އެމަނިކުފާނުގެ މައްޗަށް މިއަދު ބާއްވާ އަޑުއެހުމަކީ އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީ ލޯންޑާ ކުރެއްވި ކަމަށް ތުހުމަތުކުރާ މައްސަލައިގައި، ކުރީގެ މަޖިލިސް މެންބަރު ޔޫސުފް ނައީމާއެކު ކުރިއަށްދާ ޝަރީއަތުގެ ކުރިން ހުށަހަޅާ ހުށަހެޅުންތަކާ ގުޅޭގޮތުން ވާހަކަދެއްކުމަށް ތާވަލުކުރި އަޑުއެހުމެއް ކަމަށް ވާއިރު، މީގެ ކުރިން އެ މައްސަލަ ކްރިމިނަލް ކޯޓުން މަޑުޖައްސާލާފައި ވަނީ، އެ މައްސަލަ އަލުން ބަލާއިރު ދައުލަތުން ހުށަހެޅި އާ ހެކިތަކެއް ބަލައިނުގަތުމަށް ހައި ކޯޓުން ކުރި ހުކުމުގެ ބައި ދައުލަތުން ސުޕްރީމް ކޯޓުގައި އިސްތިއުނާފު ކުރުމުން ކަން ފާހަގަކޮށްލެވެއެވެ.

އެހެން ނަމަވެސް، ހައި ކޯޓުން ނިންމި ގޮތަށް އެ ހެކިތައް ބަލައިނުގަނެވޭނެ ކަމަށް ސުޕްރީމް ކޯޓުން މިދިޔަ ޖުލައި މަހު ހުކުމްކޮށްފައި ވާއިރު، އެ ހެކިތަކުގެ ތެރޭގައި ޔާމީންގެ ދިފާއީ ހެކިވެރިއެއް ކަމަށްވާ އަހުމަދު ނަރީޝްގެ އެމްއެންޑީއެފް ހާޒިރީއާއި، އިކޮނޮމިކް ޔޫތު ކައުންސިލްގެ ޖަލްސާތަކެއްގެ ޔައުމިއްޔާ ހިމެނެއެވެ.

އޭގެ އިތުރުން ރ. ފުއްގިރި ކުއްޔަށް ދިން މައްސަލައިގައި ދައުލަތުން ޔާމީންގެ މައްޗަށް އުފުލައިފައިވާ ރިޝްވަތުގެ ކުށާއި މަނީ ލޯންޑަރިންގެ ކުށުގެ ދައުވާތަކާ ގުޅިގެން ކްރިމިނަލް ކޯޓުގައި ތާވަލުކުރި އަޑުއެހުން ވަނީ ދައުލަތުގެ ވަކީލުން ބަލިވުމުން، ކެންސަލްކޮށްފައި ކަން ވެސް ފާހަގަކޮށްލެވެއެވެ.

މިއަދުގެ މަޖިލީހުގައި، ދައުލަތުން ހުށަހެޅުންތައް ހުށަހެޅުން ކުރިއަށް ގެންގޮސްފައި ވާއިރު، ރައީސް ޔާމީންގެ ފަރާތުން ހުށަހަޅާފައިވާ ބައެއް ހެކިންގެ ހެކި ބަސް ބަލައި ނުގަތުމަށް ހުށަހަޅާފައި ވެއެވެ. އެގޮތުން، ނަރީޝް، މުހައްމަދު އިސްމާއިލް، އަދި ޝާހިދުގެ ހެކި ބަސް ބަލައި ނުގަތުމަށް ވަނީ އެދިފައެވެ.

ރައީސް ޔާމީންއާ އާރަށުގެ މައްސަލައިގައި އެމަނިކުފާނުގެ އެކައުންޓަށް ޖަމާވެފައިވާ ފައިސާއާ ގުޅިގެން ސުވާލުކުރުމުން އެމަނިކުފާނު ހިޔާރު ކުރެއްވީ ހަނު ހުރުން ކަމަށާ، ޝަރިއަތުގެ މަރުހަލާގައި އެމަނިކުފާނު ވަނީ އެއީ ޑޮލަރު މާރު ކުރުމުގެ މުއާމަލާތެއް ކަމަށް ވިދާޅުވެ ހެކި ހުށަހަޅާފައި ކަމަށް ވެސް ދައުލަތުން ފާހަގަކުރެއެވެ.

އެއީ އެފަދައިން ލިބިފައި ހުރި ފައިސާ ނަމަ އެކަން ތަހުގީގު މަރުހަލާގައި ހާމަކުރަން ޖެހޭނެ ކަމަށާ އެއީ ގާނޫނާ ހިލާފުކަމެއް ކަމަށް ދައުލަތުން ބުނެއެވެ. އަދި ރައީސް ޔާމީންގެ ފަރާތްޕުޅުން 4 ކަމެއް އެކްސްކްލޫޝަނަށް މިއަދު ހުށަހަޅާފައި ވާއިރު، އާރަށާ ގުޅުން ހުރި ލިޔުންތަކެއް ހުރި ނަމަ އެ ލިޔުންތައް ދިފާއުއަށް ލިބޭނެ ގޮތް ހެދުމަށް އަމުރެއް ނެރެދިނުމަށް ރައީސް ޔާމީންގެ ފަރާތްޕުޅުން އެދިފައިވެއެވެ.

ޑަބަލް ޖެކެޑީއަށް ވާނެ ހެން ދައުލަތުން މައްސަލަ ހުށަހަޅާފައިވާ ކަމަށް ރައީސް ޔާމީންގެ ފަރާތުން ފާހަގަކޮށް، އަދީބުއާ ޒިޔަތުގެ ހެކި އެއް ފަރާތްކުރަން ވެސް ރައީސް ޔާމީންގެ ފަރާތްޕުޅުން މިއަދު ހުށަހަޅާފައިވެއެވެ.

އެހެން ނަމަވެސް ދައުލަތުން ބުނެފައިވަނީ އެމީހުންގެ ހެކި ބަލައި ނުގަނެވޭނެ ސަބަބެއް ނެތް ކަމަށާ، އަދީބުއާ ޒިޔަތުގެ ހެއްކަށް ކޮލަބޮރޭޓު ކޮށްދޭނެ ބައިވަރު ހެކިތައް ހުށަހަޅާފައިވާނެ ކަމަށެވެ. އަދި އަދީބުއާ ޒިޔަތުގެ އަދާވާތްތެރިކަމެއް ރައީސް ޔާމީންއާ މެދު އޮތް ކަމަކަށް ނުފެންނަ ކަމަށާ، ހަމައެކަނި އަނގަ ބަހުން ބުނާ ބުނުމަކަށް އެކަން ސާބިތު ނުވާނެ ކަމަށްވެސް ދައުލަތުން ބުންޏެވެ.

ސަބް އިންސްޕެކްޓަރ އޮފް ޕޮލިސް ޝިފާޒުގެ ތަހުލީލީ ރިޕޯޓު ބަލައިނުގަތުމަށް ރައީސް ޔާމީންގެ ފަރާތުން އެދިފައިވާ ވުން ބަލައިނުގަތުމަށް ވެސް ދައުލަތުން މިއަދު އެދިފައި ވާއިރު، ޗީފު އިންސްޕެކްޓަރ ޒުހެއިރު ބަލައި ނުގަތުމަށް ރައީސް ޔާމީންގެ ފަރާތުން ހުށަހަޅާފައިވާ ހުށަހެޅުން ބަލައިނުގަތުމަށް ވެސް ދައުލަތުން މއަދު ވަނީ އެދިފައެވެ.