ރޭ ވެސް ފެނަކަ އޮފީސް ދޮށުގައި އެރަށުގެ ރައްޔިތުން މުޒާހަރާކޮށްފައި ވާއިރު، މިއަދުގެ ރަސްމީ ގަޑީގައި ވެސް ގިނަ ރައްޔިތުން ދިޔައީ، އެތަނުގެ ވެރިންނާ ބައްދަލުކުރަން އެދި ވަރަށް ގިނައިރު ވަންދެން މަޑުކޮށްގެން އެ އިދާރާކައިރީގައި ތިބެފައެވެ.

މައުލޫމާތު ލިބޭގޮތުގައި އެގޮތަށް އެ ރައްޔިތުން ފެނަކަ އޮފީސް ކުރިމަތީގައި ތިބިނަމަވެސް އެއްވެސް ވެރިޔަކު އެކަމަށް އިޖާބަ ނުދިނުމުން އެތެރެއަށް އެ ރައްޔިތުން ވަދެގަތީއެވެ.

ފޯކައިދޫ ފެނަކަ ބްރާންޗުގައި މަސައްކަތްކުރާ 13 މުވައްޒަފަކު ވަޒީފާއިން ވަކިކުރުމާ ގުޅިގެން އެ ރަށުގައި ރޭ ކުރިއަށް ގެންދިޔަ މުޒާހަރާގައި ވަނީ ރައީސުލްޖުމްހޫރިއްޔާ މުހައްމަދު މުއިއްޒު އާއި ފޯކައިދޫ ފެނަކަ ބްރާންޗުގެ ވެރިންނާއި، ދާއިރާގެ މެންބަރުގެ އިސްތިއުފާއަށް އަދި އެރަށުގެ ޕީއެންސީ ސްޓެއަރިން ކޮމިޓީގެ މެންބަރުންގެ އިސްތިއުފާއަށް ވެސް ގޮވާލައިފައިކަން ފާހަގަކޮށްލެވެއެވެ.

އެކަމާގުޅިގެން ފޯކައިދޫ ކައުންސިލުން އިއްޔެ ނެރުނު ބަޔާނެއްގައި ވަނީ، އެއްވެސް އިންޒާރަކާ ނުލާ ކުއްލި ގޮތަކަށް 13 މުވައްޒަފުން ވަޒީފާއިން ވަކިކޮށް، 13 އާއިލާ ބިކަކޮށްލި މައްސަލަ ހަރުކަށި އިބާރާތުން ކުށްވެރިކުރާ ކަމަށާ، ވަޒީފާގެ ކަށަވަރުކަން ދެއްވާނެ ކަމަށް ވިދާޅުވެ ރައީސް މުއިއްޒު ވެވަޑައިގެންނެވި ރިޔާސީ ވައުދާ ހިލާފަށް، ކުންފުނި ރައިޓްސައިޒުކުރުމުގެ ނަމުގައި އިދިކޮޅު ސިޔާސީ ފިކުރުގެ މީހުން ބަލިކަށިކޮށްލުމަށް ވަކި ބަޔަކަށް އަމާޒުކޮށް ވަޒީފާއިން ވަކިކުރުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށެވެ.

މިއީ ސިޔާސީ ގޮތުން ރައްޔިތުން ބަލިކަށިކޮށް އަޅުވެތިކުރުމަށްޓަކައި އަޅަމުންދާ އަނިޔާވެރި ފިޔަވަޅުތަކެއް ކަމަށް ދެކޭ ކަމަށާއި، ވަޒީފާއިން ވަކިކުރި މުވައްޒަފުންނަށް އިންސާފު ހޯދައިދިނުމަށް ކަމާބެހޭ އެންމެހައި މުއައްސަސާތަކަށް ފޯކައިދޫ ކައުންސިލްގެ ބަޔާނުގައި ގޮވާލާފައި ވާއިރު، މިއަދު ފޯކައިދޫ ރައްޔިތުން އެ ރަށު ފެނަކަ އޮފީހަށް ވަތް ނަމަވެސް، އެއްވެސް ހަމަނުޖެހުމެއް ހިންގާފައި ނުވާކަން ފާހަގަކޮށްލެވެއެވެ.

އަދި ފުލުހުންގެ އެސްއޯ ޓީމެއް ވެސް މިހާރު އެ ރަށަށް ގޮސްފައިވާ ކަމަށާ، ނަމަވެސް، އެ ރަށު ފެނަކަ އޮފީހަށް ރައްޔިތުން ވަނުމުން، އެތަނުގެ ވެރިން ނުކުމެ ޖަވާބެއް ދިނުމުން މުޒާހަރާ މި ވަގުތަށް ނިންމާލާފައިވާ ކަމަށް ވެސް މައުލޫމާތު ލިބެއެވެ.