މި ސަރުކާރުން ފުށިދިއްގަރު ފަޅުގައި ހިއްކާ 1010 ހެކްޓަރުގެ ތެރެއިން 500 ހެކްޓަރު 99 އަހަރަށް ޔޫއޭއީގެ އީގަލް ހިލްސްއަށް ދިނުމާ ގުޅޭގޮތުން ސެޕްޓެމްބަރު 21 ގައި ވަނީ އެއްބަސްވުމެއްގައި ސޮއިކޮށްފަ އެވެ.

"މޯލްޑިވްސް ވޯޓާ ފްރަންޓު އެންޑް މެރީނާ" ނަމުގައި ހިންގާ އެ މަޝްރޫއާ ގުޅޭގޮތުން އެކި ފަރާތްތަކުން އެކިގޮތަށް އެކަން ސިފަކޮށް ކަންބޮޑުވުން ފާޅުކުރަމުން އަންނައިރު، މެންބަރު އައްބާސް ވަނީ ސޯޝަލްމީޑިއާގައި އެ މަޝްރޫއާ ދެކޮޅަށް ވަރަށް ބޮޑަށް ފާޑުވިދާޅުވެފައެވެ.

މިއަދު ހެނދުނު އެކްސްގައި ކުރެއްވި ޕޯސްޓެއްގައި އައްބާސް ވިދާޅުވީ، ރަސްމާލޭގައި އެ އަޅަނީ 900 އަހަރުވަންދެން ދިވެހިރާއްޖޭގައި އޮތް  އިސްލާމީ އެއްބައިވަންތަކަން "ފުނޑާލުމުގެ ބިންގާ" ކަމަށެވެ.

އޭނާ ވިދާޅުވީ ރަސްމާލޭގައި އެހެން ދީންތަކުގެ މީހުން އާބާދުވުމާއެކު ހިންދޫ ފައްޅިތަކާއި، ޔަހޫދީ ފައްޅިތަކުގެ އިތުރުން ކްރިސްޓިއަން ފައްޅިތައް އެޅިގެންދާނެ ކަމަށާއި، އެފަދަ ފަރާތްތަކުގެ ސްކޫލުތައް ވެސް އެތަނުގައި ބިނާކުރާނެ ކަމަށެވެ.

އައްބާސް ވިދާޅުވީ މި މަޝްރޫއު ދިފާއުކުރާ ފަރާތްތަކުން އެކަމުގެ ޒިންމާ އުފުލަން ޖެހޭނެ ކަމަށާއި، އެމީހުން މާތްﷲ ގެ ޙަޟުރަތުގައި ޖަވާބުދާރީވާން ޖެހޭނެ ކަމަށެވެ. ސިޔާސީ ވިސްނުން އިސްކޮށް ދުނިޔެވީ އެދުމާއި ފައިސާގެ ދަހިވެތިކަމުގައި ގައުމުގެ މުސްތަގުބަލު ވިއްކާނުލުމަށާއި، ވިސްނާނުލައި މިއަދު ކުރާ ކަމަކުން ގައުމުގެ މުސްތަގުބަލް ވެއްޔާ މޮޑެވިގެންދާން ބޭނުން ނުވާނެ ކަމަށްވެސް އޭނާ ވިދާޅުވެފައި ވެއެވެ.

މީގެއިތުރުން، ފަލަސްތީނުގެ ރައްޔިތުން މިއަދު ތަހައްމަލު ކުރަމުންދާ ވޭނާއި ހިތްދަތި ހާލަތާމެދު ވިސްނާލުން ބުއްދިވެރިވާނެ ކަމަށް ފާހަގަކުރައްވަމުން އައްބާސް ވިދާޅުވީ، ޔަހޫދީންގެ ވިސްނުމާއި ފިކުރު ގަބޫލުކުރާ އަދި އެމީހުންނަށް ފަންޑުކުރާ ބަޔަކުކަން އެނގިތިބެ، އެފަދަ ފަރާތްތަކަށް ދިވެހި ބިމުން ދިރިއުޅެން ޖާގަ ދީގެން ނުވާނެ ކަމަށެވެ.

އަދި އިސްލާމީ އުންމަތް ބައިބައިކޮށް ފިތުނަވެރިކުރުމުގެ ކަންކަން ހިންގަނީ ޔަހޫދީން އަޑީގައި ތިބެ، އެމީހުންގެ ފަންޑާއެކު އަރަބިން ބޭނުންކޮށްގެން ކަމަށްވެސް އައްބާސް ވަނީ ވިދާޅުވެފައެވެ.