މެދުއިރުމަތީގައި ހިންގަމުންދާ އިތުރު އަނިޔާވެރި ކަމުގެ އަމަލުތަކަށް ދުނިޔެ ބަލަން އެބައޮތެވެ. އެމެރިކާ އާއި އިސްރާއީލުގެ އެހީތެރިކަމާއި ބައިވެރިވުމާއެކު އީރާނަށް ދިން މަކަރުވެރި ހަމަލާއަކީ ހަމައެކަނި ބަދަލުހިފުމެއް ނުވަތަ ސަރަހައްދީ ހަމަނުޖެހުމެއް އިތުރަށް ގޯސްވުމެއް ނޫނެވެ. މިއީ އިހުގެ ބިންތަކެއްގެ ޗާޓު އަލުން ކުރެހުމަށްޓަކައި، ގިނަ ދުވަސްތަކެއް ވަންދެން ރާވައިގެން ކުރިއަށްގެންދާ ހަނގުރާމައެއްގެ ތެރެއިން ދިން ބާރުގަދަ ހަމަލާއެކެވެ.

އަޅުގަނޑުމެން ކަންކަމާމެދު މާ ސާދާކޮށް ދެކިގެން ނުވާނެއެވެ. މި އިއްތިހާދުގެ އެންމެ ފަހުގެ މަޤްޞަދަކީ އަމާންކަމެއް ނޫނެވެ. އަދި ސުލްޙައެއްވެސް ނޫނެވެ. އެއީ މުޅި މެދުއިރުމަތީގެ ޖިއޯޕޮލިޓިކަލް ބާރުވެރިކަން މުޅިން އަތުލައިގަނެ، މުޅި ސަރަހައްދުގެ މައްޗަށް ބާރު ހިންގާ "ގްރޭޓަރ އިސްރާއީލް" އެއް އުފެއްދުމުގެ މަގު ކޮށުމެވެ. މިއީ ކޮންސްޕިރަސީ ތިއަރީއެއް ނޫނެވެ؛ މިއީ އެތައް އަހަރެއްގެ ސިޔާސަތުތަކާއި، ހަމަނުޖެހުން އުފެއްދުމުގެ ކެމްޕޭންތަކާއި، އިސްތިއުމާރީ ރޭވުންތަކުގެ ނަތީޖާއެވެ. އަދި އާ ނިޒާމަށް ބޯލަނބަން ދެކޮޅު ހަދާ ކޮންމެ ޤައުމަކާ ދެކޮޅަށް ފާޅުގައި ކުރާ ހަނގުރާމައެކެވެ. އީރާނަށް ބޮން އެޅުމަކީ މަންޒިލެއް ނޫނެވެ. އެއީ އެ މަންޒިލަށް ދިއުމަށް އަޅާ ފިޔަވަޅެކެވެ.

މި ހިތްދަތި ހަޤީޤަތުގެ ސަބަބުން، ހުޅަނގުން އިސްވެ އޮވެ ހިންގާ ދުނިޔޭގެ ނިޒާމު މުޅިން ބާޠިލުވެ، ފީވެފައިވާ މިންވަރު މިއަދު އަޅުގަނޑުމެން ގަބޫލުކުރަން މަޖުބޫރުވެއެވެ. އެތައް އަހަރެއް ވަންދެން އެމެރިކާ އާއި އެ ޤައުމުގެ ބައިވެރިން އެމީހުންގެ ޚާރިޖީ ސިޔާސަތުތައް ފޮރުވާފައިވަނީ "އިންސާނީ ޙައްޤުތަކާއި"، "ޑިމޮކްރަސީ" އަދި "ބައިނަލްއަޤްވާމީ ނިޒާމުގެ" ނަމުގައެވެ. އެމީހުން ދައްކަމުން ދިޔައީ އެއީ އިންސާފުގެ ފާރަވެރިން ކަމަށާއި ޤާނޫނުގެ ސިޔާދަތު ނަގަހައްޓާ ބައެއްގެ ގޮތުގައެވެ.

ނަމަވެސް، މިއަދު އެމީހުންގެ އިތުބާރެއް އެބައޮތް ހެއްޔެވެ؟ އެއްވެސް އަސާސެއް ނެތް ބަހަނާތަކެއްގެ މައްޗަށް ބިނާކޮށް މިނިވަން ދައުލަތްތަކަށް ބޮން އަޅަމުންދާއިރު، އެމީހުން ކުރިން ދެއްކި ވާހަކަތަކުގެ ހުސްކަން މިއަދު ވަނީ ފާޅުވެފައެވެ. މިފަދަ އަނިޔާވެރިކަން ހުއްޓުވުމަށް އުފައްދާފައިވާ މުއައްސަސާތައް، އދ. ގެ ސަލާމަތީ މަޖިލީހާއި، ބައިނަލްއަޤްވާމީ އަދުލުގެ ކޯޓު ފަދަ ތަންތަނަކީ، ހުޅަނގުގެ މަޞްލަޙަތަށް ނުރައްކާވާ ކޮންމެ ހިނދެއްގައި ވީޓޯގެ ބާރުން އެތަންތަނުގެ ބާރު ކަނޑުވާލެވޭ ފިނޑި ތަންތަނުގެ ގޮތުގައި މިއަދު ވަނީ ހާމަވެފައެވެ. 

ހުޅަނގުގެ އަޚްލާޤީ ބާރުވެރިކަން މިއަދު ވަނީ މުޅިން ބާޠިލުވެފައެވެ. އަދި ހަޤީޤަތުގައި، މި ހަމަނުޖެހުންތައް އުފައްދާ ފަރާތްތަކުން މިހާރު އެކަން ފޮރުވަންވެސް މަސައްކަތެއް ނުކުރެއެވެ. އެމީހުންގެ އަމަލުތަކުން ފެންނަނީ އެމްޕަޔަރެއް ނުވަތަ ރަސްކަމެއް ގާއިމުކުރުމުގެ ދަހިވެތިކަމާއި، އަމިއްލަ އެދުމާއި، ބާރުގެ ނުފޫޒެވެ. އެމީހުން ވަނީ މޫނުމަތީގައި އެޅި މާސްކު ކަހާލައި، އޭގެ އަޑީގައިވާ ފާޅުކަން ބޮޑު ދަހިވެތިކަން ހާމަކޮށްފައެވެ.

އިންސާފުވެރި ބައިނަލްއަޤްވާމީ ނިޒާމެއް ނެތި ސުލްޙައެއް ނާންނާނެއެވެ. އޭގެ ބަދަލުގައި އޮންނާނީ "ޖަންގަލީގެ އުޞޫލެވެ"؛ ބާރުގަދަ މީހާ އަކީ ޙައްޤު މީހާ ކަމަށް ބަލައި، ބާރުގަދަ ދައުލަތްތައް ބިނާކުރަނީ މިނިވަން ޤައުމުތަކުގެ ކުނިބުނީގެ މައްޗަށެވެ. މިހާރު މިއޮތް ނިޒާމަކީ ހަލާކުވެފައިވާ ނިޒާމެއް ނޫނެވެ؛ މިއީ ބާރުގަދަ މީހުންނަށް ނާޖާއިޒު ފައިދާ ނެގޭ ގޮތަށް ފަރުމާކޮށްފައިވާ ނިޒާމެކެވެ. މި ނިޒާމުގެ ތެރެއިން ބާރުގަދަ މީހުންނަށް އެއްވެސް އަދަބެއް ނެތި ކަންކަން ކުރެވެއެވެ. އަދި ބަލިކަށި މީހުންނަށް އުޞޫލުތަކަށް ބޯލެނބުމަށް ނަސޭހަތް ދެއެވެ.

ދުނިޔެ މިއަދު މިވަނީ ނުރައްކާތެރި ހިސާބެއްގައެވެ. މި ނިޒާމަކީ އިޞްލާޙު ކުރެވިދާނެ އެއްޗެއް ކަމަށް ހެދިގެން އަޅުގަނޑުމެން ތިބެއްޖެނަމަ، އަޅުގަނޑުމެން މިވަނީ އަޅުވެތިވުމަށް އަމިއްލައަށް އެހީތެރިވެފައެވެ. އާ ޗެމްޕިއަނަކު ކުރިއަށް ނުކުންނަން އެބަޖެހެއެވެ. ދުނިޔޭގެ ކަންކަމުގައި ޝަރަފާއި، އިތުބާރާއި، ހަޤީޤީ އިންސާފު ޤާއިމުކުރުމަށްޓަކައި އާ ބާރެއް ބޭނުންވެއެވެ. 'ގްލޯބަލް ސައުތު' (ދުނިޔޭގެ ދެކުނުގެ ޤައުމުތައް) ތެދުވާންވީ ވަގުތަކީ މިއީއެވެ.

އޭޝިއާ، އެފްރިކާ، އަދި ލެޓިން އެމެރިކާގެ ޤައުމުތަކަކީ އިސްތިއުމާރީ އަޅުވެތިކަމާއި މި ބާރުގަދަ ނިޒާމުގެ ހިތްދަތިކަން އެންމެ ބޮޑަށް ތަހައްމަލުކުރި މީހުންނެވެ. މި ޤައުމުތަކުން މިހާރު ދުނިޔެ ބެލެހެއްޓުމުގެ ޒިންމާއާ ހަވާލުވާން އެބަޖެހެއެވެ. އަޅުގަނޑުމެން ޖެހެނީ ރައްޔިތުންގެ މަޞްލަޙަތަށް އިސްކަންދޭ އާ ބައިނަލްއަޤްވާމީ ނިޒާމެއް ކުރިއަރުވާށެވެ. އެއީ މަދު ބައެއްގެ ބާރުގެ މައްޗަށް ބިނާވެފައިވާ ނިޒާމަކަށް ވުމުގެ ބަދަލުގައި، ހުރިހާ ޤައުމުތަކެއްގެ ހަމަހަމަކަމުގެ މައްޗަށް ބިނާވެފައިވާ ނިޒާމަކަށް ވާންޖެހެއެވެ. ބާރުވެރިކަމާއި، ދަރަންޏާއި، ޑްރޯން ހަމަލާތަކުގެ ބަދަލުގައި ތަރައްޤީ އާއި، ކަރާމާތާއި، މަޝްވަރާއަށް އިސްކަންދޭ ނިޒާމެކެވެ. ގްލޯބަލް ސައުތަކީ އިންސާނިއްޔަތުގެ އަޣުލަބިއްޔަތެވެ. އަދި އާ، ޞައްޙަ ދުނިޔޭގެ ނިޒާމެއް އުފަންވާންޖެހޭނީ މި އަޣުލަބިއްޔަތުގެ ތެރެއިންނެވެ.

އެއްވެސް ޝައްކެއް ނެތް ގޮތުގައި، މި އާ ދުނިޔޭގެ ނިޒާމުގެ ބަނޑުހައިހޫނުކަމަކީ ފިލާނެ އެއްޗެއް ނޫނެވެ. އީރާނު ބަލިކޮށް، ބަލިކަށިކޮށް، ކޮންޓްރޯލްގެ ދަށަށް ގެނެވުމުން، މި އެމްޕަޔަރުގެ ނަޒަރު މަޑެއް ނުވާނެއެވެ. ދެން އެނބުރޭނީ އެހެން ދިމާލަކަށެވެ. މަޑުމަޑުން އެ ނަޒަރު ތުރުކީއަށް ހުއްޓޭނެއެވެ. ތުރުކީއަކީ އެހެން ބައެއްގެ އަޅަކަށްވާން ދެކޮޅުހަދާ ސަރަހައްދީ ބާރެކެވެ. ދެން އެ ނަޒަރު މިޞްރަށް ހުއްޓޭނެއެވެ. މިޞްރަކީ އޭގެ ތާރީޚާއި ބަރުދަނުގެ ސަބަބުން އެ ސަރަހައްދުގެ މުހިންމު ބާރެކެވެ. އަދި މެދުއިރުމަތި އަލުން ބައްޓަންކުރުމަށް ހުރަސްއަޅާ ކޮންމެ ބަޔަކަށް މި ނަޒަރު ހުއްޓޭނެއެވެ.

އީރާނަށް ދޭ ހަމަލާއަކީ މުޅި ގްލޯބަލް ސައުތަށް އަމާޒުކޮށް ފޮނުވާލެވޭ އިންޒާރެކެވެ. އެއީ މިނިވަންކަމާއި ސިޔާދަތަކީ ހަމައެކަނި ބޯލަނބާ މީހުންނަށް ދެވޭ އިމްތިޔާޒެއް ކަމަށް ބުނެ ކުރެވޭ އިޢުލާނެކެވެ. ހުސް ވާހަކަދެއްކުމުގެ ވަގުތު ފާއިތުވެއްޖެއެވެ. އިންސާފުވެރި، އަދި ޝަރަފުވެރި އާ ދުނިޔެއެއް ބިނާކުރުމުގެ ވަގުތަކީ މިއީއެވެ.