އާދަމް އާޒިމް އާއި ޒަރިޔަންދުގެ ރޭގެ ކެންޕެއިން އިވެންޓުގެ ތެރެއިން - ފޮޓޯ: މީސްމީޑިއާ
އާދަމް އާޒިމް އަދި ޒަރިޔަންދުގެ ކެންޕެއިން އިވެންޓުން ކަރަންޓު ކަނޑާލައިފި
ޖުނާން އަޙުމަދު 1 އޭޕްރީލް 2026 (ބުދަ) 12:47
އަންނަ ހޮނިހިރު ދުވަހު ބާއްވާ، ލޯކަލް ކައުންސިލް އިންތިހާބުގައި މާލެ ސިޓީގެ މޭޔަރު ކަމަށް އެމްޑީޕީގެ ފަރާތުން ވާދަކުރައްވާ ކެންޑިޑޭޓް އާދަމް އާޒިމް އާއި ރައީސް ޔާމީން ތާއީދާއެކުގައި، އަމިއްލަގޮތުން ވާދަކުރައްވާ ކެންޑިޑޭޓް އިސްމާއިލް ޒަރިޔަންދުގެ ކެންޕެއިން އިވެންޓު ކުރިއަށްދަނިކޮށް ކަރަންޓު ކަނޑާލައިފި އެވެ.
އެމްޑީޕީން ވެސްޓް ޕާކް ސަރަހައްދުގައި ރޭ ބޭއްވި ކެމްޕެއިން އިވެންޓުން ކަރަންޓު ކަނޑާލުމާ ގުޅިގެން އާޒިމް ވިދާޅުވެފައި ވަނީ، ޕާޓީގެ ހުރިހާ އަމާޒެއް ހުރީ ރައްޔިތުންނަށް ހިދުމަތްކޮށްދިނުމުގެ ނިޔަތުގައި ކަމަށާ، އެމްޑީޕީއަށް ކުރާ ޖެއްސުމަށް ބެލުމެއް ނެތި ބާރަށް ކުރިއަށް ގޮސް މި އިންތިހާބު ކާމިޔާބުކުރާނެ ކަމަށެވެ.
"އެމްޑީޕީއަކީ ކުރާ ޖެއްސުމަކަށް، ދައްކާ ބިރަކަށް ފަހަތަށް ޖެހޭނެ ބައެއް ނޫންކަން އަޅުގަނޑުމެން މިހާރު މި އިންތިހާބުގައި ވަނީ ދައްކާފައި، އަޅުގަނޑުމެންގެ ފޯކަސްއަކީ ރައްޔިތުންނަށް ހިދުމަތް ކޮށްދިނުން،" – އާދަމް އާޒިމް
ޒަރިޔަންދުގެ ކެމްޕެއިން އިވެންޓުން ބާއްވާފައި ވަނީ ރަސްފަންނު ސަރަހައްދުގައި ހުންނަ ބަނާނާ ލީފްގައި ރޭގެ ވަގުތެއްގައެވެ. އެ ތަނުން ވެސް ކަރަންޓު ކަނޑާލުމާ ގުޅިގެން ޕީއެންއެފްގެ ނައިބުރައީސް މުހައްމަދު ޖަމީލް އަހުމަދު ވިދާޅުވީ މެނިފެސްޓޯ ހުށަހަޅަމުންދަނިކޮށް ކަރަންޓު ކަނޑާލުމުން ދޭހަވަނީ މުހައްމަދު މުއިއްޒު ބިރު ގަނެފައިވާ މިންވަރު ކަމަށެވެ.
"މާލޭ މޭޔަރު ކެންޑިޑޭޓު ޒަރިޔަންދުގެ މެނިފެސްޓޯ ހުށަހަމުން ދަނިކޮށް ސްޓެލްކޯއިން ގަސްދުގައި މިރޭވެސް ކަރަންޓު ކަނޑާލި ކަނޑާލުމުން ދޭހަވަނީ މުއިއްޒު ރައްޔިތުން ދެކެ އަދި ހާއްސަކޮށް ޒަރިޔަންދު ދެކެ ބިރުގަނެފައިވާ މިންވަރު" – މުހައްމަދު ޖަމީލް އަހުމަދު
މި ދެ ކެމްޕެއިން އިވެންޓު ބޭއްވި ސަރަހައްދުން ކަރަންޓު ކެނޑެން މެދުވެރިވީ، ޓްރާންސްފޯމަރެއް ނިވިގެން ކަމަށާ، ނަމަވެސް އެ މައްސަލަ ފަހުން ވާނީ ހައްލުކޮށްފައިކަމަށް ވެސް ސްޓެލްކޯއިން ބުނެފައި ވެއެވެ.
ކޮމެންޓް
