އެދުވަހު ކްރިމިނަލް ކޯޓުގައި އޮތް ޝަރީއަތުގެ މަޖިލީހުގެ ދައުވާގެ ހުލާސާގައި ބުނެފައި ވާގޮތުން، ދައުލަތުގެ ފަރާތުން ދައުވާ އުފުލާފައިވަނީ ޏ.ފުވައްމުލައް-ހޯދަޑު/މައިޒާން، މަރްޔަމް ދީނާ ޞާލިޙު އާއި ގދ.ވާދޫ/މައިފޫނާ، އަޙްމަދު ސަޢީދު މުޙައްމަދުގެ މައްޗަށެވެ.

އެ ދެ ބޭފުޅުންގެ މައްޗަށްވެސް ދައުވާ އުފުލާފައިވަނީ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ކުށުގެ ދައުވާ އެވެ.

ދައުވާގެ ޚުލާސާގައި ބުނެފައިވާގޮތުން ދީނާގެ ބައި އެދުވަހު ކުރިއަށް ނުގެންދިޔައީ އޭނާގެ ބަލި ހާލަތު ހުރިގޮތުންނެވެ.

"މި މައްސަލައިގާ ހިމެނޭ މަރްޔަމް ދީނާ ޞާލިޙުގެ ބަލި ހާލަތު ހުރިގޮތުން، އެފަރާތުން ޝަރީއަތަށް ހާޒިރުވާން އުޒުރުވެރިވާ ކަމަށް ބުނެ މެޑިކަލް ލިޔެކިޔުންތަކެއް ހުށަހަޅާފައިވާތީ، މަރްޔަމް ދީނާ ޞާލިޙުގެ ބައި 5 ދުވަސް ފަހުން ކުރިއަށް ގެންދާ ގޮތަށް ނިންމައި، މި ގަޒިއްޔާގައި ގޮތެއް ކަނޑައެޅިފައިވަނީ އަޙްމަދު ސަޢީދު މުޙައްމަދުގެ ބައިގައި އެކަނި ކަމަށް ފާހަގަ ކުރަމެވެ." ދައުވާގެ ޚުލާސާގައި ބުނެފައި ވެއެވެ.

ޝަރީއަތް ކުރިއަށްގެންދެވި ކްރިމިނަލް ކޯޓުގެ އިސް ގާޒީ އާދަމް މުޙައްމަދު ޙުކުމް އިއްވަމުން ވިދާޅުވީ، "މި ގަޒިއްޔާއިން ދައުވާ ލިބޭ، ޏ.ފުވައްމުލައް-ހޯދަޑު/މައިޒާން، މަރްޔަމް ދީނާ ޞާލިޙު ގެ ބައި މިކޯޓުގެ އެހެން ގަޒިއްޔާއަކުން ބެލުމަށް ނިންމައި މިގޮތުގެ މަތިން ހުކުމްކޮށް، މި ގަޒިއްޔާ ނިންމީމެވެ."

ސައީދު އަށް ހުކުމްކުރި މައްސަލަ ހިނގި ދުވަސްވަރު ފެނަކައިގެ ޕްރޮކިއުމަންޓް އެންމެ އިސް ބޭފުޅެއްގެ ގޮތުން ހުންނެވީ ދީނާ އެވެ.

ސައީދުގެ މައްޗަށް ހުކުމް އިއްވައި އޭނާ ޖަލުގައި ހައްޔަރުކޮށްފައި ހުންނަތާ 50 އަށްވުރެ ގިނަ ދުވަސް ވެގެން ދިޔައިރުވެސް، ދީނާގެ މައްސަލަ ކުރިއަކަށް ނުދެއެވެ.