ދިވެހިރާއްޖޭގައި މިހާރު އަމަލުކުރަމުންދާ ތިން ބާރު ވަކިވެފައިވާ ވެރިކަމުގެ ނިޒާމަށް އިސްލާޙީ ބޮޑެތި ބަދަލުތަކެއް ގެނައުމަށްޓަކައި ހުށަހަޅާ 'ބޮޑު ބަދަލު'ގެ ބޭނުމަކީ ބަރުލަމާނީ ނިޒާމަކަށް ފުރޮޅާލުން ނޫންކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެ އެވެ.

މިހާރު ކުރިއަށްދާ އެމްޑީޕީގެ ފަސްވަނަ ކޮންގްރެސްއަށް 'ބޮޑު ބަދަލު' ކަރުދާސް ހުށަހަޅައި ފައްޔާޒް ވިދާޅުވީ ރައީސުލްޖުމްހޫރިއްޔާއަށް ލިބިދީފައިވާ ބޮޑެތި ބާރުތައް ކުޑަކުރުމަށްޓަކައި އެމްޑީޕީން ހުށަހަޅާ ގަރާރުގައި، ދައުލަތާއި ސަރުކާރަކީ ވަކި ދެ އެއްޗެއްގެ ގޮތުގައި ކަނޑައަޅައި، ދައުލަތުގެ ވެރިޔަކާއި ސަރުކާރުގެ ވެރިޔަކު ވަކިން ބެހެއްޓުމަށް ހިމަނާފައިވާކަމަށެވެ. 

ފައްޔާޒް ވިދާޅުވީ މިއީ އެއްގޮތަކަށްވެސް ބަރުލަމާނީ ނިޒާމުގެ ވާހަކައެއް ނޫން ކަމަށެވެ. އަދި މީގެ މައިގަނޑު މަގުސަދަކީ ސަރުކާރަކީ ރައްޔިތުން ސީދާ ވޯޓުން އިންތިޚާބުކުރާ ބަޔަކަށް ހަދައި، ދައުލަތުގެ ވެރިޔާގެ ދައުރާއި ސަރުކާރުގެ ދައުރު ވަކިކޮށް، އެއް ފަރާތަކަށް ހުރިހާ ބާރެއް ޖަމާވުން ހުއްޓުވުންކަމަށް އޭނާ ވިދާޅުވިއެވެ.

ރައްޔިތުން އުންމީދުކުރި ގޮތަށް ގާނޫނުއަސާސީން ދައުލަތުގެ ބާރުތައް ފާރަވެރިވެ، ޗެކްސް އެންޑް ބެލެންސަސް ނިޒާމު މިހާރު ހިނގަމުން ނުދާ ކަމަށާއި ރައްޔިތުންގެ މަޖިލީހަކީ ސަރުކާރު ޖަވާބުދާރީ ކުރުވާނެ ތަން ކަމަށް ބެލެވުނު ނަމަވެސް، މަޖިލީހުގެ ސުޕަރ މެޖޯރިޓީ ވެރިކަންކުރާ ޕީއެންސީއަށް ލިބުމުން، މުޅި ނިޒާމުގެ ބާރުތައް ވަނީ އެއް ފަރާތަކަށް ބުރަވެފައިވާކަމަށް ފައްޔާޒު ވިދާޅުވި އެވެ. އަދި އޭގެ ސަބަބުން ޤާނޫނުއަސާސީން ރައްޔިތުންނަށް ކަށަވަރުކޮށްދޭ ހައްގުތައް ވެރިމީހާގެ މުށުތެރެއަށް ގޮސްފައިވާކަމަށް ވަނީ ވިދާޅުވެފައެވެ.

ސުޕްރީމް ކޯޓުގެ ފަނޑިޔާރުން ފަދަ އިސް މަގާމުތަކުގައި ތިއްބަވާ ބޭފުޅުން މަޖިލީހުގެ އަޣުލަބިއްޔަތުން ވަކިކުރެވޭ ގޮތަށް އޮތުމަކީ ޝަރުއީ ދާއިރާގެ މިނިވަންކަން ގެއްލި، ސަރުކާރުން ބޭނުންވާ ގޮތަށް ކަންކަން ނިންމުމަށް މަގުފަހިވާ ކަމެއްގެ ގޮތުގައިވެސް ފައްޔާޒް ފާހަގަކުރެއްވި އެވެ.

ހަމައެއާއެކު، އެންޓި ކޮރަޕްޝަން ކޮމިޝަން (އޭސީސީ) ޕީޖީ އަދި ހިއުމަން ރައިޓްސް ކޮމިޝަން (އެޗްއާރުސީއެމް) ފަދަ މިނިވަން މުއައްސަސާތަކުގެ މެންބަރުން އައްޔަންކުރުމާއި ވަކިކުރުމުގައި ރައީސުލްޖުމްހޫރިއްޔާއާއި ސަރުކާރުގެ މެޖޯރިޓީ އޮންނަ މަޖިލީހުގެ ނުފޫޒު އޮތުމަކީ އެ މުއައްސަސާތަކުގެ މިނިވަންކަން ގެއްލޭ މައިގަނޑު ސަބަބުކަމަށް ވިދާޅުވިއެވެ.

އެމްޑީޕީ ކޮންގްރެސްގެ ހުށަހެޅުންތަކަށް މިއަދު ހަވީރު ވޯޓަށް އެހުމަށް ތާވަލުކޮށްފައިވާއިރު ކޮންގްރެސް މިރޭ ނިމޭނެ އެވެ.