ރައީސް ނަޝީދު މިފަދައިން އެދިވަޑައިގެންފައި ވާއިރު، ރައީސް ނަޝީދު ވިދާޅުވާފަދަ "އަނެއް ދިވެހިރާއްޖެ" ހޯދަން މިހާރު ޖެހިއްޖެ ކަމަށް، މިދިޔަ ބުރާސްފަތި ދުވަހުގެރޭ ޕީއެންއެފް އިން ބޭއްވި ޖަލްސާއެއްގައި ރައީސް ޔާމީން ވެސް ވަނީ ވިދާޅުވެފައެވެ.

އަދި ސަރުކާރު ހިންގާ ޕާޓީ ޕީއެންސީ ނޫން އެހެން ހުރިހާ ކެންޑިޑޭޓުންނަށް ކައުންސިލު އިންތިހާބުގައި ތާއީދުކުރައްވާ ކަމަށް ވެސް 'ޗަގޯސް'ގެ ނަމުގައި ޕީއެންއެފް އިން ބޭއްވި ޖަލްސާގައި އެމަނިކުފާނު ވަނީ ތަކުރާރުކޮށް ވިދާޅުވެފައެވެ.

އެމްޑީޕީގެ ކެންޑިޑޭޓުންނަށް ތާއީދު ހޯއްދެވުމުގެ ގޮތުން ކައުންސިލް އިންތިހާބުގެ ކެމްޕޭނުގައި ރަށްރަށަށް ރައީސް ނަޝީދު ކުރައްވަމުން ގެންދަވާ ދަތުރުފުޅުތަކުގެ ތެރެއިން، ގދ. ހޯނޑެއްދުއަށް މިއަދު ވަޑައިގެން، އެ ރަށުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުކަމަށް އަމިއްލަގޮތުން ކުރިމަތިލެއްވި ޝަކީބާ އަބްދުالله އަށް ވޯޓުދެއްވުމަށް ނަޝީދު ވަނީ އެދިވަޑައިގެންފައެވެ.

ހޯނޑެއްދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުކަމަށް ޝަކީބާ އަމިއްލަގޮތުން ވާދަކުރެއްވި ނަމަވެސް، ޝަކީބާ އަކީ، ޕީއެންއެފްގެ ތާއީދާ އެކުގައި ނުކުންނެވި ކެންޑިޑޭޓެއް ކަން ފާހަގަކޮށްލެވެއެވެ.

އެމްޑީޕީ މެންބަރުން ޝަކީބާއަށް ތާއީދު ކުރެއްވުމަށް އެދިވަޑައިގެން ނަޝީދު މިއަދު ވިދާޅުވީ، ޕީއެންއެފްގެ ކެންޑިޑޭޓުން ނެތް ރަށްރަށުގައި، އެ ޕާޓީގެ މެންބަރުން އެމްޑީޕީގެ ކެންޑިޑޭޓުންނަށް ވޯޓުދެއްވުމަށް އެދިވަޑައިގަންނަވާ ކަމަށާ، އެމްޑީޕީގެ ކެންޑިޑޭޓުން ނެތް ރަށްރަށުގައި ޕީއެންއެފްގެ ކެންޑިޑޭޓުންނަށް އެމްޑީޕީ މެންބަރުން ތާއީދުކުރައްވާ ވޯޓުދެއްވުމަށް އެދިވަޑައިގަންނަވާ ކަމަށެވެ.

ރައީސް ނަޝީދު ސިޔާސީ ތަގުރީރުތަކުގައި ވަރަށް ގިނައިން ވިދާޅުވާ އަދި އެމްޑީޕީގެ އެކި އެކި ސްލޯގަން ތަކުގައި ބޭނުން ކުރަމުން އަންނަ "އަނެއް ދިވެހިރާއްޖެ" މި ލަފްޒު ތަކުރާރުކޮށް ބޭނުން ކުރައްވާ، ރައީސް ޔާމީން ޕީއެންއެފްގެ ޖަލްސާގައި ވިދާޅުވެފައި ވަނީ، ކޮންމެ ވާހަކައެއް ވެސް، އެވާހަކައަކީ ރައީސަކު ވިދާޅުވެއްޖެ ނަމަ އެކަން ސީރިއަސްކޮށް ނަގަން އެބަޖެހޭ ކަމަށެވެ.

ރާއްޖޭގެ އަދުލު އިންސާފުގެ ނިޒާމަކީ ކޮރަޕްޝަނަށް ވުރެ ބޮޑަށް ފުނޑިފައި އޮތް ތަނެއްކަމަށް ވިދާޅުވެ، ރައީސް ޔާމީން ވިދާޅުވީ މިހާތަނަށް ރާއްޖޭގައި ކަންކަން ހައްލުކުރަން ބަރޯސާވަމުން އައީ ޝަރުއީ ނިޒާމަށް ކަމަށާ، ދިވެހިރާއްޖެ ހަލާކުކުރީ ދިވެހިރާއްޖޭގެ ވެރިން ކަމަށް އަދި ޝަރުއީ ނިޒާމު މިއަދު އޮތް ހާލަތަށް ހަލާކުކޮށްލީ ޚުދު ޝަރުއީ ނިޒާމުގެ ވެރިން ކަމަށެވެ.