ރައީސް އަބްދުﷲ ޔާމީން، ޕީއެންއެފްގެ ޖަލްސާއެއްގައި.--
ރަސްމާލެ މަޝްރޫއަކީ ކުރަން ހެޔޮވާވަރުގެ ކަމެއްނޫން: ރައީސް ޔާމީން
ފިޔެސް 28 ސެޕްޓެމްބަރ 2026 (ހޯމަ) 08:34
ޔޫއޭއީގެ އީގަލް ހިލްސް އިން ރަސްމާލޭގައި ހިންގުމަށް ދިވެހި ސަރުކާރާއެކު ސޮއިކޮށްފައިވާ، މޯލްޑިވްސް ވޯޓަރފްރަންޓް އެންޑް މެރީނާ މަޝްރޫއުއަކީ ކުރަން ހެޔޮވާ ވަރުގެ ކަމެއް ނޫން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފް އިން ރޭ ބޭއްވި ޓައުންހޯލް ޖަލްސާގައި ވާހަކަދައްކަމުން ޔާމީން ވިދާޅުވީ އދ ގެ އާންމު ޖަލްސާގައި ރާއްޖޭގެ ނައިބްރައީސް ފަލަސްތީނުގެ ދިފާއުގައި ވާހަކަދެއްކެވިއިރު، އަދި ފަލަސްތީނަށްޓަކައި މުއިއްޒު ކަރުނައަޅައި ރޯއިރު، ޔަހޫދީންނަށް ރަސްމާލެއިން ބިން ވިއްކައި ވަޒަންވެރިކުރުވުމަށް މަސައްކަތް ކުރުމަކީ ދެކޮޅުޖެހޭ ކަމެއް ނޫން ކަމަށެވެ.
"ޔަހޫދީންނަށް ވުރެ އަޅުގަނޑުމެން ވެރީންގެ ޔަހޫދީކަން ބޮޑު" ޔާމީން ވިދާޅުވިއެވެ.
ޔާމީން ވަނީ ޔަހޫދީ ދައުލަތާއި އެންމެ ގާތް އަދި އެންމެ ނުފޫޒުގަދަ ގައުމުތަކަކީ ކޮބައިކަމާއި، އެމީހުންގެ ފަރާތުން ރާއްޖެއަށް އަންނާނީ ކިހާވަރެއްގެ ނުރައްކަލެއް ކަމާމެދު ވެސް ވިސްނަންޖެހޭ ކަމަށް ވިދާޅުވެފައެވެ.
"މިކަންކަމާ ދޭތެރޭ ވިސްނާލައްވާ. މިއީ އަޅުގަނޑުމެން ކުރުން ހެޔޮވާ ވަރު ކަމެއް ނޫން. އަނެއްކާ މި މީހުންގެ އެއްބަސްވުންތަކެއް އަޅުގަނޑުމެންނަކަށް ނުފެންނާނެ. މި މީހުން ދެން ކޮން ބަޔަކަށްތޯ ބިން ދޭނީ ނުވަތަ އިމާރާތްކޮށްފައި އެޕާޓްމެންޓް ދޭނީ. އެއިކީ ދިވެހި ދައުލަތުގެ ބާރު ހިނގާނެ ތަނެއް ނޫން. ބައިނަލްއަގުވާމީ ގާނޫނު ވެސް ޖާގައެއް ނުދޭ،" ޔާމީން ވިދާޅުވިއެވެ.
ޔަހޫދީންދެކެ އަންނަ ރުޅީގެ ސަބަބުން އެހެން ގައުމުތަކުގައި ހަމަލާތައް ދެމުންދާކަން ފާހަގަ ކުރައްވައި ޔާމީން ވިދާޅުވީ ރަސްމާލޭގައި ޔަހޫދީން އާބާދުކޮށްފި ނަމަ އެފަދަ ކަންކަން ހިނގުމަކީ ދުރުގައި އޮތް ކަމެއް ނޫން ކަމަށެވެ.
ރަސްމާލެ މަޝްރޫއަކީ ދިގު މުއްދަތަކަށް ދިވެހިންނަށް ފައިދާވާނެ މަޝްރޫއެއް ނޫން ކަމަށާއި، މުއިއްޒުގެ ވެރިކަން ނިމުމާއެކު މި މަޝްރޫއު ހުއްޓުވާނެ ކަމަށް ޔާމީން ވިދާޅުވިއެވެ.
"މިވަރުގެ ކަންތައްތަކުގައި [ރަސްމާލެ މަޝްރޫއު] ސަލާމަތީ ދެ ބާރަށް ބުނަން ކެރެންވާނެ، ގާނޫނުން އެ މީހުންނަށް ލާޒިމުކުރޭ ރައީސުލްޖުމްހޫރިއްޔާ ކައިރީގައި ބުނަން ތިކަން ކޮށްގެން ނުވާނެއޭ. އެ މީހުން ކުރަންޖެހޭނެ އެކަން. އެއީ އެ މީހުންގެ ގާނޫނީ ޒިންމާއެއް،" ޔާމީން ވިދާޅުވިއެވެ.
ޔާމީން ވިދާޅުވީ ބަޔަކަށް 99 އަހަރަށް ތަނެއް ވިއްކާލުމަށްފަހު ދެން އެތަނެއްގައި ވަކި ކަންތައްތަކެއް ނުކުރަން ނުބުނެވޭނެ ކަމަށާއި ރާއްޖެ ދެކެ ލޯބިވާ މީހުން މިކަމާ ދެކޮޅަށް ތެދުވަންޖެހޭ ކަމަށެވެ.
ކޮމެންޓް
