ރަސްމާލެ މަޝްރޫއުގެ ދަށުން ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ވެފައިވާ ވިޔަފާރި އެއްބަސްވުމަކީ ގާނޫނުއަސާސީއާ ޚިލާފު އެއްބަސްވުމެއް ކަމަށް ކަނޑައަޅައި، އެ އެއްބަސްވުން ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ވެސް އިއްޔެ ވަނީ ހުށަހަޅާފައެވެ.