ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް - ފޮޓޯ: ޕީއެންއެފް
ރައްޔިތުން އެމްޑީޕީއަށް ދިން ބާރާއެކު ގައުމުގައިހުރި މައްސަލަތައް ހައްލުކޮށްދޭންޖެހޭ
ޖުނާން އަޙުމަދު 7 އޭޕްރީލް 2026 (އަންގާރަ) 15:37
ރައްޔިތުން އެމްޑީޕީއަށް ދިން ބާރާއެކު، އެ ޕާޓީ މިހާރު އޮތީ ޒިންމާދާރު ހިސާބެއްގައި ކަމަށްވާތީ، ގައުމުގައިހުރި މައްސަލަތައް އެމްޑީޕީން ހައްލުކޮށްދިނުމަށް ރައްޔިތުންގެ ފަރާތުން ވަރަށް އިހުލާސްތެރިކަމާއެކީ ގޮވާލައްވާ ކަމަށް ކުރީގެ ރައީސް ޢަބްދުالله ޔާމީން ވިދާޅުވެއްޖެއެވެ.
"އެހެންވީމާ އަޅުގަނޑުމެން އެމްޑީޕީއަށް މިއަދު ވަރަށް އިޚުލާސްތެރިކަމާއެކީ، އަދި ރައްޔިތުންގެ ފަރާތުން މި ގޮވާލަނީ މިހެން ހުރި މައްސަލަތައް ހައްލުކޮށްދެއްޗޭ،" – ރައީސް ޔާމީން
ޕީއެންއެފުން ރޭ ބޭއްވި ޓައުންހޯލް ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ، ނިމިދިޔަ ލޯކަލް ކައުންސިލު އިންތިހާބަށް ފަހު، އިދިކޮޅު އެމްޑީޕީ މިއަދު އޮތީ ރައީސް މުއިއްޒުގެ ސަރުކާރު ޒިންމާދާރުކުރުވޭނެ ހިސާބެއްގައިކަމަށް ވާއިރު، ރައްޔިތުންނަށް ދިމާވާ މައްސަލަތައް ހައްލުކޮށްދޭންޖެހޭ ކަމަށެވެ.
ޔާމީން ވިދަޅުވީ، ޕީއެންސީއަށް ރައްޔިތުންގެ މަޖިލީހުގެ އަގުލަބިއްޔަތު ދިނުމުން ވެސް ރައްޔިތުންގެ ހައްގުތައް ހިމާޔަތްކޮށް، ރައްޔިތުންގެ މަސްލަހަތުގައި ކުރި އެއްވެސް ކަމެއް ނެތް ހިނދު، ޕީއެންސީއަށް ކައުންސިލްތަކުގެ އަގުލަބިއްޔަތު ދިންނަމަ، ރައްޔިތުން މާ ނިކަމެތިވާނެ ކަމަށެވެ. އަދި ޕީއެންސީއަށް ކައުންސިލުތައް ނުދިނުމަށް ރައްޔިތުންނަށް ގޮވާލެއްވީ އެ ސަބަބާ ހެދި ކަމަށެވެ.
"މިއަދު އެމްޑީޕީ ތިތިބީ ޒިންމާދާރު ޕޮޒިޝަނެއްގައޭ، ކޮންމެހެން ސަރުކާރު ހިންގާކަށް ނުޖެހޭ ރައްޔިތުންނަށް ހިދުމަތްކުރާކަށް، އެހެންވީމާ މިހާރު މި ސަރުކާރުން ހިންގާ ގޯސްތައް ރައްޔިތުން މި ތިބީ ބަލާށޭ،" – ރައީސް ޔާމީން
އެންޓި-ކޮރަޕްޝަން ކޮމިޝަނާއި އޮޑިޓަރު ޖެނެރަލުގެ އޮފީހާއި ކޯޓުތަކުގައި ތާށިވެފައި ހުރި ބައިވަރު މައްސަލަތައް ހައްލުކުރުމާއި، މި ސަރުކާރާ ހެދި އަގުޅިޖެހިފައިވާ ތަންތަން ނިއުޅައިލުމުގެ ބާރު ވެސް ރައްޔިތުން ދިނީ އެމްޑީޕީއަށް ކަމަށް، ރޭގެ ޖަލްސާގައި ޔާމީން ވަނީ ވިދާޅުވެފައެވެ.
ކޮމެންޓް
