ޔަހޫދީ އިސްރާއީލާއި އެމެރިކާ ގުޅިގެން އިރާގާ ދެކޮޅަށް މިހާރު ހިންގަމުންދާ ހަނގުރާމައިގެ ސަބަބުން ރާއްޖެއަށް ދިމާވެދާނެ ކުއްލި ހާލަތަކަށް ތައްޔާރުވުމަށްޓަކައި މަޝްވަރާކުރުވުމުގެ ގޮތުން، ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީގެ ބައްދަލުވުމެއް ބާއްވަދިނުމަށް ގަލޮޅު އުތުރު ދާއިރާގެ އެމްޑީޕީ އަށް ނިސްބަތްވެ ވަޑައިގަންނަވާ މެންބަރު މުހައްމަދު އިބްރާހިމް (ކުޑޫ) އެދިވަޑައިގެންފިއެވެ.

މިކަމަށް އެދިވަޑައިގެން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް އެޑްރެސްކުރައްވާ ކުޑޫ ފޮނުއްވި ސިޓީގައި ވިދާޅުވީ، މެދުއިރުމަތީގައި ހިނގަމުންދާ ހަނގުރާމައިގެ އަސަރުތައް ދިވެހިރާއްޖެއަށް ކުރިމަތިވާން ފަށައިފައިވީ ހިނދު، އަޅުގަނޑުމެންގެ މިހާރުގެ މާލީ ހާލަތާއި، ފުދުންތެރިކަމާއި، ތެލާއި، ގެހާއި، ބޭހާއި އަދި ކާބޯތަކެއްޗަށް ކުރަންޖެހޭ ހަރަދުތައް ހަމަޖެއްސުމާމެދު އަންނަނިވި ކަންކަން ފާހަގަކުރެވޭތީ، އެކަމުގެ ސަބަބުން ގައުމުގެ ސަލާމަތަށް ނުރައްކާވެދާނެ ހާލަތަކަށް ގޮސްފާނެކަމަށް ލަފާކުރެވޭ ކަމަށެވެ.

އެގޮތުން އެ ސިޓީގައި 6 ކަމެއް ކުޑޫ ފާހަގަކުރައްވާފައި ވާއިރު އެ ކަންތައްތައް ތިރީގައި އެވަނީއެވެ:

1. ދުނިޔޭގެ ބާޒާރުގައި ސާފުނުކުރާ ތެޔޮފީފާއެއްގެ އަގު މިއަދު ހުރީ 112 ޑޮލަރުގައި އަދި އަގު ދަނީ އުފުލެމުން.
2. ދިވެހިރާއްޖެއަށް ކޮންމެ މަހަކު 330،000 ފީފާގެ ތެޔޮ ބޭނުންވޭ.
3. މިހަނގުރާމަ ފެށުނު އިރު ތެޔޮ ގަތުމަށް ކޮންމެ މަހަކު އެވްރެޖްކޮށް 30 މިލިއަން ޑޮލަރު ހޭދަކުރި ނަމަވެސް މިއަދަދު މަހަކު 50 މިލިއަން ޑޮލަރާއި 60 މިލިއަން ޑޮލަރަށް މައްޗަށް ދާނެ ކަމަށް ލަފާކުރެވޭ.
4. އަސާސީ އެހެނިހެން ތަކެއްޗާއެކު ޖުމްލަ އިމްޕޯޓަށް ކޮންމެ މަހަކު މަދުވެގެން 100 މިލިއަން ޑޮލަރު ބޭނުންވޭ.
5. ޔޫޒަބަލް ރިޒާވްގައި ހުރީ 240 މިލިއަން ޑޮލަރު. މިއީ، އެންމެ 2 މަހާއި ބަޔަށް ބޭނުންކުރެވޭ ވަރުގެ އަދަދެއް.
6. ޓޫރިޒަމަށް މިވަނީ ބޮޑު ލޮޅުމެއް އަރާފަ. ކޮންމެ ދުވަހަކު އެތައް ހާސް ބުކިންތަކެއް ދަނީ ކެންސަލް ކުރަމުން.

މިކަންކަން ފާހަގަކުރެއްވުމަށް ފަހު، ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީގެ ބައްދަލުވުމެއް ބާއްވައިދިނުމަށް އެދި ދެންނެވި ސަބަބެއް ކަމަށް ކުޑޫ ވިދާޅުވީ، ދިވެހި ރައްޔިތުންނަށް ބޭނުންވާ ޒަރޫރީ ބޭސް އަދި ކާބޯތަކެތި ފޯރުކޮށްދިނުމަކީ ދައުލަތުގެ ޒިންމާ އަކަށް ވީހިނދު، މިއަދު ދިމާވެގެން މިއުޅޭފަދަ ހާލަތުގައި މިކަންކަން ކަށަވަރު ކުރުމަކީ ރައްޔިތުންގެ މަޖިލީހުގެ މެންބަރެއްގެ ޒިންމާކަމުގައި ދެކޭތީވެ، މި ކަންކަމާގުޅޭ ގޮތުން މައުލޫމާތު އެއްކުރުމަށާއި، ކުރިއާލާ އަޅާންޖެހޭ ފިޔަވަޅުތައް ދެނެގަތުމަށް މަޝްވަރާކުރުމަށްޓަކައި ކަމަށެވެ.