އެލްޖީއޭ އިން މިރޭ ނެރުނު ބަޔާނެއްގައި ބުނީ ކައުންސިލް ބިންތަކުގައި "ސިޔާސީ ޕާޓީއެއް ޕްރޮމޯޓް" ކުރުމަކީ ގާނޫނާ ހިލާފް އަމަލެއް ކަމަށެވެ.

"ކައުންސިލު އިދާރާ އާއި އިދާރާގެ ގޯއްޗާއި ކައުންސިލުގެ ނަމުގައި ރަޖިސްޓްރީކޮށްފައިވާ އާންމު ހިދުމަތްތަކަށް ކަނޑައަޅާފައިވާ ބިންތަކުގައި ސިޔާސީ ޕާޓީއެއްގެ ފިކުރު ދިރުވައި ޕްރޮމޯޓް ކުރަން ބޭނުން ކުރުމަކީ [ލާމަރުކަޒީ] ގާނޫނުގައި ބަޔާންކޮށްފައިވާ އުސޫލުތަކާ ހިލާފަށް ކުރެވޭ ކަމެއްގެ ގޮތުގައި މި އޮތޯރިޓީ އިން ދެކެން،" އެ ބަޔާނުގައި ބުނެފައިވެ އެވެ.

އެ އޮތޯރިޓީ އިން ވަނީ ސިޔާސީ ޕާޓީއެއް ޕްރޮމޯޓްވާ ގޮތަށް މަސައްކަތް ނުކުރަން ހުރިހާ ކައުންސިލްތަކެއްގެ މައްޗަށް އަމުރުކޮށްފަ އެވެ. އަދި ބުނެފައި ވަނީ އެފަދަ ކަމެއްކޮށްފި އެކަން ވާނީ ކައުންސިލަރުންގެ ސުލޫކީ މިންގަނޑާ ހިލާފު އަމަލަކަށް ކަމަށެވެ.

އެމްޑީޕީގެ ކޮންގްރެސް ބާއްވަން އެކަށީގެންވާ ތަނެއް ސަރުކާރުން ނުދިން އިރު، ވެރިކަން ހިންގާ ޕީއެންސީގެ ކޮންގްރެސް ވަރަށް ކުލަގަދަކޮށް ބާއްވާފައި ވަނީ ސޯޝަލް ސެންޓަރުގަ އެވެ. އޭގެ އިތުރުން މާފަންނު މަދަރުސާ ވެސް އޮތީ ޕީއެންސީގެ ބޭނުމަށް ނަގާފަ އެވެ.

މާލޭ ސިޓީ ހޯލް (ތައިސޭ ކޮށި ނުވަތަ މާލެ ސިޓީ ކައުންސިލްގެ އާއްމު ހިދުމަތްތަކާ ބެހޭ ބައި) ގައި ކުރިއަށް ގެންދިޔަ އެމްޑީޕީގެ ކޮންގްރެސްގައި 900 އަށްވުރެ ގިނަ މަންދޫބުން ބައިވެރިވިއެވެ. އެއީ އެ ހުރިހާ މެންބަރުން ތިބެން އެކަށީގެންވާ ޖާގައެއް ނޫނެވެ. ކޮންގްރެސްގެ ކުރިން ބޭއްވި ނޫސްވެރިންގެ ބައްދަލުވުމެއްގައި ޕާޓީގެ ނައިބު ރައީސް އިބްރާހިމް ވަހީދު ވަނީ އެމައްސަލައިގައި ސަރުކާރަށް ފާޑުވިދާޅުވެފަ އެވެ.

"އަދި ކޮންގްރެސްގެ ތެރޭގައި ރައީސުލްޖުމްހޫރިއްޔާ ވިދާޅުވި، ހުރިހާ ސިޔާސީ ޕާޓީތަކަށް ހަމަހަމަ ފުރުސަތު ދެއްވާ ވާހަކަ އެ ބޭފުޅާ. އެވަގުތު އަޅުގަނޑު ހިތައް އެރި ހުރި ހަޔާތްކުޑަކަން ދެކިބަލާށޭ އަޅުގަނޑުމެންނަށް ކޮންގްރެސް ބާއްވަން ތަނެއް ނުދީ މާލޭގެ ތިން ސްކޫލު ހިސޯރުކޮށްގެން ކޮންގްރެސް ބާއްވައި، ސޯޝަލް ސެންޓަރުގައި ކޮންގްރެސް ބޭއްވީ ތިން ސްކޫލު ހިސޯރުކޮށްގެން،" އޭނާ ވިދާޅުވިއެވެ.

އެމްޑީޕީގެ ކޮންގްރެސް މިމަހުގެ ފުރަތަމަ ދުވަހުން ފެށިގެން މިރޭގެ ނިޔަލަށް ކުރިއަށް ގެންދިޔައިރު، އެ ކޮންގްރެސްގައި ވަނީ މުހިންމު ނިންމުންތަކެއް ނިންމާފަ އެވެ.