ރާއްޖޭގައި މި ދުވަސްވަރު އިންފުލުއެންޒާއާއި އަރިދަފުސް ރޯގާ ފެތުރޭ މިންވަރު އިތުރުވާތީ، އެ ކަމަށް ސަމާލުވުމަށް އެޗްޕީއޭ (ހެލްތު ޕްރޮޓެކްޝަން އެޖެންސީ) އިން އިލްތިމާސްކޮށްފިއެވެ.
އެޗްޕީއޭއިން ސޯޝަލް މީޑިއާގައި ހިއްސާކުރި މައުލޫމާތުގައިވާ ގޮތުން، މިދުވަސްވަރު އިންފުލުއެންޒާ އަދި އަރިދަފުސް ރޯގާ ޖެހިގެން ރިޕޯޓްކުރާ މިންވަރު މައްޗަށް ގޮސްފައިވާތީ، މިފަދަ ބަލިތަކުން ރައްކާތެރިވުމަށް އާންމު ސާފުތާހިރުކަމަށް ސަމާލުކަންދީ، ގިނގިނައިން ސައިބޯނި ލައިގެން އަތްދޮވުމަށް އެ އިދާރާއިން އެދިފައިވެއެވެ.
އިންފުލުއެންޒާގެ މައިގަނޑު އަލާމާތްތައް:
- ނޭފަތް ބެއްދުން ނުވަތަ ނޭފަތުން ފެން އައުން
- ކަރުގައި ރިހުން
- ހުން އައުން
- ގައިގައި ރިހުން އަދި ވަރުދެރަވުން
ރޯގާޖެހި، ރަނގަޅުނުވެ ތިން ދުވަހަށް ވުރެ އިތުރުވާނަމަ ލަސްނުކޮށް ޑޮކްޓަރެއްގެ ލަފާ ހޯދުމަށް ވެސް އެޗްޕީއޭއިން އިރުޝާދު ދީފައިވެއެވެ.
ރޯގާއާއި އިންފުލުއެންޒާ ފެތުރޭ ދުވަސްވަރު، އަމިއްލަ ސަލާމަތާއި އާއިލާ އަދި ވަށައިގެންވާ މާހައުލު ރައްކާތެރިކުރުމަށް ގޭގައާއި އާންމު ދިރިއުޅުމުގައި އެޅިދާނެ މުހިންމު ފިޔަވަޅުތައް:
- ގިނަގިނައިން އަތް ދޮވުން: ސައިބޯނި ލައިގެން މަދުވެގެން 20 ސިކުންތު ވަންދެން ރަނގަޅަށް އަތް ދޮވުން، ނުވަތަ ސެނިޓައިޒަރ ބޭނުންކުރުން.
- މޫނުގައި އަތްނުލުން: ދޮވެފައި ނުވާ އަތުން ލޮލަށާއި ނޭފަތަށާއި އަނގަޔަށް އަތްލުން މަދުކުރުން. މިއީ ބަލީގެ ޖަރާސީމު ހަށިގަނޑަށް ވަނުމަށް މަގު ފަހިވާ މައިގަނޑު އެއް ގޮތެވެ.
- ކެއްސާ ކިނބިހިއަޅާއިރު ސަމާލުވުން: ކެއްސާ ކިނބިހިއަޅާ ވަގުތު މޫނު އަނބުރާލާފައި އުނަގަނޑުގެ އެތެރެ ފަރާތަށް ނުވަތަ ޓިޝޫއަކަށް ކެއްސުން، އަދި ބޭނުންކޮށްފައިވާ ޓިޝޫ ރައްކާތެރިކަމާއެކު ކުނިވަށިގަނޑަށް އެއްލުން.
- ބަލިވެއްޖެނަމަ އެކަހެރިވުން: ރޯގާގެ އަލާމާތެއް ހުރެއްޖެނަމަ، ހާއްސަކޮށް ހުން އަންނަ ނަމަ މަދުން މީހުން އެއްވާ ތަންތަނަށް ދިއުން މަދުކުރުން އަދި ގޭގައި މަޑުކުރުން.
- މާހައުލު ސާފުކޮށް ބެލެހެއްޓުން: ގޭތެރޭގައި މީހުން ގިނައިން އަތްލާ ތަންތަން (ދޮރުގެ މަތިގަނޑު، މޭޒު، ކޮމްޕިއުޓަރ ކިބޯޑު ފަދަ ތަކެތި) ޑިސްއިންފެކްޓްކޮށްގެން ސާފުކުރުން.
- ގޭތެރެއަށް ވައިވަންދިނުން: ވައިބަދަލުނުވެ އެއްވަރަކަށް ހުންނަ ތަންތަނަށްވުރެ، ގޭތެރެއަށް ރަނގަޅަށް ވައިވަންދީ އަލިކަން ލިބޭނެހެން ކަންކަން ބެހެއްޓުން.
- ދިފާއީ ބާރު ވަރުގަދަކުރުން: ފައިދާހުރި ކާނާ ކެއުމާއި، ހަށިގަނޑަށް ބޭނުންވާވަރަށް ފެން ބުއިމާއި، އެކަށީގެންވާ ވަރަށް ނިދުން.