ޔޫތް އެޑްވައިޒަރީ ބޯޑުން މާހިލް އިސްތިއުފާ ދެއްވާފައި މިވަނީ، މިދިޔަ ބުރާސްފަތި ދުވަހު މެލޭޝިއާއިން ރާއްޖެއަށް އޭނާ އައިރު ގެނައި ލަގެޖުން، ޤާނޫނީ ގޮތުން ރާއްޖެއަށް އެތެރެކޮށް, ބޭނުންކުރުން ވެސް މިސަރުކާރުން މަނާކޮށްފައިވާ އެއްޗެއް ކަމަށްވާ "ވޭޕް" އާއި އެއާގުޅޭ ސާމާނުތަކެއް, ފެނި ބޮޑު އަދަދަކުން އޭނާ ޖޫރިމަނާ ކޮށްފައި ވަނިކޮށެވެ.

މި މައްސަލައާ ގުޅިގެން އިސްލާމިކް މިނިސްޓަރު މުޙައްމަދު ޝަހީމް ޢަލީ ސަޢީދު ވިދާޅުވެފައި ވަނީ ގައިގާ ބަނދެގެން މާހިލް އެފަދަ އެއްޗެއް ގެނައިކަމަށް ބފަތުރަމުންދަނީ ދޮގު ވާހަކަތަކެއް ކަމަށެވެ.

"ގައިގާ ބަނދެގެނެއް ނުގެނޭ، އެއީ ދޮގެއް." ޝަހީމް ވިދާޅުވިއެވެ.

އެ ބޯޑަށް މާހިލް އައްޔަންކުރީ މިދިޔަ އަހަރު އޮގަސްޓް މަހުއެވެ. މާހިލް, މިއަދު ރައީސް މުއިއްޒަށް ފޮނުއްވި އިސްތިއުފާގެ ސިޓީގައި އޭނާގެ އިސްތިއުފާއާ ގުޅޭ ތަފުސީލެއް ނުދެއްވި ނަމަވެސް ވިދާޅުވެފައިވަނީ، ތައުލީމު ހާސިލުކުރައްވައި ނިންމެވުމަށް ފަހު ގައުމަށް ހިދުމަތް ކުރައްވާނެ ކަމަށެވެ.