ފާއިތުވި ދިހަވަރަކަށް އަހަރުދުވަސް ތެރޭގައި 200 ވަރަކަށް ގޯތި ވެލިދޫގެ ބިމުން އެރަށު ރައްޔިތުންނަށް ދޫކޮށްފައި ވާއިރު، އެ ގޯތިތަކުގެ ތެރެއިން މީހުން ދިރިއުޅެން ފަށާފައި ވަނީ އެންމެ ބާރަވަރަކަށް ގޯތީގައި ކަމަށް ވުމުން، ބާކީ ހުރި ގޯތިތަކުގައި ވެސް އިމާރާތް ކުރެވޭނެ ފަސޭހަމަގެއް ގާއިމްކުރުން މުހިންމު ކަމަށް ވެލިދޫ ކައުންސިލްގެ ރައީސް އާތިފް ހުސެއިން ފިޔެސް އާ ވާހަކަދައްކަވަމުން ވިދާޅުވިއެވެ.

އެހެންކަމުން، މި މަޝްރޫއުގެ ދަށުން ފުރަތަމަ އިސްކަން ދޭނީ، ވެލިދޫ ރައްޔިތުންނަށް ކުރިން ދޫކޮށްފައި ހުރި ގޯތިތަކުގެ ތެރެއިން ނުހެދިވާ ގޯތިތަކުގައި އިމާރާތް ކުރުމަށް ކަމަށް ވާއިރު، އެ ކޮންސެޕްޓަށް އެކަން ކުރުމަށްޓަކައި އިރާދަކުރެއްވިއްޔާ ކުރިއަށް އޮތް މަހެއްހާ ދުވަސްތެރޭގައި އިއުލާންކުރާނެ ކަމަށް ވެސް އާތިފް ހުސެއިން ވިދާޅުވިއެވެ.

ފުރަތަމަ، ތިން ކޮޓަރީގެ އެޕާޓްމެންޓްތަކެއް އެޅުމަށް ފެށި މި މަޝްރޫއުގެ ދަށުން އެންމެ ފުރަތަމަ އަޅާ މޮކަޕް ރޯހައުސް އެޅުމުގެ މަސައްކަތް އިފްތިތާހު ކުރުމުގެ ރަސްމިއްޔާތުގައި ރޯހައުސްގެ ބިންގާ އަޅުއްވައިދެއްވީ، ވެލިދޫ ކައުންސިލްގެ ރައީސް އާތިފް ހުސެއިން އާއި ވެލިދޫ ލޯކަލް އޮތޯރިޓީގެ އެމްޑީ (މެނޭޖިންގ ޑިރެކްޓަރ) އަބްދުﷲ އަލީ އެވެ.

ސޯޝަލް ހައުސިން ވެލިދޫގައި އިފްތިތާހުކުރުމަށްޓަކައި މޮކަޕް ރޯހައުސްގެ ބިންގާއެޅުމަށް ބޭއްވި ރަސްމިއްޔާތުގައި ކައުންސިލް ރައީސް އާތިފް ހުސެއިން ވާހަކަދައްކަވަނީ - ފޮޓޯ: ވެލިދޯ ލޯކަލް އޮތޯރިޓީ

ސޯޝަލް ހައުސިންގެ ގޮތުގައި ކުރިއަށް ގެންދާ މި މަޝްރޫއުއަށް ޝަރުތު ހަމަވާ ފަރާތްތަށް ބެލުމުގައި ޕޮއިންޓު ދޭ އުސޫލުތައް، މީގެ މަހެއްހާ ދުވަސް ކުރިން އާންމުކޮށް އެ އުސޫލަށް ރައްޔިތުންގެ ހިޔާލު ހޯދުމަށް ފުރުސަތު ވެސް ހުޅުވާލާފައި ވާނެކަމަށް ވިދާޅުވެ އާތިފް ވިދާޅުވީ، މި އިމާރާތްކުރާ ރޯހައުސްތައް ދޫކުރާނީ އެންމެ ގިނަވެގެން ގާތް ގަނޑަކަށް ވިހި އަހަރު ދުވަހުން ފައިސާދައްކާ ހަލާސްކުރާގޮތަށް ކަމަށާ، އެހެންކަމުން އެއީ މަހެއްގެ މައްޗަށް 5000 އާއި 7000 ރުފިޔާއާ ދެމެދުގެ އަދަދެއް ދައްކާ ގޮތަށް އެކުލަވާލެވޭ އިންސްޓޯލްމެންޓް ޕްލޭނެއް ކަމަށެވެ.

ސޯޝަލް ހައުސިން ވެލިދޫގައި އިފްތިތާހުކުރުމަށްޓަކައި މޮކަޕް ރޯހައުސްގެ ބިންގާއެޅުމަށް ބޭއްވި ރަސްމިއްޔާތުގެ ތެރެއިން - ފޮޓޯ: ވެލިދޯ ލޯކަލް އޮތޯރިޓީ

ވެލިދޫ ލޯކަލް އޮތޯރިޓީ ކޮމްޕެނީއާ ހަވާލުކޮށްގެން ކުރިއަށްގެންދާ މި މަޝްރޫއުގެ އަމަލީ މަސައްކަތް، އަމިއްލަ ތަކެތީގައި ކުރިއަށް ގެންދަނީ، ކޮންސްޓްރަކްޝަން މަސައްކަތްތައް ފުޅާ ދާއިރާއެއްގައި ކުރިއަށްގެންދާ ކުންފުންޏެއް ކަމަށްވާ ސޯލްޓެޑް ފައިބަރ ވޯކްސްގެ ފަރާތުންނެވެ.

އެ ކުންފުންޏަކީ ސަރުކާރުގެ އެކިއެކި މަޝްރޫއުތަކާއި، ބޮޑެތި ރިސޯޓް ބްރޭންޑްތަކުގެ މަޝްރޫއުތައް ވެސް ހިންގުމުގެ ތަޖުރިބާކާރު މާޒީއެއް އޮތް ކުންފުންޏެކެވެ.

ވެލިދޫގެ ހުޅަނގު ދެކުނު ފަރާތުގައި ބިންގާއެޅި މި މޮކަޕް ރޯހައުސް އިމާރާތްކުރުމުގެ މަސައްކަތް 3 މަސް ދުވަހުގެ ތެރޭގައި ނިންމާލުމަށް ވަނީ ހަވާލުކޮށްފައެވެ.