ފާއިތުވި އެމްޑީޕީ ސަރުކާރުން ކުރިއަށްގެންދިޔަ ގެދޮރުވެރިޔާ މަޝްރޫއުގެ ދަށުން އަޅާފައިވާ 4000 ފްލެޓު ލިބުނު ފަރާތްތަކުގެ ތެރެއިން، ފްލެޓަށް އަލަށް ބަދަލުވި އާއިލާއަކުން ހަވީރުގެ ސައިފޮދަކަށް ދެއްވި ދައުވަތު ގަބޫލުކުރައްވާ އެ ސަރުކާރުގެ ރައީސް އިބްރާހިމް މުޙައްމަދު ސޯލިހު މިއަދު ހަވީރު ޒިޔާރަތް ކުރައްވައިފިއެވެ.

މިއަދު ހަވީރު ސައިފޮދަށް ރައީސް އިބޫ ވަޑައިގެންނެވުމުން އެ އާއިލާއިންނާއި އަދި ވެސް އެހެން ބައެއް ފްލެޓުގައި ދިރިއުޅޭ އާއިލާތަކުން ވެސް ވަނީ، އެފަދަ ބޯހިޔާވަހިކަމެއް ހޯއްދަވައިދެއްވި ކަމަށްޓަކައި، އެމަނިކުފާނަށް ވަރަށް ބޮޑަށް ޝުކުރު އަދާކުރައްވާފައެވެ.

ރައީސް އިބޫ އެ އާއިލާއާ އެކުގައި އުފާވެރި ވަގުތުކޮޅެއް ހޭދަކުރައްވަމުން ވިދާޅުވީ، އެމްޑީޕީގެ ސަރުކާރުން އެ މަނިކުފާނުގެ ޒައާމަތުގައި މާލެސަރަހައްދުގެ ގިނަ ރައްޔިތުންތަކަކަށް ފުރިހަމަ ބޯހިޔާވަހިކަމެއް ހޯއްދަވައިދެއްވުނީތީ އުފާފުޅުކުރައްވާ ކަމަށެވެ. ނަމަވެސް މިއަދުގެ ސަރުކާރުން އަދިވެސް އެ ފްލެޓުތަކާއި ކުޅުއްވަން އުޅުއްވާކަމީ ނުހަނު ހިތާމަކުރައްވާ ކަމެއް ކަމަށް ވެސް ރައީސް އިބޫ ވިދާޅުވިއެވެ.

ރައީސް އިބޫގެ އަރިހުގައި، ފްލެޓުވެރިންގެ ހައްގުގައި މަސައްކަތްކުރާ ޖަނިއްޔާއެއް ކަމަށްވާ، ފަހި ޔޫނިއަންގެ ރައީސް އިބްރާހީމް ނޫރައްދީން އާއި ފަހި ޔޫނިއަންގެ ފައުންޑަރ އިސްމާޢީލް ނާއިފް ވެސް ވަޑައިގެންނެވިއެވެ.

އެފްޑީސީ ފްލެޓަށް ރައީސް އިބޫ ހަވީރުގެ ސައިފޮދަށް ވަޑައިގެންނެވުން - ފޮޓޯ: އެމްޑިޕީ

ރައީސް އިބޫ މިފަދައިން ވިދާޅުވެފައި ވާއިރު، މާލޭ ސިޓީގެ މޭޔަރު އާދަމް އާޒިމް ވެސް މިއަދު ވިދާޅުވެފައި ވަނީ، އެމްޑީޕީ ސަރުކާރުން މާލޭގެ ރަށްވެހިންނަށް ދީފައިވާ ގޯއްޗާއި ފްލެޓު އެދިންތާކުން ދިން ވަރަކަށް ދޭންޖެހޭނެ ކަމަށާ، އެތަންތަން ނުވެސް އަތުލެވޭނެ ކަމަށެވެ.

އެކްސްގައި ޕޯސްޓުކުރައްވާ މިއަދު އާޒިމް ވިދާޅުވީ، އިޖްތިމާއީ މައްސަލަތަށް މިހާބޮޑުވެފައިވަނީ ރަނގަޅު ބޯހިޔާވަހިކަމެއް ނުލިބި ދަތިހާލުގައި އުޅެންދެހިފައި އޮތުންކަން ނޭނގޭ އެކަކުވެސްނެތް ކަމަށާ، އެހެންކަމުން ދަފްތަރުގައި އާއި، ކުދި ފްލެޓު ތަކުގައި ތިބި، ރައްޔިތުންނަށް ގޯތިދޭން ނިންމާފައިވާ އުތުރުތިލަފަޅުން ގޯތި ދިނުން އަވަސް ކުރަންޖެހޭ ކަމަށެވެ.

މި ސަރުކާރުން އެކަންކަން ލަސްކުރުމަކީ ރައްޔިތުންނަށް ދެވޭ ވަރަށް ބޮޑު އަނިޔާއެއް ކަން ފާހަގަކުރައްވަމުން އާޒިމް ވިދާޅުވީ، އެމްޑީޕީ ސަރުކާރުން ދީފައިވާ ގޯތިތަކާއި ފްލެޓްތައް އެ ދިން ގޮތަށް ރައްޔިތުންނަށް ދޭންޖެހޭނެ ކަމަށާ، އެއްވެސް ހާލެއްގައި އެ އެއްޗެހި އަނބުރާ އަތުނުލެވޭނެ ކަމަށެވެ.

އެފްޑީސީ ފްލެޓަށް ރައީސް އިބޫ ހަވީރުގެ ސައިފޮދަށް ވަޑައިގެންނެވުން - ފޮޓޯ: އެމްޑިޕީ

އަދި މީގެއިތުރުން، ފާއިތުވި އެމްޑީޕީ ސަރުކާރުން މާލޭ ސަރަހައްދުގެ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް އިމާރާތްކުރަންފެށި ފްލެޓުތަކާއި ގޯތިތަށް އޭގެ ހައްގުވެރިންނާ ހަވާލުކުރުމުގެ ބަދަލުގައި، އެކަންކަމުން ސިޔާސީ މަންފާ ނަގައި، މުޅިން ވެސް އޮޅުވާލުމާއި މަކަރާއި ހީލަތް މިސަރުކާރުން ހަދަމުން އަންނަކަމަށް ބުނެ "ކޮބާ ކޮބާ މަގޭ ގޯތި، ކޮބާ ކޮބާ މަގޭ ފްލެޓު" މި ނަމުގައި އިދިކޮޅު އެމްޑީޕީން އިސްނަގައިގެން ރޭ ވަނީ އެއްވުމެއް ވެސް ބާއްވާފައެވެ.

ކާނިވާ ސަރަހައްދުގައި ކުރިއަށްދިޔަ އެ އެއްވުމުގައި ސަރުކާރަށް 6 ޑިމާންޑެއް ވެސް ހުށަހަޅާފައިވާ ކަން ފާހަގަކޮށްލެވެއެވެ. އެ ޑިމާންޑުތަކަށް މި ސަރުކާރުން ބީރުކަންފަތެއް ދީފިނަމަ، މި މަހުގެ 17 ގައި އެމްޑީޕީން ބާއްވާ، ބޮޑުމުޒާހަރާގެ ފަހުން ސިލްސިލާ އެއްވުނަތަކެއް މޭލޭގެ އެކި ސަރަހައްދުތަކުގައި ބާއްވާނެ ކަމަށް ވެސް ރޭގެ އެއްވުމުގައި އެމްޑީޕީން ވަނީ ބުނެފައެވެ.

ބޯހިޔާވަހި ކަމުގެ އެއްވުމުގައި ރޭ އިއްވި 6 ޑިމާންޑަކީ:

1. މާލެ ސަރަހައްދުގައި ދިރިއުޅޭ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ހިންގި ބިންވެރިޔާ އާއި ގެދޮރުވެރިޔާ ދެ ސްކީމުގެތެރެއިން ފުރަތަމަ ސްކީމްގައި ޝަރުތުހަމަވި 22766 އާއިލާ އާއި ދެވަނަ ސްކީމަށް ކުރިމަތިލި 40594 އައިލާގެ ތެރެއިން ޝަރުތު ހަމަވާނެކަމަށް ބެލެވޭ 29234 އާއިލާ އާއިއެކު ޖުމުލަ ފަންސާސް ދެހާސް އާއިލާއެއްގެ ދެ ލައްކަ އަށްވުރެ ގިނަ މީހުންނަށް ބޯހިޔާވަހިކަން ފޯރުކޮށްދިނުމަށް، ބްރިޖުން ގުޅާލެވެންހުރި، ހުޅުމާލޭގެ ފޭސް-3 ކާއި، ގިރާވަރު ފަޅާއި، ގުޅީފަޅާއި އަދި އުތުރުތިލަފަޅުން 850 ހެކްޓަރުގެ ބިންހިއްކުމަށް ނިންމާފައިވާ މަޝްރޫއުގެ ތެރެއިން، ފުރަތަމަ ފިޔަވަހީގައި ބިންހިއްކަން ފަށާފައިވާ 645 ހެކްޓަރުގެ ބިންހިއްކުމުގެ މަސައްކަތް ނިންމުމަށް ފަހުގައި މެނުވީ "ރަސްމާލެ" ހިއްކުމުގެ މަސައްކަތް ކުރިއަށް ނުގެންދިޔުން.
2. ގެދޮރުވެރިޔާގެ ފުރަތަމަ ސްކީމުގެ ދަށުން ފްލެޓަށް ޝަރުތު ހަމަވި 13763 މީހުންނަށް ފުލެޓް ދިނުމަށް ކުރީ ސަރުކާރުން ފާށާފައިވާ 11000 ފުލެޓްގެ ތެރެއިން ނިމިފައިވާ 4000 ފުލެޓް 15 ނޮވެމްބަރު 2023 ގައި އިއުލާންކުރި ފްލެޓު ލިސްޓުގައި ފްލެޓު ލިބޭނެކަމަށް ކަނޑައަޅައި އެގްރިމެންޓު ހަދާފައިވާ ފަރާތްތަކަށް އެ ލިސްޓުގައިވާ ގޮތަށް ފުލެޓު ދިނުމަށާއި، އަދި ބާކީތިބި 9763 މީހުންނަށް ފުލެޓް ދިނުމަށް އިންޑިއާގެ އެލްއޯސީއިން ފައިނޭސް ހަމަޖައްސައި، އިތުރު 7000 ފްލެޓް އެޅުމަށް ކުރީ ސަރުކާރުން ހަވާލުކޮށްފައިވާ ފުލެޓްތަކުގެ މަސައްކަތް ފެށުން.
3. މީގެ ކުރިން ވެސް ސަރުކާރުން ރައްޔިތުންނަށް ފޯރުކޮށްދޭ ބޯހިޔާވަހި ކަމުގެ އެއްބަސްވުމަކީ ގަނެވިއްކާ އެއްބަސްވުމަކަށް ވީހިނދު، ފަހި ދިރިއުޅުން 4000 ފްލެޓު ދިނުމުގައި މި ސަރުކާރުން ހަދަމުންދާ ކުލީގެ އެއްބަސްވުން ގަނެއްވިއްކާ އެއްބަސް ވުމަކަށް ބަދަލުކޮށްދިނުން.
4. ކުރީ ސަރުކާރުން އެފްޑީސީ މެދުވެރިކޮށް އެއްބަސްވުން ހަދައި ސޮއިކޮށްފައިވާ ފުލެޓްތަކުގެ ހައްޤުވެރިންނާއި ހަވާލުކޮށްފައިވާ 4000 ފްލެޓުގެ ކުލި، ކުރީސަރުކާރުން ކަނޑައަޅާފައިވާ މިންވަރަށްވުރެ ބޮޑު ނުކުރުމާއި، އެތަންތަނުން ނަގަމުން އަންނަ ޑައުން ޕޭމަންޓު ކަނޑާލުން.
5. ހުޅުމާލޭ ފޭސް-3، ގިރާވަރު ފަޅު، ގުޅީފަޅު، އަދި އުތުރުތިލަފަޅުގެ ބިމުން ނުހިއްކައި މިހާރު ބާކީހުރި ބިން ހިއްކުމުގެ މަސައްކަތް މިހާރުން މިހާރަށް ފެށުމަށާއި، އެ ސަރަހައްދުތަކުން ހިއްކާ ނިމިފައި ހުރި ބިންތަކުން ގޯތި ލިބިފައިވާ ފަރާތްތަކަށް ގޯތި ކަނޑާ، ގޯތިތައް ހަވާލުކުރުމަށާއި، މިރަށްތަކުގައި ރައްޔިތުން ދިރިއުޅުމަށް ބޭނުންވާ އަސާސީ ހިދުމަތްތައް ގާއިމުކުރުމުގެ މަސައްކަތް މިހާރުން މިހާރަށް ފެށުން.
6. ގެދޮރުވެރިޔާ އާއި ބިންވެރިޔާގެ ދެވަނަ ސްކީމްގައި ގޯއްޗާއި ފްލެޓަށް ކުރިމަތިލާފައިވާ 40594 އާއިލާއެއްގެ ފޯމުތައް އިވެލުވޭޓް ކުރުމުގެ މަސައްކަތް މިހާރުން މިހާރަށް ފެށުން.

އެއްވުމުގެ ބައިވެރިން ޖުމްލަގޮތެއްގައި ގޮވާލާފައި ވަނީ، ކުރީ ސަރުކާރުން ބިންހިއްކުމަށް ފަށާފައިވާ މަޝްރޫއުތައް ހުއްޓައި ނުލައި ކުރިއަށް ގެންދިޔުމަށް، ރައީސް މުއިއްޒަށް ގޮވާލައްވާކަމަށާ، ބޯހިޔާވަހިކަމާއި ގެއްލިފައިވާ އެހެން ހައްގުތައް ހޯދުމަށް މެދުކެނޑުމެއްނެތި މިވަނީ މުޒާހަރާކުރަން ޖެހިފައި ކަމަށްވުމުން، މަގުމައްޗަށް ނުނިކުމެ ދެން ނުތިބެވޭނެ ކަމަށެވެ.

އެހެންކަމުން މި މަހުގެ 17 ވަނަ ދުވަހު އެމްޑީޕީން ބާއްވާ އެއްވުމަށް، ވީހާ ވެސް ގިނަ ބަޔަކު ނުކުންނަން ޖެހޭ ކަމަށް، ރޭގެ އެއްވުމުގައި ވާހަކަދެއްކެވި ބޭފުޅުން ތަކުރާރުކުރެއްވިއެވެ.