މާލެ ސިޓީ ކައުންސިލްގެ ޖަލްސާއެއް - ފޮޓޯ: ސިޓީކައުންސިލް
މާލޭ ރަށްވެހިންގެ ރަޖިސްޓަރީ ހެއްދުމުގެ ކަންކަން އޮންލައިކޮށް އިތުރު ފަސޭހަކަމާއެކު
ސެޓްފިކެޓްގައި ޖަހާ ފޮޓޯ ފިޒިކަލީ ގެންނާކަށް ދެނެއް ނުޖެހޭނެ، ވެރިފަރާތުގެ ގޮތުގައި އެކަކަށްވުރެ ގިނަފަރާތް ހިމެނުނު ނަމަވެސް އެއިން ކޮންމެފަރާތަކަށް ވެސް ރަޖިސްޓަރީއަށް އެދި ހުށަހެޅޭނެ
ހިޝާމް ހާރޫން 8 އޮކްޓޯބަރ 2026 (ބުރާސްފަތި) 17:04
މާލެ ސިޓީ ކައުންސިލުން ރައްޔިތުންނާ ވީހާވެސް ގާތުން ލުއިފަސޭހަކަމާއެކު ޒަމާނީ ޓެކްނޮލޮޖީގެ އެހީގައި އޮންލައިންކޮށް ހިދުމަތްދިނުމަށް ގާއިމްކޮށްފައިވާ ޕޯޓަލް "މާވެހި" ޕޯޓަލް މެދުވެރިކޮށް މާލޭ ރަށްވެހީންގެ ރަޖިސްޓަރީ ހެއްދުމުގައި ދިމާވި، ދަތިތައް ހައްލުކޮށް، ރަށްވެހީންގެ ރަޖިސްޓްރީ ހެއްދުމަށް ހުށަހަޅާ ފަރާތްތަކަށް ދަތިކަމެއް ނެތި އޮންލައިންކޮށް ހުށަހަޅައިގެން ރަށްވެހިންގެ ރަޖިސްޓްރީ ހެއްދުމުގެ އެންމެހާ ކަންކަން ކުރެވޭނެގޮތް މާލެ ސިޓީ ކައުންސިލުން މިއަދު ފަހިކޮށްދީފިއެވެ.
އެގޮތުން، ރަށްވެހިންގެ ރަޖިސްޓަރީ ހެއްދުމުގެ ކަންކަން ކުރިއަށްވުރެ ލުއިފަސޭހަކޮށް މާވެހި ޕޯޓަލް މެދުވެރިކޮށް ކުރެވޭނެކަން އާންމު ރައްޔިތުންނަށް ހާމަކުރުމައްޓަކައި މާލެސިޓީ ކައުންސިލުން މިއަދު ވަނީ ނޫސްބަޔާނެއް ނެރެފައެވެ.
އެނޫސްބަޔާނުގައި ބުނެފައި ވަނީ، ގިނަ އަދަދެއްގެ ރައްޔިތުން ރަށްވެހިކަން ބަދަލުކުރުމައްޓަކައި އެކައުންސިލްގެ "މާވެހި" ޕޯޓަލްއަށް މެދުވެރިކޮށް ހުށަހެޅުމުގައި ގިނަ ދަތިތަކާ ކުރިމަތިލާން ޖެހޭކަން އެ ކައުންސިލަށް ފާހަގަކުރެވިފައިވާ ކަމަށާ، އަދި ރަށްވެހިކަމުގެ ސެޓްފިކެޓްގައި ޖަހަންޖެހޭ ފޮޓޯ ކައުންސިލް އިދާރާއަށް ހާޒިރުވެ، ފިޒިކަލީ ހުށަހަޅަން ޖެހުމަކީ ވެސް ރައްޔިތުންނަށް ދިމާވި އިތުރު ތަކުލީފެއް ކަމަށެވެ.
"މަތީގައި ދެންނެވުނު ކަންކަން މާލޭސިޓީ ކައުންސިލަށް ފާހަގަވުމާގުޅިގެން، ކައުންސިލަރުންނާއި ވައިޓަލް ރެޖިސްޓްރޭޝަން ޑިޕާޓްމެންޓްގެ އެއްބާރުލުމާއެކު، އެންމެހައި ދަތިތައް ހައްލުކޮށް، މާވެހި ޕޯޓަލް މެދުވެރިކޮށް ފަސޭހަކަމާއިއެކު، ރަށްވެހިންގެ ރަޖިސްޓްރީ ހެއްދޭނެ އިންތިޒާމް މިހާރުވަނީ ހަމަޖައްސައިދީފައެވެ." – މާލެ ސިޓީ ކައުންސިލް
އަދި އޮންލައިންކޮށް ރަށްވެހިންގެ ރަޖިސްޓްރީއަށް އެދޭ ފަރާތްތަކަށް ކުރިން ދިމާވިފަދަ ދަތިތަކެއް ނެތި، ފަސޭހަކަމާއިއެކު މި ހިދުމަތް ލިބޭނެ އިންތިޒާމް ކޮށްދެވިފައިވާތީ، ރަށްވެހިކަމުގެ ރަޖިސްޓަރީ ހައްދަން ބޭނުންވާ އެންމެހާ ފަރާތްތަކުން މާލެސިޓީ ކައުންސިލްގެ މާވެހި ޕޯޓަލް މެދުވެރިކޮށް ހުށަހެޅުމަށް ދަންނަވާ ކަމަށް ވެސް މާލެ ސިޓީ ކައުންސިލްގެ ނޫސްބަޔާނުގައި ވެއެވެ.
އެހެންކަމުން އެ ކައުންސިލުން އެންމެ އިސްކަމެއްދެނީ ރައްޔިތުންނަށް ދިމާވާ މިފަދަ ދަތިތައް ދެނެގަނެ، އެކަންކަމަށް އެންމެ އެދެވޭ ހައްލު ހޯދައިދިނުމަށް ކަމަށާ، އަދި ކުރިއަަށް އޮތް ތަނުގައި ވެސް ރައްޔިތުންނަށް ދިމާވާ ދަތިތައް ހައްލުކޮށްދިނުމުގައި މާލެ ސިޓީ ކައުންސިލް އަބަދުވެސް ދެމިއޮންނާނެކަމުގެ ޔަގީންކަން ރައްޔިތުންނަށް އަރުވާކަމަށް ވެސް މި ނޫސްބަޔާނުގައި ވެއެވެ.
މާލެ ސިޓީ ކައުންސިލްގެ މި ނޫސްބަޔާން ނިންމާލާފައި ވަނީ، އެ ކައުންސިލުން ހިދުމަތް ލިބިގަންނަ އެންމެހާ ރައްޔިތުން ކައުންސިލަށް ދެއްވަމުންގެންދަވާ އެއްބާރުލުމަށް ނިހާޔަތަށް ޝުކުރު ދަންނަވަމުންނެވެ.
ފާހަގަކޮށްލެވޭ ގޮތުގައި، މާވެހި ޕޯޓަލް މެދުވެރިކޮށް މާލޭ ރަށްވެހިންގެ ރަޖިސްޓަރީ ހެއްދުމަށް ދަތިތަކެއް ހުރުމުން މާލޭ ސިޓީކައުންސިލުން އައީ ގިނަ މަސައްކަތްތަކެއް ކުރަމުންނެވެ.
އެގޮތުން ހުޅުމާލޭ ފަހި ފްލެޓުތަކުގެ ރަށްވެހިންގެ ހައްގުގައި މަސައްކަތްކުރާ ޖަމިއްޔާ ކަމަށްވާ "ފަހި ޔޫނިއަން" އާ ގުޅިގެން ވެސް މާލެ ސިޓީކައުންސިލުން ގިނަ މަސައްކަތްތަކެއް ކޮށް ބައްދަލުވުންތައް ބާއްވާފައިވާކަން ފާހަގަކޮށްލެވެއެވެ.
ކޮމެންޓް
