މި މަހުގެ އެއްވަނަ ދުވަހުން ފެށިގެން މާލެ ސިޓީ ހޯލްގައި ކުރިއަށްދާ އެމްޑީޕީގެ ފަސްވަނަ ކޮންގްރެސްގެ ތެރެއިން އިއްޔެއާއި ރޭ ކުރިއަށްގެންދިޔަ އިންވެސްޓްމެންޓް ފޯރަމްގެ ޕެނަލް ޑިސްކަޝަނަށް ފަހު، މިއަދު ރަސްމީ ކޮންގްރެސްގެ ޖަލްސާތައް މިހާރު ފަށާފައިވާ ކަމަށް އެމްޑީޕީން ބުނެފިއެވެ. މިއީ އެމްޑީޕީ ކޮންގްރެސްގެ ތިން ވަނަ ދުވަހެވެ.

ދެފުށް ފެންނާނޭހެން އާންމުކޮށް ހުޅުވާލެވިގެން ކުރިއަށްގެންދާ އެމްޑީޕީގެ މި ކޮންގްރެސްގެ ރަސްމީ ޖަލްސާތައް މިހާރު ފަށާފައި ވާއިރު، މިއަދު ކޮންގްރެސްގެ ރިޕޯޓު ހުށަހެޅުމާއި، ޕާޓީގެ ހާއްސަ އެޕް "ޔެލޯ" ލޯންޗުކުރުން ކުރިއަށް ގެންގޮސްފި ކަމަށާ، އަދި ޕާޓީގެ އަސާސީ ގަވާއިދަށް އިސްލާހު ގެނައުން، ސިޔާސަތު ކަރުދާހުގެ ގޮތުގައި ބޮޑު ބަދަލު ގަރާރު، ލާމަރުކަޒީ ގަރާރު ހުށަހަޅާ، އެ ގަރާރަށް ބަހުސް ކުރުން، އަސާސީ ގަވާއިދަށް ހުށަހެޅުނު އިސްލާހުތަކަށް ވޯޓަށް އެހުން ކުރިއަށް އެބައޮތް ކަމަށް އެމްޑީޕީން ބުނެއެވެ.

އަދި، ލާމަރުކަޒީ ގަރާރެއް ވެސް މިއަދު ހުށަހަޅާއިރު، އެއަށް ފަހު އަސާސީ ގަވާއިދަށް ހުށަހެޅުނު އިސްލާހުތަކަށް ވޯޓަށް އެހުން ވެސް ކުރިއަށް ގެންދިއުމަށް ވަނީ ހަމަޖެހިފައި ކަމަށް އެމްޑީޕީން ބުނެއެވެ.

އެގޮތުން، މިއަދުގެ ފުރަތަމަ ސެޝަނުގައި އޮތީ ޕާޓީގެ އަސާސީ ގަވާއިދަށް އިސްލާހު ހުށަހެޅުމާއި އިސްލާހުތަކަށް ބަހުސަށް ހުށަހެޅުން އޮންނައިރު، ދެވަނަ ސެޝަނުގައި ބޮޑު ބަދަލުގެ ގަރާރު ހުށަހެޅުމާއި ގަރާރަށް ބަހުސަށް ހުޅުވާލުން، އަދި ތިން ވަނަ ސެޝަނުގައި ލާމަރުކަޒީ ގަރާރު ހުށަހެޅުމާއި އެ ގަރާރަށް ބަހުސް ކުރުން ކުރިއަށް ގެންދާނެ ކަމަށް އެމްޑީޕީން ބުނެއެވެ.

އެ ތިން ސެޝަނަށް ފަހު ވޯޓަށް އެހުން އޮންނާނެ ކަމަށާ، އޭގެ ފަހުން އިންވެސްޓް ފޯރަމުން ހޯދުނު އިންވެސްޓްމަންޓް އެގްރިމެންޓުތަކުގައި ވޯޓަށް އެހުމަށް ވެސް ހަމަޖެހިފައިވާ ކަމަށް އެމްޑީޕީން ބުނެއެވެ.

އެމްޑީޕީގެ ކޮންގްރެސް 368 މަންދޫބުންނާއެކު މިއަދު ފަށާފައި ވާއިރު، ޕާޓީގެ އަސާސީ ގަވާއިދަށް ހުށަހަޅާފައިވާ ބައެއް އިސްލާހުތަކުގެ ތެރޭގައި ރައީސް އާއި ނައިބު ރައީސްގެ މަގާމު އުވާލައި، ޕާޓީގެ އެންމެ އިސް މަގާމަކީ ޗެއާޕާސަންއަށް ހެދުން ހިމެނޭއިރު، ދެން ފާހަގަކޮށްލެވެނީ ބޮޑު ބަދަލު ގަރާރަށް ވޯޓަށް އެހުމެވެ.

ދިވެހިރާއްޖޭގެ ހިންގުމުގެ ނިޒާމް ބަދަލު ކުރަން މަސައްކަތް ކުރާނެ މެނިފެސްޓޯއެއް ކަމަށްވާ، ބޮޑު ބަދަލު ގަރާރު މެނިފެސްޓޯ ހުށަހެޅުއްވީ ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް އެވެ.

ކޮންގްރެސް ނިންމުމުގެ ރަސްމިއްޔާތު މިރޭ އޮންނައިރު، އެ ރަސްމިއްޔާތުގައި ޕާޓީގެ އިސްވެރިން ވާހަކަ ދައްކަވާނެކަމަށް ވެސް އެމްޑީޕީން މައުލޫމާތު ދެއެވެ. އެމްޑީޕީން އެންމެ ފަހުން ބޭއްވި ކޮންގްރެސް ބާއްވާފައިވަނީ 2022 ވަނަ އަހަރުއެވެ.