ރައީސް ޔާމީން، ޕީއެންއެފް އިން ބޭއްވި ޖަލްސާއެއްގައި.--
ރަސްމާލެ ޑީލަކީ ދިވެހި ރައްޔިތުންގެ މުސްތަގުބަލު ވިއްކާލުން ކަމަށް ޔާމީން ވިދާޅުވެއްޖެ
ރަސްމާލެ އެއްބަސްވުމަކީ ގާނޫނާ ހިލާފު އެއްބަސްވުމަކަށްވާތީ އެ އެފޯޑް ކުރާކަށް ދެން އަންނަ ސަރުކާރަކަށް، އެއްގޮތަކަށްވެސް ނުޖެހޭނެ: ރައީސް ޔާމީން
ހިޝާމް ހާރޫން 25 ސެޕްޓެމްބަރ 2026 (ހުކުރު) 14:53
ރަސްމާލެ ވޯޓާފްރަންޓް އެންޑް މެރީނާ މަޝްރޫއު ހިންގަން ޔޫއޭއީގެ އީގަލް ހިލްސް ކުންފުންޏަށް 500 ހެކްޓަރުގެ ބިން ދިނުމަކީ ދިވެހީންގެ މުސަގުބަލުން ކުރާ ވައްކަމެއް ކަމަށާއި އެއީ ދެން އަންނަ ސަރުކާރަކުން ބާތިލުކުރަން ޖެހޭ އެއްބަސްވުމެއް ކަމަށް ކުރީގެ ރައީސް، އަބްދުﷲ ޔާމީން ވިދާޅުވެއްޖެއެވެ.
ރޭ ބޭއްވި ޕީއެންއެފް ޓައުންހޯލް ޖަލްސާގައި ވާހަކަދައްކަވަމުން ޔާމީން ވިދާޅުވީ ރަސްމާލޭގެ ދެބައިކުޅައެއްބައި އީގަލް ހިލްސް ކުންފުންޏަށް ދޭން ނިންމާފައި އޮތީ 99 އަހަރަށް ކަމަށެވެ. އަދި، އެ މީހުންނާއެކު ވެފައި އޮތް އެއްބަސްވުމުގައި އޮތީ، އެ ތަނުގެ މުއްދަތު އިތުރުކުރެވޭ ގޮތަށް ކަމަށާއި އެއީ ރާއްޖޭގެ އެއްވެސް ގާނޫނަކުން ހުއްދަކުރާ ކަމެއް ނޫންކަމަށް ޔާމީން ވިދާޅުވި އެވެ.
"މިހާރު މި ވިއްކާލަނީ ރައްޔިތުންގެ "ފިއުޗާ" ދެއްތޯ..؟ މުސްތަގުބަލް. މީކީ އެއްވެސް ސަރުކާރަކަށް މީކީ އެއްވެސް ގާނޫނަކުން ލިބިދީގައިވާ މެންޑޭޓެއް ނޫން. ރާއްޖޭން ބޭރުގައި ވެސް ދުނިޔޭގެ އެއްވެސް ތާކު ވެސް، ރާއްޖޭގެ ގާނޫނުތަކުގައި ވެސް އިނގޭތޯ.. އެހެންވީމަ އަސްލުގަ އަޅުގަނޑުމެންގެ މުސްތަގުބަލުން މިކުރަނީ ވައްކަން. އެހެންވީމަ އެއީ ގާނޫނާ ޚިލާފު އެއްބަސްވުމަކަށްވާތީ އެ އެފޯޑް ކުރާކަށް ދެން އަންނަ ސަރުކާރަކަށް، އެއްގޮތަކަށް ވެސް ނުޖެހޭނެ އިނގޭތޯ" ރައީސް ޔާމީން ވިދާޅުވިއެވެ.
އަދި މިއީ އެއްވެސް ސަރުކާރަކަށް ގާނޫނަކުން ލިބިދީފައިވާ މެންޑޭޓެއް ނޫން ކަމަށާއި ދުނިޔޭގެ އެއްވެސް ގައުމެއްގެ އަދި ރާއްޖޭގެ ގާނޫނުތަކުގައި ވެސް ހުއްދަކުރާ ކަމެއް ނޫން ކަމަށް އެމަނިކުފާނު ފާހަގަކުރެއްވިއެވެ.
ޔޫއޭއީގެ މި ކުންފުންޏަށް ވެސް އެނގެންވާނެ އިނގޭތޯ؟ މި މީހުންނަށް ވެސް އެނގެންވާނެ އަޅުގަނޑުމެންގެ މުސްތަގުބަލެއް ތިގޮތަށް ވިއްކާ ނުލެވޭނެކަން އެ ވިއްކާލަނީ މި މީހުންގެ ގައުމުގައި ވެސް ހުއްދަ ނުކުރާ ކަންކަން އެހެންވީމާ އެއަކަށް އޮނާއެއް ނުކުރާނެ އިހުތިރާމެއް ނުކުރާނެ އިނގޭތޯ! - ރައީސް ޔާމީން
ރަސްމާލޭގެ ބިމުން ބައެއް އީގަލް ހިލްސް ކުންފުންޏަށް ދެނީ ލީސް އެކުއިޒިޝަން ކޮސްޓު (ބިން ހޯދުމުގެ އަގު) ނުނަގާ، 99 އަހަރުގެ މުއްދަތުގެ ތެރޭގައި އެއްވެސް ކުއްޔެއް ނުނަގާ ގޮތަށް ކަމަށް ހައުސިން މިނިސްޓަރު އަބްދުالله މުއްތަލިބު ވަނީ ވިދާޅުވެފައެވެ.
ކޮމެންޓް
