ހައުސިން މިނިސްޓްރީން މިއަދު ގެޒެޓް ކުރި އިއުލާނެއްގައި ބުނެފައިވަނީ މާލެއާއި ވިލިމާލޭގެ އާބާދީއަށް ބޭނުންވާ ތަރައްގީގެ މަސައްކަތްކުރުމަށާއި އިންފްރާސްޓްރަކްޗާގެ ޚިދުމަތް ދިނުމަށްޓަކައި ކައުންސިލުގެ އިހުތިސާސުން ވަކިކޮށް ދައުލަތުގެ މިލްކިއްޔާތުގެ ގޮތުގައި ކަނޑައަޅާ ކަމަށެވެ.

މާލެ ސިޓީ ކައުންސިލުގެ އިހުތިސާސުން ވަކި ކުރި ބިންތަކަކީ:

1. ސަލްޓަން ޕާކާއި ގައުމީ ދާރުލްއާސާރު
2. މަސް މާރުކޭޓު
3. މަސް މާރުކޭޓުގެ ހިއްކައިފައި އޮތް ސަރަހައްދު
4. ލޯކަލް މާރުކޭޓު
5. މާލޭ ސިޓީ ކައުންސިލުގެ މަސައްކަތްތެރިންގެ އެކޮމޮޑޭޝަން ބިލްޑިން ހުންނަ ބިން
6. ވިޔަފާރިވެރިންގެ ޖަމިއްޔާގެ އޮފީސް ހިންގާ އިމާރާތް
7. ކާނިވާ ސަރަހައްދު
8. އާޓިފިޝަލް ބީޗު
9. މަސްވެރިންގެ މައިޒާން
10. ތައިސޭ ކޮށި
11. ކުލީ ފާޚާނާ ނަންބަރު 2
12. ގަސްގަހާގެހި ރައްކާކުރަން ކައުންސިލުން ބޭނުންކުރާ ބިން
13. ބޮނޑިބަތް ޕާކު
14. ރަސްފަންނު
    މިކަމާ ގުޅޭ އެއްވެސް ޝަކުވާއެއް އޮތް ނަމަ މިއަދުން ފެށިގެން 14 ދުވަހުގެތެރޭ ހައުސިން މިނިސްޓްރީއަށް ހުށަހަޅަން އެ މިނިސްޓްރީން ވަނީ އެދިފައެވެ.

ރަށްރަށާއި ސިޓީ ކައުންސިލްތަކުގެ އިހުތިސާސް ތެރޭގައި ހިމެނޭ ބިމާއި ތަންތަނުގައި ސަރުކާރުން ތަރައްގީގެ މަޝްރޫއުތައް ހިންގުމުގެ ބޭނުމުގައި އެ ތަނެއް ކައުންސިލުގެ އިހުތިސާސް ވަކިކޮށް ސަރުކާރުގެ ދަށަށް ނެގޭ ގޮތަށް ލާމަރުކަޒީ ގާނޫނަށް ބަދަލު ގެނެސް އަމަލުކުރަން ފެށީ މިދިޔަ ސެޕްޓެންބަރު މަހުން ފެށިގެންނެވެ.

ގާނޫނުގައިވާ ގޮތުން، ސަރުކާރުގެ މަޝްރޫއުތައް ހިންގުމަށް ޓަކައި ކައުންސިލެއްގެ އިހުތިސާސުން ބިމެއް ވަކިކުރަން ވަޒީރުންގެ މަޖިލީހުން ނިންމުމުން އެ ތަނެއް ކައުންސިލުގެ މިލްކިއްޔާތުން ވަކިވެ، ދައުލަތުގެ ފުރިހަމަ ބާރު ހިނގާ ތަނަކަށް ބަދަލުވާނެއެވެ.

މި އިސްލާހު މަޖިލީހުން ފާސްކޮށް ރައީސުލްޖުމްހޫރިއްޔާ ތަސްދީގުކުރީ އެކަމާ ދެކޮޅަށް ގިނަ ކައުންސިލް ތަކަކުން ބަސް އިއްވާފައި ވަނިކޮށްވެ.