ހިމަބިހީގެ އަލާމާތެއް ފެނިއްޖެނަމަ އަވަހަށް ޑޮކްޓަރަށް ދެއްކުމަށް އެޗްޕީއޭ އިން އިލްތިމާސްކުރޭ.--
ހިމަބިހި ޖެހުނު މީހުންގެ އަދަދު 160 އިން މައްޗަށް އަރައިފި
މަރްޔަމް މުޙައްމަދު 21 ޖުލައި 2026 (އަންގާރަ)   22:55
ރާއްޖެއިން މުޅިން ނައްތާލާފައިވާ ކަމަށް ބުނާ ހިމަބިހި ނުވަތަ މީސްލްސް ރާއްޖޭގައި މިހާރު ބާރު ސްޕީޑެއްގައި ފެތުރެމުން ގޮސް އެބަލި ޖެހުނު މީހުންގެ އަދަދު 160 އިން މައްޗަށް އަރައިފިކަމަށް އެޗްޕީއޭ (ހެލްތު ޕްރޮޓެކްޝަން އެޖެންސީ) އިން ހާމަކޮށްފިއެވެ.

އެޗްޕީއޭ އިން މިއަދު އާއްމުކުރި ތަފާސްހިސާބުތަކަށް ބަލާއިރު މިދިޔަ ހަފުތާ އެކަނި ވެސް ހިމަބިހީގެ 22 ކޭސް ފެނިފައި ވެއެވެ. އެހެންކަމުން މިހާރު ހިމަބިހީގެ ކޭސްތަކުގެ އަދަދު މިވަނީ 166ކަށް އަރައިފައި ކަމަށް އެޗްޕީއޭ އިން ބުނެއެވެ.

އަދި މިހާތަނަށް 9،918 މީހަކަށް ވެކްސިން ދީފައިވީ ނަމަވެސް އެޗްޕީއޭގެ ތަފާސްހިސާބުތަކަށް ބަލާއިރު، ހިމަބިއްސަށް ޕޮޒިޓިވް ވުމުން ފަރުވާ ދެމުންދަނިކޮށް ދިވެހި ޒުވާނަކު ވަނީ މަރުވެސް ވެފައެވެ.

އެޗްޕީއޭއިން ބުނެފައިވަނީ ވެކްސިންގެ ދެ ޑޯޒް ފުރިހަމަކޮށްފައިވާކަން ޔަގީންނުވާ ފަރާތްތަކަށް، ކަނޑައެޅިފައިވާ ވެކްސިންދޭ މަރުކަޒުތަކަށް ޒިޔާރަތްކޮށް ވެކްސިން ފުރިހަމަ ކުރުމަށް އިރުޝާދު ދެއްވާ ކަމަށެވެ.

އަދި ބަލި ޖެހިފައިވާ މީހަކާ ކޮންޓެކްޓްވިކަން އެނގޭ ފަރާތްތަކަށް، ހުޅުމާލެ ހޮސްޕިޓަލް ނުވަތަ އާބަން ޕްރައިމެރީ ހެލްތްކެއާ ސެންޓަރުން ކޮންޓެކްޓަރުންނަށް ވެކްސިން ޖަހަން ކަނޑައަޅާފައިވާ ވަގުތުގައި ވެކްސިން ޖެހޭނެ ކަމަށާ، މާލެ ސަރަހައްދުގެ ހޮސްޕިޓަލްތަކާއި އަތޮޅުތަކާއި ރައްތަކުގެ ސިއްހީ މަރުކަޒުތަކުން ކަނޑައެޅިފައިވާ ވަގުތުތަކެއްގައި ވެކްސިން ދިނުމުގެ ހިދުމަތް ވެސް ލިބޭނެ ކަމަށް އެޗްޕީއޭއިން ވަނީ ބުނެފައެވެ.

މާލެ ސަރަހައްދުގައި ހިމަބިހި ވެކްސިންގެ ޚިދުމަތް ލިބޭ މަރުކަޒުތައް:

  • ޔޫޕީއެޗްސީސީ: ހެނދުނު 8:30އިން މެންދުރު 12 ޖަހަންދެން
  • ހުޅުމާލޭ ހޮސްޕިޓަލް: ހެނދުނު ނުވަޔަކުން 11 ޖަހަންދެން، އަދި މެންދުރު އެކަކުން ފެށިގެން ތިނެއް ޖަހަންދެން
  • ސެނަހިޔާ ހޮސްޕިޓަލް: ހެނދުނު 10އިން ފެށިގެން ހަވީރު ހަތަރެއް ޖަހަންދެން
  • ވިލިމާލޭ ހޮސްޕިޓަލް: މެންދުރު 1:30އިން 3:30އަށް

ހިމަބިހި ޖެހިފައިވާ ފަރާތްތަކާއި ކޮންޓެކްޓް ވެފައިވާ ފަރާތްތަކަށް ވެކްސިންގެ ޚިދުމަތް ލިބޭ މަރުކަޒުތައް:

  • ޔޫޕީއެޗްސީސީ: މެންދުރު 14:00 އިން 15:30 އަށް
  • ހުޅުމާލެ ހޮސްޕިޓަލް: ހަވީރު 15:00 އިން 16:00

ހިމަބިހި ފެތުރުން ކޮންޓްރޯލް ކުރުމަށް ރާއްޖޭގެ ސަރުކާރުން ކުރާ މަސައްކަތަށް އެހީތެރިވުމުގެ ގޮތުން، އިންޑިއާ ސަރުކާރުން 20,000 ޑޯޒްގެ މީސްލްސް ވެކްސިން އަދި 3 ޓަނުގެ ސިއްހީ ސާމާނު ރާއްޖެއަށް މިފަހުން ހަދިޔާކޮށްފައިވާ ކަން ފާހަގަކޮށްލެވެއެވެ.

ކޮމެންޓް