ވެލިދޫ ދާއިރާގެ މެންބަރު މުހައްމަދު އައްބާސް، މިއަދުގެ މަޖިލީހުގައި - ފޮޓޯ: މަޖިލިސް
ވެލިދޫ ދާއިރާގެ ގޮނޑިތައް ސަރުކާރަށް ގެއްލުވާލުމަކީ އެމްޑީއޭއިން ބޭނުންވިގޮތް
"ވެލިދޫ ދާއިރާގެ ގޮނޑިތައް އެހެރީ އެމްޑީއޭއިން ބޭނުންވިގޮތަށް ނިންމާފަ، އަޑަށް ބާރުލާފަ މި ދަންނަވަނީ" - އައްބާސް
މުޙައްމަދު ޤާސިމް 13 އޭޕްރީލް 2026 (ހޯމަ) 19:36
ނިމިދިޔަ ލޯކަލްކައުންސިލާއި ޑަބްލިޔުޑީސީ އިންތިހާބުގައި، ވެލިދޫ ދާއިރާގެ ގޮނޑިތައް ސަރުކާރަށް ގެއްލުވާލުމަކީ އެމްޑީއޭއިން އެކަން ކުރަންބޭނުންވި ގޮތްކަމަށް، ވެލިދޫ ދާއިރާގެ މަޖިލިސް މެންބަރު މުހައްމަދު އައްބާސް ވިދާޅުވެއްޖެއެވެ.
ދުވަސްތަކަކަށްފަހު، މިއަދު ބޭއްވި މަޖިލިސް ޖަލްސާގައި، ސަރުކާރުގެ ފަރާތުން، ކުޅުދުއްފުށީ ދެކުނު ދާއިރާގެ މެންބަރު ފަރުހަތު މުހައްމަދު ހުށަހަޅުއްވާފައިވާ، ވަތަނީ ހިދުމަތުގެ ބިލަށް ބަހުސް ކުރައްވާ ވާހަކަ ދައްކަވަމުން އައްބާސް ވިދާޅުވީ، ވެލިދޫ ދާއިރާގެ ގޮނޑިތައް އެހެރީ އެމްޑީއޭއިން ބޭނުންވިގޮތަށް ނިންމާފައި ކަމަށް އަޑަށް ބާރުލާފައި ދަންނަވާ ކަމަށާ، އެ ދާއިރާގެ ރައްޔިތުން މި ސަރުކާރަށް ނޫނެކޭ ބޮޑުތަނުން އެބުނީ ކީއްވެގެންތޯ ސަރުކާރުން ވިސްނަވާލައްވަން ވެއްޖެ ކަމަށެވެ.
"އިއްޒަތްތެރި ރައީސް، އަޅުގަނޑު ދާއިރާގެ ރައްޔިތުން ސަރުކާރަށް ނޫނެކޭ ބޮޑުތަނުން އެބުނީ ކީއްވެގެންތޯ ވިސްނަވާލައްވަވަންވީ، ދެންބުނަންވީ އެމްޑީއޭއަކަށް ހުރިހާ ގޮނޑިއެއް ނުލިބުނެއްނޫންތޯއޭ، އެމްޑީއޭއިން ކުރަންބޭނުންވި ގޮތަށް އެކަން ނިންމާފަ އެއޮތީ. ވެލިދޫ ދާއިރާގެ ގޮނޑިތައް އެހެރީ އެމްޑީއޭއިން ބޭނުންވިގޮތަށް ނިންމާފަ އިއްޒަތްތެރި ރައީސް، އަޑަށް ބާރުލާފަ މި ދަންނަވަނީ" - އައްބާސް
ފާހަގަކޮށްލެވޭ ގޮތުގައި، ނ.ވެލިދޫ ދާއިރާގެ ގިނަ ގޮނޑިތައް ކާމިޔާބުކޮށްފައި ވަނީ އިދިކޮޅު އެންމެބޮޑު ޕާޓީ އެމްޑީޕީންނެވެ. އެގޮތުން އެ ދާއިރާ ނިސްބަތްވާ އަދި ނ. އަތޮޅުން ވެސް އެންމެ އާބާދީ ބޮޑު ރަށް ކަމުގައިވާ ވެލިދޫގެ ކައުންސިލްގެ އެންމެ ގޮނޑިއެއް ފިޔަވާ ހުރިހާ ގޮނޑިއަކާއި ޑަބްލިޔުޑީސީގެ ވެސް ހުރިހާ ގޮނޑިއެއް ކާމިޔާބުކޮށްފައި ވަނީ އެމްޑީޕީންނެވެ.
ވެލިދޫ އިން އެމްޑީޕީއަށް ކާމިޔާބު ނުކުރެވުނު ގޮނޑި ކަމުގައިވާ، ވެލިދޫ ކައުންސިލްގެ އާންމު މެންބަރު ކަމުގެ ގޮނޑި ސަރުކާރު ހިންގާ ޕީއެންސީއަށް ކާމިޔާބު ކުރެވުނީ ވެސް ކުޑަ ތަފާތަކުން ކަން ފާހަގަކޮށްލެވެއެވެ.
ކޮމެންޓް
