މިދިޔަ މަހު ތަސްދީގުކުރި އެއްގަމު ދަތުރުފަތުރުގެ އާ ގާނޫނުގައި، މާލެ އާއި ހުޅުމާލޭގެ ޓްރެފިކް ކަންކަމަށް "ގްރޭޓާ މާލެ ޓްރާންސްޕޯޓް އެންޑް މޯބިލިޓީ އޮފީސް" ގެ ނަމުގައި ވަކި އޮފީހެއް އުފައްދަން ޖެހެއެވެ.

އެ އޮފީހުގެ ވެރިޔަކަށް ކަސްޓަމްސްގެ މާނިއު އައްޔަނު ކުރިކަން އޭނާ ވަނީ މީޑިއާތަކަށް ޔަގީންކޮށް ދީފަ އެވެ. އެހެންނަމަވެސް މިކަމުގެ ތަފްސީލެއް އަދި ސަރުކާރުން ހާމައެއް ނުކުރެ އެވެ. 

މި ސަރުކާރުގައި މާނިއު އެންމެ ފުރަތަމަ އައްޔަން ކުރެއްވީ ކަސްޓަމްސްގެ ކޮމިޝަނާ ޖެނެރަލަކަށެވެ. 2023 ނޮވެމްބަރު 20 އިން 2024 ޖުލައި 22 އަށް އޭނާ އެ މަގާމު ފުރުއްވި އެވެ. އެ މަގާމުން އޭނާ ވަކި ކުރުމަށްފަހު، ހޯމްލޭންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރަކަށް ބަދަލު ކުރުމުން ދެ ދުވަހެއްގެ ތެރޭގައި އެ މަގާމުން އޭނާ އިސްތިއުފާ ދެއްވީ އެވެ. 

ގްރޭޓާ މާލެ ޓްރާންސްޕޯޓް އެންޑް މޯބިލިޓީ އޮފީހުގެ ޒިންމާތަކުގެ ތެރޭގައި؛

• މާލެ ސަރަހައްދުގެ އެއްގަމު ދަތުރުފަތުރުގެ ނިޒާމަށް ދިމާވެފައިވާ މައްސަލަތަކާއި މަގުތައް ތޮއްޖެހުމުގެ މައްސަލަ ހައްލުކުރަން ސިޔާސަތު ކަނޑައެޅުން
• އެއްގަމު ދަތުރުފަތުރުގެ ހަރުދަނާ ނިޒާމެއް ގާއިމްކުރަން އާބަން ޕްލޭނެއް ކަނޑައަޅައި މަގުތައް ތަރަައްގީކުރުން
• ޕަބްލިކް ޓްރާންސްޕޯޓްގެ އުސޫލުތައް ކަނޑައެޅުން
• މާލެ ސަރަހައްދަށް ވެހިކަލް ރަޖިސްޓްރީ ކުރުމުގެ ކޯޓާ ކަނޑައެޅުން. ރަޖިސްޓްރީ ބާތިލުކުރާ އުޅަނދުތަކުގެ 30 ޕަސެންޓަށް ވުރެ އިތުރުނުވާ މިންވަރަށް އުޅަނދު ރަޖިސްޓްރީކޮށްދިނުން
  
  

މާލެ ސަރަހައްދަށް ހާއްސަ އެ އޮފީސް ހިންގާނީ ޓްރާންސްޕޯޓް މިނިސްޓްރީގެ ދަށުންނެވެ.