ކުރީގެ ފޮރިން މިނިސްޓަރު ޢަބްދުﷲ ޝާހިދު
ޖިންސީ ގޯނާގެ ތުހުމަތުގައި އަބްދުالله ޝާހިދު ހައްޔަރުކޮށްފި
2 ނޮވެމްބަރ 2026 (ހޯމަ)   22:24
ކުޑަކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި ކުރީގެ ފޮރިން މިނިސްޓަރު އަބްދުالله ޝާހިދު، މީގެ ކުޑައިރުކޮޅެއް ކުރިން ހައްޔަރުކޮށްފި އެވެ.

އެމްޑީޕީގެ ރައީސްކަން ވެސް ކުރެއްވި އަދި އެ ޕާޓީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާން ކުރައްވައި ކެމްޕޭން ކުރައްވަމުން ގެންދަވާ ޝާހިދު ހައްޔަރުކުރީ މިރޭ 21:59 ހާއިރު ކަމަށް ފުލުހުން މައުލޫމާތު ދީފައި ވެއެވެ.

ފުލުހުން ހާމަކޮށްފައިވާ ގޮތުގައި ޝާހިދު ހައްޔަރުކުރީ އުމުރުން 18 އަހަރުން ދަށުގެ ކުޑަކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި ކޯޓު އަމުރެއްގެ ދަށުންނެވެ.

ހައްޔަރުކުރުމުގެ އިރުކޮޅެއް ކުރިން ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ އޭނާގެ ޝަހުސު ކަތިލުމަށް ސިޔާސީ ގޮތުން ފަތުރަމުންދާ ވާހަކަތަކަކީ އެއްވެސް އަސްލެއް ނެތް ދޮގެއް ކަމާއި މިފަދަ ސާބިތު ނުހިފޭ ވާހަކަ ނުފެތުރުމަށް އެންމެ ބޭފުޅުން އަރިހުން އެދޭ ކަމަށެވެ.

ޝާހިދު ހައްޔަރުކުރީ އޭނާ ދިރިއުޅުއްވާ ހުޅުމާލެ އޯޝަން ފްރޮންޓު ރެޒިޑެންސްގެ އެޕާޓްމަންޓު ބަލައި ފާސްކުރުމަށްފަހު، އެ އެޕާޓްމަންޓުންނެވެ. އެޕާޓްމަންޓުން ޝާހިދު ނެރެގެން ފުލުހުންގެ ވެހިކަލްގައި ފުރަތަމަ ގެންދިޔައީ ހުޅުމާލޭގައި ހުންނަ ފުލުހުންގެ މަރުކަޒަށެވެ. އޭގެ ބައިގަޑިއިރެއްހާއިރު ފަހުން ފުލުހުންގެ ކަސްޓަޑީ މަރުކަޒު ދޫނިދޫ އަށް ގެންދިޔައެވެ. 

ރައްޔިތުންގެ މަޖިލީހުގެ ރައީސް ކަމާއި އދ. ގެ ރައީސްކަން ވެސް ކުރެއްވި އުމުރުން 64 އަހަރުގެ ޝާހިދަށް ކުރާ ޖިންސީ ގޯނާގެ ތުހުމަތާ ގުޅޭ ގޮތުން ފުލުހުން ތަފުސީލީ ވާހަކަތަކެއް ނުދައްކައި ބުނީ، އެ މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.

ކޮމެންޓް
މުއިއްޒު2028
2 weeks ago
ޝާހިދުވިޔަސް އެފަދަ ތުހުމަތެއް ކުރެވޭނަމަ ބަލަންޖެހޭނެ. އިންސާފުވެރިކަމާއެކު ކުރިއަށް ގެންދަވާ.... ރައީސް މުއިއްޒު އަކީ އެއްވެސް ބޭފުޅަކަށް ބޭއިންސާފުވާނެ ބޭފުޅެއްނޫން.
އުމައިރު ޔާސިރު
2 weeks ago
ޝާހިދުގެ އަބުރު ކަތިލަން ފްރޭމްކުރުން. ކުރިއަށް މިއޮތްތާ މިކަހަލަ ކިތަންމެ ކަމެއް ފެންނާނެ. މުއިއްޒަށް 2028 ކާމިޔާބުކުރެވެން އޮތް ގޮތަކަށްވިއްޔާ ކަންކުރާނެ. ފުލުހުންނާއި ޕީޖީ އާއި ކޯޓުތައް ހުރީ މުއިއްޒު މުށުތެރޭގައި. މުއިއްޒާ ވާދަކުރާނެ ކޮންމެ މީހަކަށްމެ ކޮންމެވެސް ދައުވާއެއް ނުވަތަ ތުހުމަތެއްކޮށް އަގުވައްޓާލާނެ
ހައިތަމް
2 weeks ago
މިއީ އެމްޑީޕީގެ ރިޔާސީ ޕްރައިމަރީގައި ވާދަކުރާ ފަރާތްތަކަށް ރާވައިގެން ދޭ ހަމަލާއެއް ނޫންބާ!!!