ރާއްޖޭގެ ހިންގުމުގެ ނިޒާމް ބަދަލު ކުރުމަށް ގެންނަން ފެންނަ އިސްލާހުތައް ހިމެނޭހެން އެކުލަވާލާފައިވާ މި ކަރުދާސް ފާސްކޮށްފައި ވަނީ، އެމްޑީޕީ އިން މިވަގުތު ކުރިއަށްގެންދާ ކޮންގްރެސްގައި އެ ކަރުދާހަށް ވޯޓައް އެހުމުން، ވަޑައިގެން ތިއްބެވި 564 މެންބަރުންގެ ތެރެއިން 520 މެންބަރުންގެ ވޯޓު ލިބިގެންނެވެ.

އެހެންކަމުން ބޮޑު ބަދަލު ކަރުދާހަކީ މިހާރު އެމްޑީޕީ އިން ގަބޫލު ކުރާ ސިޔާސަތެއް ކަމަށް ވާއިރު، މި ކަރުދާހުގައި ހިމެނޭ އެންމެ ބޮޑު ބަދަލަކީ، ދައުލަތުގެ ވެރިޔަކާއި ސަރުކާރުގެ ވެރިޔަކު އިންތިހާބު ކުރުން ކަން ފާހަގަކޮށްލެވެއެވެ.

އެ ކަރުދާހުގައިވާ ގޮތުން، ސަރުކާރުގެ ވެރިޔާ ރައްޔިތުންގެ ސީދާ ވޯޓަކުން އިންތިހާބު ކުރާއިރު، ދައުލަތުގެ ވެރިޔާ އިންތިހާބު ކުރާނީ މަޖިލީހާއި ކައުންސިލްތަކުން ނަގާ ވޯޓަކުން ކަން ފާހަގަކޮށްލެވެއެވެ.

އެމްޑީޕީގެ ކޮންގްރެސް ގައި ޕާޓީގެ އަސާސީ ގަވާއިދަށް ހުށަހަޅާފައިވާ ބައެއް އިސްލާހުތަކުގެ ތެރޭގައި ރައީސް އާއި ނައިބު ރައީސްގެ މަގާމު އުވާލައި، ޕާޓީގެ އެންމެ އިސް މަގާމަކީ ޗެއާޕާސަންއަށް ހެދުން ހިމެނޭއިރު، ދެން ފާހަގަކޮށްލެވެނީ ބޮޑު ބަދަލު ގަރާރެވެ.

ދިވެހިރާއްޖޭގެ ހިންގުމުގެ ނިޒާމް ބަދަލު ކުރަން މަސައްކަތް ކުރާނެ މެނިފެސްޓޯއެއް ކަމަށްވާ، ބޮޑު ބަދަލު ގަރާރު މެނިފެސްޓޯ މިހާރު ފާސްކޮށްފައި ވާއިރު، ކޮންގްރެސް ނިންމުމުގެ ރަސްމިއްޔާތު މިރޭ ބޭއްވުމަށް ވަނީ ހަމަޖެހިފައެވެ.

އެ ރަސްމިއްޔާތުގައި ޕާޓީގެ އިސްވެރިން ވާހަކަ ދައްކަވާނެކަމަށް ވެސް އެމްޑީޕީން މައުލޫމާތު ދެއެވެ.