1.8 ބިލިއަނަށް ވުރެ ގިނަ މީހުން ދިރިއުޅޭ ދެކުނު އޭޝިއާގައި "ޒުވާނުންގެ ބަލްޖް" (youth bulge) އެއް ފާހަގަކުރެވެއެވެ. އަދި މިގޮތުން އާބާދީގެ ގާތްގަނޑަކަށް 50 އިންސައްތަ މީހުންނަކީ 25 އަހަރުން ދަށުގެ މީހުންނެވެ. މި ޑިމޮގްރަފިކް ހަގީގަތުގެ ސަބަބުން ސަރަހައްދުގެ ގައުމުތަކުގެ ސިޔާސަތުތައް ބައްޓަން ކުރުމުގައި މުހިންމު ދައުރެއް ޒުވާނުން އަދާކޮށްފައި ވެއެވެ. ސަރުކާރު ނުވަތަ ގާނޫނުހަދާ މަޖިލީހުން އެކުލަވާލާ ގާނޫނު ތަކާ ދެކޮޅަށް ޒުވާނުންގެ ހަރަކާތްތައް ބާރުވެރި ގޮތެއްގައި ކުރިއަށް ގެންދެއެވެ. ޒުވާނުންގެ ދެކޮޅުވެރި އެފަދަ ހަރަކާތްތަކުން ހާސިލުކުރަން ބޭނުންވާ ނަތީޖާއާ ހަމައަށް ވާސިލުވެފައިވެސް ވެއެވެ.

2010 ވަނަ އަހަރު ހިނގި އަރަބް ސްޕްރިންގެ އަށް ފަހު، 2020 ގެ އަހަރުތަކުގެ ކުރީކޮޅުން ފެށިގެން އިންޑިއާ، ޕާކިސްތާން، ސްރީލަންކާ، ނޭޕާލް އަދި ބަންގްލަދޭޝްގައި ޒުވާނުން އިސްނަގައިގެން ހިންގި ހަރަކާތްތަކުން ވަނީ މުހިންމު ސިޔާސީ މަޝްވަރާތަކަކަށާއި ބަދަލުތަކަކަށް މަގުފަހިކޮށްދީފައެވެ. އަދި މިގޮތުން ޓެކްނޮލޮޖީ އާއި ގްރާސްރޫޓްސް މޮބިލައިޒޭޝަން ބޭނުންކޮށްގެން އޮޓޮކްރަސީ އާއި އިޤްތިޞާދީ ތަފާތުކުރުން އަދި އިޖްތިމާޢީ އަނިޔާއާ ދެކޮޅަށް ގޮންޖަހައި ކާމިޔާބު ހޯދާފައި ވެއެވެ. 

ޑިމޮގްރަފީ އަދި ޓެކްނޮލޮޖީ: މޮބިލައިޒޭޝަނަށް މަގުފަހިކޮށްދޭ ކަންކަން
ދެކުނު އޭޝިއާގެ އާބާދީގެ ގާތްގަނޑަކަށް 27 އިންސައްތައަކީ ޒުވާނުން (15-29 އަހަރާ ދެމެދު) އެވެ. އަދި މިގޮތުން ޕާކިސްތާނުގައި 30 އަހަރުން ދަށުގެ 64 އިންސައްތަ މީހުން ތިބިއިރު، އިންޑިއާގެ މެދު އުމުރަކީ 28 އަހަރެވެ. ނަމަވެސް، ޒުވާނުންގެ ވަޒީފާ ނެތުމުގެ މައްސަލަ - 2022 ގައި ސްރީލަންކާގައި 23 އިންސައްތައަށް އަރާފައިވެއެވެ - އަދި ރަނގަޅު ފެންވަރުގެ ތަޢުލީމު ލިބުމުގެ ފުރުޞަތު މަދުވުން ފަދަ ނިޒާމީ މައްސަލަތަކުގެ ސަބަބުން ފުޅާ ދާއިރާއެއްގައި ހިތްހަމަނުޖެހުން އުފެދިފައިވެއެވެ. 2023 ވަނަ އަހަރާ ހަމައަށް ދެކުނު އޭޝިއާގައި އިންޓަރނެޓް ބޭނުންކުރާ މިންވަރު އަވަސް ދުވެއްޔެއްގައި 40 އިންސައްތައަށް އިތުރުވެފައިވުމުގެ ސަބަބުން ޒުވާނުންނަށް އިތުރު ބާރުވެރިކަމެއް ލިބިފައިވެއެވެ. ސޯޝަލް މީޑިއާ ކެމްޕޭންތަކާއި، އެންކްރިޕްޓް ކުރެވިފައިވާ މެސެޖިންގ  އެޕްތަކާއި އަދި އޮންލައިން ޕެޓިޝަންތައް މެދުވެރިކޮށް ޑިޖިޓަލް ޕްލެޓްފޯމްތަކަކީ މޮބިލައިޒޭޝަނަށް މުހިންމު ވަސީލަތްތަކަކަށް ވެފައިވެއެވެ. މިގޮތުން ޒުވާނުންނަށް ވަނީ އާންމު މީޑިއާގެ ސެންސަރޝިޕް ފަހަނައަޅައި، އަވަހަށް އަދި ފުރިހަމައަށް އޮގަނައިޒްވުމުގެ ފުރުޞަތު ލިބިފައެވެ.

ދެކުނު އޭޝިޔާގެ ބައެއް ގައުމުތަކުގެ އާބާދީގައި ޒުވާނުންގެ ނިސްބަތް ދައްކުވައިދޭ އާޓްވޯކެއް.

ދެކުނު އޭޝިއާގައި ހިނގި ފާހަގަކުރެވޭ ޒުވާނުންގެ ހަރަކާތްތައް
އިންޑިއާ: ދަނޑުވެރިންގެ އިހުތިޖާޖުތަކާއި ޑިޖިޓަލް އެކްޓިވިޒަމް
2020-2021 ދަނޑުވެރިންގެ އިހުތިޖާޖުތައް: ދަނޑުވެރިކަމުގެ އިޞްލާޙުތަކާ ދެކޮޅަށް ޤައުމީ ފެންވަރުގައި ބޭއްވުނު މުޒާހަރާތައް އޮގަނައިޒްކުރުމުގައި ޒުވާން އެކްޓިވިސްޓުން މުހިންމު ދައުރެއް އަދާކޮށްފައިވެއެވެ. މިގޮތުން FarmersProtest# ފަދަ ހޭޝްޓެގްތައް ބޭނުންކޮށްގެން ދުނިޔޭގެ ސަމާލުކަން ހޯދާފައިވެއެވެ. ޕަންޖާބު ސްޓޫޑެންޓްސް ޔޫނިއަން ފަދަ ގްރޫޕްތަކުން ހަރަކާތްތައް ދެމެހެއްޓުމުގައި މުހިންމު ދައުރެއް އަދާކޮށްފައިވެއެވެ. އަދި މީގެ ސަބަބުން 2021 ގައި ސަރުކާރުން ވަނީ އެ ޤާނޫނުތައް އުވާލަން މަޖުބޫރުވެފައެވެ.
މޫސުމީ ބަދަލުތަކާއި މަދަނީ އެކްޓިވިޒަމް: ފްރައިޑޭސް ފޮރ ފިއުޗަރ އިންޑިއާ ފަދަ ޖަމްޢިއްޔާތަކުން މޫސުމީ ޢަދުލުވެރިކަމަށް ވަކާލާތުކޮށްފައިވެއެވެ. އަދި ސިޓިޒަންޝިޕް އެމެންޑްމަންޓް އެކްޓް (ސީއޭއޭ) އާ ދެކޮޅަށް ބޭއްވުނު ޤައުމީ ފެންވަރުގެ އިހުތިޖާޖުތަކުގައި ޒުވާނުންގެ ބައިވެރިވުން ވަރަށް ބޮޑުވެފައިވެއެވެ. މިގޮތުން ޑިޖިޓަލް އެޑްވޮކަސީ އާއި އާންމު ތަންތަނުގައި ބޭއްވޭ މުޒާހަރާތައް އެއްކޮށްލާފައިވެއެވެ.

ޕާކިސްތާން: އައުރަތު މާރޗް އަދި ޕަޝްތޫން ތަހައްފުޒް މޫވްމަންޓް (ޕީޓީއެމް)
އައުރަތް މާރޗް: 2018 އިން ފެށިގެން، ޒުވާން ފެމިނިސްޓުން އަހަރީ އައުރަތް މާރޗްތައް އިސްނަގައިގެން ހިންގައި، އަންހެނުންނާމެދު ގެންގުޅޭ ހަރުކަށި އާދަކާދަތަކާ ދެކޮޅަށް ގޮންޖަހައި، ހަށިގަނޑުގެ މިނިވަންކަމާއި އިޤްތިޞާދީ ޙައްޤުތަކަށް ވަކާލާތުކޮށްފައިވެއެވެ. ބޮޑެތި ރައްދުތަކާ ކުރިމަތިލާންޖެހުނު ނަމަވެސް، މި މަސައްކަތްތަކުގެ ސަބަބުން ޖިންސުގެ ހަމަހަމަކަމާ ގުޅޭގޮތުން އާންމުންގެ މެދުގައި ދެކެވޭ ވާހަކަތަކަށް ބަދަލުތަކެއް ގެނެވިފައިވެއެވެ.
ޕީޓީއެމް: ޒުވާނުންގެ އެކްޓިވިޒަމްގެ ސަބަބުން ކުރިއަށްދާ ޕަޝްތޫން ތަހައްފުޒް މޫވްމަންޓުން ވަނީ ދައުލަތުގެ އަނިޔާވެރިކަމާއި މަޖުބޫރުން މީހުން ގެއްލުވާލުމުގެ މައްސަލަތަކަށް އަލިއަޅުވާލާފައެވެ. މޮބިލައިޒޭޝަނަށް ސޯޝަލް މީޑިއާ ބޮޑަށް ބޭނުންކުރި ނަމަވެސް، ޕީޓީއެމް ވަނީ ދައުލަތުގެ ގަދަ އަނިޔާވެރިދައުލަތުގެ ގަދަ އަނިޔާވެރިކަމާ ކުރިމަތިލާންޖެހިފައެވެ.

ސްރީލަންކާ: އަރަގަލަޔާ އަދި 2022 ގެ އިންތިފާލާ
2022 ގެ އިގުތިސާދީ ހީނަރުކަމުގެ ސަބަބުން GoHomeRajapaksas# މޫވްމަންޓް އުފެދުނެވެ. އަދި މި މޫވްމަންޓުގައި ޒުވާނުން އެންމެ ކުރީ ސަފުގައި އިސްނަގައިގެން ތިބެފައިވެއެވެ. ސޯޝަލް މީޑިއާ ސްޓްރެޓެޖިކްކޮށް ބޭނުންކުރުމާއި މަގުމަތީގައި ދެމެހެއްޓެނިވި ގޮތެއްގައި އިހުތިޖާޖުކުރުމުގެ ސަބަބުން، އެކްޓިވިސްޓުން ވަނީ 2022 ގެ ޖުލައި މަހު ރައީސް ގޮޓަބަޔާ ރާޖަޕަކްސާ އިސްތިއުފާ ދިނުމަށް މަޖުބޫރުކުރުވާފައެވެ. މިއީ ރައްޔިތުންގެ ބާރުން ގެނެވުނު ބޮޑު ބަދަލެކެވެ.

ނޭޕާލް: ފެޑެރަލިޒަމް އަދި ވެރިކަމުގެ އިސްލާޙުތައް
ޔޫތު އިނޮވޭޝަން ލެބް ފަދަ ޒުވާނުންގެ ޖަމްޢިއްޔާތަކުން 2015 ގެ ޤާނޫނުއަސާސީގެ ދަށުން ފެޑެރަލިޒަމް ތަންފީޒުކުރުމުގައި ހާމަކަން ބޮޑުކުރުމަށާއި ޖަވާބުދާރީވުމަށް ވަކާލާތުކޮށްފައިވެއެވެ. MyRightToKnow# ފަދަ ޑިޖިޓަލް ކެމްޕޭންތަކުން ކޮރަޕްޝަނާއި އިދާރީ ހިންގުމުގެ ނާކާމިޔާބުކަމާ ދެކޮޅަށް ގާނޫނު ހަދާ ފަރާތްތަކަށް ދެމެހެއްޓެނިވި ގޮތެއްގައި ޕްރެޝަރ ކުރަމުން ގެންގޮސްފައިވެއެވެ.

ބަންގްލަދޭޝް: ކޯޓާ އިސްލާޙުތަކާއި ޑިޖިޓަލް ރެޒިސްޓަންސް އަދި ވެރިކަން ބަދަލުވުން
2023 ގައި ކަރަންޓުގެ އަގު ބޮޑުކުރުމާ ދެކޮޅަށް ސްޓޫޑެންޓް ޔޫނިއަންތަކުން އިސްނަގައިގެން ހިންގި އިހުތިޖާޖުތަކުން ދައްކުވައިދެނީ އިޤްތިޞާދީ ސިޔާސަތުތަކާމެދު ޒުވާނުން ހިތްހަމަނުޖެހި ތިބިކަމެވެ. މީގެ ކުރިން، 2018 ގައި ސްޓޫޑެންޓުން އިސްނަގައިގެން ހިންގި ސިވިލް ސަރވިސްގެ ކޯޓާ އިޞްލާޙުކުރުމުގެ މޫވްމަންޓުން ވަގުތީ ކާމިޔާބީއެއް ހޯދި ނަމަވެސް، ފަހުން އެ އިޞްލާޙުތައް ވަނީ އަނބުރާ ގެނެވިފައެވެ. އެކްޓިވިސްޓުން ވަނީ ޑިޖިޓަލް ސެކިއުރިޓީ އެކްޓް ފަދަ އަނިޔާވެރި ފިޔަވަޅުތަކާ ދެކޮޅަށް ދެމެހެއްޓެނިވި އޮންލައިން އެޑްވޮކަސީ މެދުވެރިކޮށް ދެކޮޅުހަދާފައެވެ. 2024 ގެ ޖަނަވަރީ މަހު ބޭއްވުނު އާންމު އިންތިހާބާ ގުޅިގެން، ޒުވާނުންގެ ހަރަކާތްތަކުން މުހިންމު ދައުރެއް އަދާކޮށްފައިވެއެވެ. އިދިކޮޅު ފަރާތްތަކުން އިންތިހާބު ބައިކޮޓްކުރުމާ ގުޅިގެން، ޒުވާނުންގެ ގްރޫޕްތަކުން ވޯޓުލުމުގެ ހައްގާއި ނަޒާހަތްތެރި އިންތިހާބަކަށް ގޮވާލައި އެކި ކެމްޕޭންތައް ހިންގިއެވެ. އިންތިހާބުގެ ނަތީޖާއާމެދު ސުވާލު އުފެދުމާއެކު، ޒުވާނުންގެ އެކްޓިވިސްޓުން ވަނީ މަގުމަތީގެ އިހުތިޖާޖުތަކާއި ސޯޝަލް މީޑިއާ ކެމްޕޭންތައް މެދުވެރިކޮށް އިންތިހާބު އަލުން ބޭއްވުމަށް ގޮވާލާފައެވެ. މި ޕްރެޝަރުގެ ސަބަބުން، އަދި ބައިނަލްއަގްވާމީ ފަރާތްތަކުގެ ފާޑުކިޔުންތަކާއެކު، ޝޭހް ހަސީނާ ވަނީ އިސްތިއުފާ ދީފައެވެ. ވަގުތީ ސަރުކާރެއްގެ ދަށުން އަލުން އިންތިހާބު ބޭއްވުމަށް ވަނީ ނިންމާފައެވެ.   

ކުރިމަތިލާންޖެހޭ ގޮންޖެހުންތައް
ސރުކާރު ތަކުގެ ސިޔާސަތުތަކާ ދެކޮޅަށް ނުކުންނަ ޒުވާނުންނާމެދު ސަރުކާރުތަކުން ގިނަފަހަރު ހަރުކަށި ފިޔަވަޅުތައް އަޅައެވެ. މުޒާހަރާތައް ހުއްޓުވުމުގައި އާދަޔާ ޚިލާފަށް ބާރުގެ ބޭނުން ކުރުމާއި މީހުން ހައްޔަރުކޮށް ލާއިންސާނީ އަނިޔާ ދިނުން ހިމެނެއެވެ. ޚިޔާލުފާޅުކުރުމުގެ މިނިވަންކަމަށް ސަރުކާރު ތަކުން އަރައިގަނެއެވެ. އިންޓަނެޓް މެދުވެރިކޮށް ހިންގާ ކެމްޕޭންތައް ހުއްޓުވަން އިންޓަނެޓްގެ ޚިދުމަތް ކަނޑައިވެސް ލައެވެ. އެކި ގާނޫނުތައް މެދުވެރިކޮށް ދައުވާކޮށް ހުކުމްވެސް ކުރެއެވެ. އިންޑިއާ އާއި ބަންގްލަދޭޝްގެ ޒުވާނުންގެ ހަރަކާތްތަކުގައި ވަރަށްބޮޑަށް މިފަދަ ގޮންޖެހުންތަކާ ކުރިމަތިލާން ޖެހުނެވެ. 

މީގެ އިތުރުން ޒުވާނުންގެ ހަރަކާތްތަކަށް ސިޔާސީ ޕާޓީތަކުން ވެސް ނުފޫޒު ފޯރުވައެވެ. މުޒާހަރާ ކުރާ ޒުވާނުންގެ ފޯކަސް އެހެން ދިމާއަކަށް ބަދަލުކުރަން މަސައްކަތް ކުރެއެވެ. އެމީހުންގެ އެޖެންޑާތައް ބަދަލުކޮށްލުމަށް މަސައްކަތްކުރެއެވެ. މިފަދަ ކަންކަން ނޭޕާލްގެ ފެޑެރަލިޒަމްގެ ބަހުސްތަކުގައި ފެނިފައިވެއެވެ.

ކުރިއަށްއޮތް މަގު
2020 ގެ އަހަރުތަކުގައި ދެކުނު އޭޝިއާގެ ޒުވާނުންގެ ހަރަކާތްތަކުން ވަނީ ސިޔާސީ ބަދަލުތަކުގައި ޒުވާނުންގެ ބައިވެރިވުމުގެ މާނަ އަލުން މާނަކޮށްދީފައެވެ. މިގޮތުން ޑިޖިޓަލް އައު ގޮތްތަކާއި ގްރާސްރޫޓްސް އެކްޓިވިޒަމް އެއްކޮށްލުމުގައި މިސާލު ދައްކާފައިވެއެވެ. އެމީހުންގެ އަސަރު ދެނެގަނެވެއެވެ - އެއީ އިންޑިއާގައި ސިޔާސަތުތައް ބަދަލުކުރުވުން ކަމުގައިވިޔަސް ނުވަތަ ސްރީލަންކާ އާއި ބަންގްލަދޭޝްގައި ވެރިކަން ބަދަލުކުރުވުން ކަމުގައިވިޔަސް މެއެވެ. ނަމަވެސް، ނިޒާމީ ގޮންޖެހުންތައް ދެމިއޮތެވެ. 

ގައުމެއްގެ ސިޔާސީ ހަމަޖެހުން ބޮޑަށް ބިނާވާނީ ސަރުކާރުތަކުން އެމީހުންގެ ޒުވާން އާބާދީގެ އުންމީދުތަކަށް އިޖާބަދޭ މިންވަރެއްގެ މައްޗަށެވެ. ޓެކްނޮލޮޖީގެ ގޮތުން ކުރިއަރާފައިވާ މިޒަމާނުގައި ޒުވާނުންގެ ގޮވާލުންތަކަށް އިޖާބަ ނުދެވޭނަމަ، ސިޔާސީ ހަމަނުޖެހުންތައް ކުރިމަތިވުމަކީ އެކަށީގެންވާ ކަމެކެވެ. އިތުރު ގޮންޖެހުންތަކާ ސަރުކާރު ތަކުން ކުރިމަތިލާންޖެހި، މުޅި ގައުމު ހަލަބޮލިވެދެއެވެ.