އެމްޑީޕީގެ ރައީސް ޢަބްދުالله ޝާހިދު - ފޮޓޯ: އެމްޑީޕީ
މަޖާޒީ ބަހެއް ބޭނުންކުރީ، ލޯފަންމީހުންގެ ކަރާމަތަށް އުނިކަމެއް ރައްދުކުރުމަކަށް ނޫން
ދިވެހި ބަސް ފޮތުގައި ހުރި މިފަދަ ހުރިހާ ބަހެއް، އެފޮތުން އުނިކޮށްދިނުމަށް ޝާހިދު އެދިވަޑައިގެންނެވި
ޖުނާން އަޙުމަދު 30 މާރޗް 2026 (ހޯމަ) 14:14
މި ފެށޭ އޭޕްރީލް މަހުގެ 4 ވަނަ ދުވަހު އޮންނަ ލޯކަލް ކައުންސިލް އިންތިހާބުގެ ކެމްޕޭންގެ ތެރޭގައި، މި ސަރުކާރަށް ނިސްބަތް ކުރައްވައި ބޭނުން ކުރެއްވި ބަހަކީ ދިވެހި ބަހުގެ މަޖާޒީ ބަހެއް ބޭނުން ކުރެއްވުމުގެ ނިޔަތުގައި ވިދާޅުވި ވާހަކައެއް ކަމަށާ، އެހެން ވިދާޅުވުމުގައި ލޯފަން މީހުންގެ ކަރާމަތަށް އުނިކަމެއް ރައްދު ކުރުމުގެ އެއްވެސް ނިޔަތެއް ނެތް ކަމަށް އެމްޑީޕީގެ ރައީސް އަބްދުﷲ ޝާހިދު މިއަދު ވިދާޅުވެއްޖެއެވެ.
ހޮނިހިރު ދުވަހުގެ ރޭ "ފަހިފެހި ތިނަދޫ ސިޓީ މެނިފެސްޓޯ އިފްތިތާހްކުރުން" ނަމުގައި އެ ސިޓީގައި ކުރިއަށް ގެންދިޔަ ޖަލްސާގައި، މި ސަރުކާރަށް ނިސްބަތް ކުރައްވައި، ޝާހިދު ވިދާޅުވެފައި ވަނީ، މިއީ "ކަނަކު އިޝާނަމާދަށް ދާހެން ލާހޫރެމުންދާ" ސަރުކާރެއް ކަމަށް ސިފަ ކުރައްވާ ކަމަށެވެ.
އެ ޖަލްސާގައި، ޝާހިދު ބޭނުން ކުރެއްވި ބަހަކީ ޒަމާނުއްސުރެ ދިވެހިން ބޭނުން ކުރަމުން އަންނަ މަޖާޒީ ބަހެއް ނަމަވެސް، ބަޔެއް ފަރާތްތަކުން އެކަމާ ކަންބޮޑުވުން ފާޅު ކުރަމުންދާތީ، ޝާހިދު މިއަދު މީސް މީޑިޔާގައި ކުރެއްވި ޕޯސްޓެއްގައި ވިދާޅުވީ، އެގޮތަށް މި ސަރުކާރު ސިފަ ކުރެއްވީ، މި ސަރުކާރުން ކަންކުރަމުންދާ ގޮތް މަޖާޒީ ބަހަކުން ދެންނެވުމުގެ ނިޔަތުގައި ކަމަށެވެ.
އަދި އެ ބަސް ބޭނުން ކުރެއްވިފައިވާތީ ލޮލުގެ ފެނުމުން މަޙްރޫމް ވެފައިވާ ހުރިހާ ފަރާތްތަކާއި އެ ފަރާތްތަކުގެ އާއިލާތަކުގެ ކިބައިން "ދީލަތި މައާފަކަށް" އެދި ވަޑައިގެން ޝާހިދު ވިދާޅުވީ، އެގޮތަށް ވިދާޅުވީ ލޮލުގެ ފެނުމުން މަހުރޫމުވެފައިވާ މީހުންގެ ކަރާމާތަށް އުނިކަމެއް ރައްދު ކުރުމުގެ ނިޔަތުގައި ނޫންކަމަށެވެ.
"ލޯކަލް ކައުންސިލް އިންތިހާބުގެ ކެންޕެއިން ޖަލްސާއެއްގައި، މިއަދުގެ ސަރުކާރުން ކަންކުރާގޮތް ސިފަކޮށްދިނުމުގެ ގޮތުން ބޭނުންކުރި ދިވެހި ބަހުގެ މަޖާޒީ މިސާލު ބަހަކީ ލޮލުގެ ފެނުމުން މަހުރޫމުވެފައިވާ މީހުންގެ ކަރާމާތަށް އުނިކަމެއް ރައްދު ކުރުމުގެ ނިޔަތުގައި ބޭނުންކުރި ބަހެއް ނޫނެވެ. އެހެން ނަމަވެސް ދިވެހިބަހުގެ ޒަމާންވީ މިބަސް އަޅުގަނޑަށް ބޭނުން ކުރެވިފައިވާތީ ލޮލުގެ ފެނުމުން މަހްރޫމްވެފައިވާ އެންމެ ބޭފުޅުންގެ އަރިހުން މައާފަށް އެދެމެވެ." - ޝާހިދު
އަދި ދިވެހި ބަސްފޮތުގައި ހުރެދާނެ މިފަދަ ހުރިހާ ބަސްތަކެއް އުނި ކުރުމަށް ސަރުކާރުގެ ކަމާބެހޭ އިދާރާތަކަށް ގޮވާލައްވާ ޝާހިދު ވިދާޅުވީ، އަދި މިކަމުގައި އެބޭފުޅާއާ އެކުގައި ހުރިހާ ރައްޔިތުންވެސް ބައިވެރިވުމަށް އެދިވަޑައިގަންނަވާ ކަމަށެވެ.
ކޮމެންޓް
