ދިވެހިރާއްޖޭގެ އިގްތިސާދުގެ މައިނާރަކީ ފަތުރުވެރިކަމެވެ. މިއަދު ދުނިޔޭގެ މާލީ އަދި ޓެކްނޮލޮޖީގެ ބާޒާރު ބަދަލުވަމުންދާ ހަލުވި ދުވެއްޔަށް ބަލާއިރު، ރާއްޖޭގެ ފަތުރުވެރިކަމުގެ ސިނާއަތަށްވެސް އައު އިންގިލާބީ ބަދަލުތަކެއް ބޭނުންވެއެވެ. މިގޮތުން ބްލޮކްޗެއިން ޓެކްނޮލޮޖީގެ އެހީގައި 'ޓޯކަނިކް' އުސޫލުން ރާއްޖޭގެ ފަޅުތައް ތަރައްގީކުރުމަކީ މުހިންމު ކަމެކެވެ. އަދި އެ ރިސޯޓުތައް ބައިނަލްއަގުވާމީ ފެންވަރުގެ ރިސޯޓުތަކަކަށް ހެދުމަކީ ރާއްޖޭގެ ފަތުރުވެރިކަމުގެ މުސްތަގުބަލު މުޅިން ބަދަލުކޮށްލާނެ ފަހި ތަސައްވަރެކެވެ. ސަރުކާރާއި، އެމްޓީސީސީ އަދި އާންމު އިންވެސްޓަރުން ގުޅިގެން މިފަދަ ބޮޑު މަޝްރޫއެއް ހަގީގަތަކަށް ހެދުމަށްޓަކައި ބޭނުންވާ ގާނޫނީ، މާލީ، މާކެޓިން އަދި އިންވެސްޓްމަންޓް އޮނިގަނޑު ތިރީގައި އެވަނީއެވެ. މިތާގައި އެމްޓީސީސީ ހާއްސަކޮށްފައި އެވަނީ ރާއްޖޭގެ ފަޅުތައް ހިއްކުމުގެ ގާބިލު ސަރުކާރުގެ އެސްއޯއީއަކީ ހަމައެކަނި އެމްޓީސީސީ ކަމަށް ވާތީއެވެ.

ރާއްޖޭގައި ޓޯކަންގެ ގާނޫނީ އޮނިގަނޑު ބައްޓަންކުރެވޭނެ ގޮތް
މިފަދަ ޒަމާނީ މަޝްރޫއެއް ރާއްޖޭގައި ހިންގުމަށްޓަކައި ހަރުދަނާ ގާނޫނީ ރައްކާތެރިކަމެއް ބޭނުންވެއެވެ. މިގޮތުން މި ޓޯކަންތައް ބެލެވޭނީ ސެކިއުރިޓީ ޓޯކަންސް (Security Tokens) ގެ ގޮތުގައެވެ. ސަރުކާރުން އެމްޓީސީސީއަށް ދޫކުރާ 5 ފަޅު ތަރައްގީކުރުމަށްޓަކައި ހާއްސަބޭނުމަށް ކުންފުންޏެއް (SPV) އެއް އުފެއްދޭނެއެވެ. ބާޒާރަށް ނެރޭ ޓޯކަންތައް ރެޕްރެޒެންޓް ކުރާނީ މި ކުންފުނީގެ ހިއްސާއާއި ރިސޯޓުގެ މިލްކުވެރިކަމެވެ.

މީގެ އިތުރުން މޯލްޑިވްސް މަނިޓަރީ އޮތޯރިޓީ (MMA) އަދި ކެޕިޓަލް މާކެޓް ޑިވެލޮޕްމަންޓް އޮތޯރިޓީ (CMDA) ގުޅިގެން ޑިޖިޓަލް އެސެޓްތަކަށް ހާއްސަ ގަވާއިދެއް ހަދަންވާނެއެވެ. ދުނިޔޭގެ އެހެން ގައުމުތަކެކޭ އެއްފަދައިން، މި މަޝްރޫއު ފެށޭނީ ރެގިއުލޭޓަރީ ސޭންޑްބޮކްސްއެއްގެ ދަށުން ގާނޫނީ ހުއްދަ ލިބިގެންނެވެ. ދުނިޔޭގެ އެހެން ގައުމުތަކަށް ބަލާއިރު، ދުބާއީގެ ވާޗުއަލް އެސެޓްތައް ރެގިއުލޭޓްކުރާ ހާ އްސަ އިދާރާ (VARA) އަދި ސިންގަޕޫރުގެ މަރުކަޒީ ބޭންކް (MAS) އިން ވަނީ ރިއަލް އެސްޓޭޓް ޓޯކަނައިޒް ކުރުމަށް ފަހި ގާނޫނީ އޮނިގަނޑެއް ހަދާފައެވެ. ރާއްޖެއިންވެސް މިފަދަ މޮޑެލްއަކަށް ތަބާވުމުން ބޭރުގެ އިންވެސްޓަރުންގެ އިތުބާރު ބޮޑުވާނެއެވެ.

އެމެރިކާ ޑޮލަރު ބޭނުންކުރުމާއި މާލީ ގޮތުން ރާއްޖެއަށް ލިބޭނެ ބޮޑު ފައިދާ
މި މަޝްރޫއުގެ ދަށުން ޓޯކަން ވިއްކުމަށާއި ގަތުމަށް ބޭނުންކުރާނީ ސީދާ އެމެރިކާ ޑޮލަރު އެވެ. ޑިޖިޓަލް ކިއުރެންސީތަކުގެ ބަދަލުގައި ސީދާ ފިއަޓް ޑޮލަރު ބޭނުންކުރުމަކީ ބައިނަލްއަގުވާމީ ބޮޑެތި އިންވެސްޓަރުންނާއި، އިންސްޓިޓިއުޝަނަލް ފަންޑުތަކަށް އެއްވެސް ޖެހިލުމެއް ނެތް، އެންމެ އިތުބާރު ހުރި ފަސޭހަ މަގެކެވެ. މީގެ އެންމެ ބޮޑު މާލީ ފައިދާއަކީ ރާއްޖޭގެ ރަސްމީ ބޭންކިން ނިޒާމުގެ ތެރެއަށް ބޭރު ފައިސާ ވަންނަ މިންވަރު އިންތިހާއަށް އިތުރުވުމެވެ.

އިންވެސްޓަރުން ސީދާ އެމެރިކާ ޑޮލަރުން ކުރާ އިންވެސްޓްމަންޓްތައް ބޭންކު އެކައުންޓުތައް މެދުވެރިކޮށް ޖަމާވާން ފަށާނެއެވެ. މިއާއެކު ރާއްޖޭގެ ބޭރު ފައިސާގެ ރިޒާވް ވަރުގަދަ ވާނެއެވެ. އަދި ޑޮލަރުގެ ތާށިކަމަށް ދާއިމީ ހައްލެއް ހޯދުމަށް ސަރުކާރަށް ލިބޭނެ ވަރަށް ބޮޑު ބާރަކަށް މިކަން ވެގެންދާނެއެވެ. އަދި ހަމައެހެންމެ، ކްރިޕްޓޯ މާކެޓުގެ އޮއިވަރަށް އަންނަ ބަދަލުތަކާއި އަގު އުފުލި ދަށްވުމުގެ ބިރެއް ނެތި، ހަމަޖެހޭ މާލީ މާހައުލެއްގައި އިންވެސްޓް ކުރުމުގެ ފުރުސަތު އިންވެސްޓަރުންނަށް ހުޅުވިގެންދާނެއެވެ.

ލިކިއުޑިޓީ އަދި ސެކަންޑަރީ މާކެޓް
ޓޯކަން ގަންނަ އިންވެސްޓަރުންނަށް ބޭނުންވާ ކޮންމެ ވަގުތަކު އެ ޓޯކަންތައް ވިއްކާލައި، ފައިސާ ހޯދޭނެ ނިޒާމެއް ނުވަތަ ސާނަވީ މާކެޓެއް  އޮތުމަކީ މުހިންމު ކަމެކެވެ. މިއީ ސަގާފީ ރިއަލް އެސްޓޭޓާ ހިލާފަށް ޓޯކަނައިޒޭޝަނުން ލިބޭ އެންމެ ބޮޑު އެއް ފައިދާއެވެ. ޓޯކަން ގެންގުޅޭ މީހުންނަށް ދުނިޔޭގެ ރެގިއުލޭޓްޑް ޑިޖިޓަލް އެކްސްޗޭންޖުތަކުގައި ޓޯކަން ވިއްކާލައިގެން ވަގުތުން ޑޮލަރު ހޯދޭނެ ހަލުވި ލިކިއުޑިޓީއެއް މި މަޝްރޫއުގެ ސަބަބުން ކަށަވަރުވާނެއެވެ.

ސްމާޓް ކޮންޓްރެކްޓްސް މެދުވެރިކޮށް ފައިދާ ބަހާނެގޮތް
މި މަޝްރޫއުގައި އިންވެސްޓްކުރާ ފަރާތްތަކަށް ފައިދާ ބެހުމުގައި އެއްވެސް އިންސާނީ މެދުވެރިއަކާ ނުލައި، ކަންކަން ހާމަކަން ބޮޑު ގޮތެއްގައި ހިންގޭނީ ސްމާޓް ކޮންޓްރެކްޓްސްގެ އެހީގައެވެ. ރިސޯޓު ހިންގައިގެން ލިބޭ ސާފު ފައިދާ ނުވަތަ ނެޓް ޕްރޮފިޓް ކޮންމެ ކުއާޓަރެއް ނުވަތަ އަހަރަކު އެއްފަހަރު ސްމާޓް ކޮންޓްރެކްޓް މެދުވެރިކޮށް ބަހަންވާނެއެވެ. މިގޮތަށް ބެހުމުންއޮޓޮމެޓިކުން ޓޯކަން ހޯލްޑަރުންގެ ބޭންކް އެކައުންޓްތަކަށް ނުވަތަ ޑިޖިޓަލް ވޮލެޓްތަކަށް ޑޮލަރުން ޖަމާވާނެއެވެ. މިސާލަކަށް 10 މިލިޔަން ޑޮލަރުގެ ޕްރޮޖެކްޓުން ލިބޭ ފައިދާ، ކޮންމެ މީހަކު ގެންގުޅޭ ޓޯކަންގެ ނިސްބަތުން ބެހިގެންދާނެއެވެ.

މި ނިޒާމުގެ ސަބަބުން އިންވެސްޓަރަކު 2 ޑޮލަރުގެ އެންމެ ޓޯކަނެއް ގަނެފައި އޮތަސް އޭނާއަށް ލިބެންޖެހޭ ފައިދާގެ މިންވަރު ސީދާ ޑޮލަރުން ލިބޭނެއެވެ. ބައިނަލްއަގުވާމީ މިސާލަކަށް ބަލާއިރު، އެމެރިކާގެ ރިއަލް އެސްޓޭޓް ޕްލެޓްފޯމުން ދަނީ ބްލޮކްޗެއިން ސްމާޓް ކޮންޓްރެކްޓްސް މެދުވެރިކޮށް ކޮންމެ ހަފުތާއަކު އިންވެސްޓަރުންނަށް ކުލީގެ ފައިދާ އޮޓޮމެޓިކުން ބަހަމުންނެވެ. އޭރުން އެއްވެސް މަކަރެއް ހެދުމުގެ ފުރުސަތެއް ނުއޮންނާނެއެވެ. އަދި މި ނިޒާމުގައި ދެފުށް ފެންނާނެއެވެ.

އިންވެސްޓަރުންނަށް ލިބޭނެ މާލީ ފައިދާގެ އަންދާޒާ
ރާއްޖޭގެ ފަތުރުވެރިކަމަކީ ދުނިޔޭގެ ނިސްބަތުން އެންމެ މަތީ ރިޓާން އޮން އިންވެސްޓްމަންޓް  (ROI) ލިބޭ އެއް ސިނާއަތެވެ. މިމަޝްރޫއުގެ ދަށުން، 10 މިލިއަން ޑޮލަރުގެ ޓޯކަން ވިއްކައިގެން ހަދާ ފުރަތަމަ ރިސޯޓުން، އިންވެސްޓަރުންނަށް އަހަރަކު އެވްރެޖްކޮށް 12% އާއި 18% އާ ދެމެދުގެ ރިޓާނެއް ލިބޭނެ ކަމަށް އަންދާޒާ ކުރެވެއެވެ. ބައިނަލްއަގުވާމީ ހޮޓެލް ޗޭނެއްގެ މެނޭޖުމަންޓާ ހަވާލުކުރުމުން އޮކިއުޕެންސީ ރޭޓް މަތީގައި ހިފެހެއްޓޭނެއެވެ، އަދި ފައިދާ އިތުރުވާނެއެވެ.

މީގެ އިތުރުން، ރިސޯޓުގެ އަގު ދުވަހުން ދުވަހަށް މަތިވަމުންދާ ވަރަކަށް، ސެކަންޑަރީ މާކެޓްގައި ޓޯކަންގެ އަގު (Capital Appreciation)  ވެސް އުފުލިގެންދާނެއެވެ. އެހެންކަމުން، 2 ޑޮލަރަށް ގަންނަ ޓޯކަނެއްގެ އަގު، ރިސޯޓު ހުޅުވައި ހިންގަން ފެށުމުން 3 ނުވަތަ 4 ޑޮލަރަށް ބޮޑުވުމުގެ ފުރުސަތު އޮންނާނެއެވެ. މިއީ ކުރު މުއްދަތެއްގެ ތެރޭގައި އިންވެސްޓަރުންގެ ރައުސްމާލު ދެގުނަ ކޮށްދޭނެ ކަމެކެވެ.

ބޭރުގެ އިންވެސްޓަރުން ޝައުގުވެރިކުރުވުމުގެ މާކެޓިން ސްޓްރެޓެޖީ އާއި ހާއްސަ އިނާޔަތް

ދުނިޔޭގެ ބޮޑެތި އިންވެސްޓަރުންނާއި މުއްސަނދިންގެ ހިތްތައް މި މަޝްރޫއަށް ދަމައިގަތުމަށްޓަކައި ހަމައެކަނި މާލީ ފައިދާގެ އިތުރުން އެހެނިހެން އިނާޔާތްތައް ކަނޑައެޅި ދާނެއެވެ. މިގޮތުން، ޓޯކަން ގެންގުޅޭ މިންވަރަކުން ރިސޯޓުން ލިބޭ ހާއްސަ އިނާޔަތްތައް ނުވަތަ ޔުޓީލިޓީ ބެނެފިޓުތައް ލިބޭ ގޮތަށް ހެދިދާނެއެވެ. މިގޮތުން، ޕްރޮޖެކްޓް ނިމުމުން 100,000 ޓޯކަން  ނުވަތަ 2 ޑޮލަރުގެ އިންވެސްޓްމަންޓް ގަންނަ ކޮންމެ އިންވެސްޓަރަކަށް، ރިސޯޓު ތަރައްގީކޮށް ނިމުމުން ކޮންމެ އަހަރަކު 7 ދުވަހު ހިލޭ ނުވަތަ ކޮންޕްލިމެޓްރީ ސްޓޭ ރިސޯޓުގެ ވިލާއެއްގައި ހުރުމުގެ އިންތިޒާމު ހަމަޖެއްސި ދާނއެވެ.

ރިސޯޓުގެ މާލީ ދެމެހެއްޓެނިވިކަމާއި ރާއްޖޭގެ ފަތުރުވެރިކަމަށް އެންމެ ފައިދާހުރި ގޮތަކީ މި ހިލޭ ހުރުމުގެ ފުރުސަތު އޮފް-ޕީކް ސީޒަން ނުވަތަ ރިސޯޓުތަކުގެ ބުކިންސް މަދު ދުވަސްވަރަށް ހާއްސަކުރުމެވެ. މީގެ ސަބަބުން ރިސޯޓުގެ ޕީކް ސީޒަންގެ ބޮޑު އާމްދަނީއަށް އެއްވެސް ބުރޫއެއް ނާރާނެއެވެ. އަދި އޮފް-ޕީކް ސީޒަނުގައި ރިސޯޓަށް މީހުން އައުމުން، ރިސޯޓުގެ ރެސްޓޯރެންޓްތަކާއި، ސްޕާ އަދި އެކްސްކާޝަންތަކުން އިތުރު އާމްދަނީ ލިބި، ރާއްޖޭގެ އިގްތިސާދީ ދައުރުވުން އަހަރުގެ ހުރިހާ ދުވަސްވަރެއްގައި ހިފެހެއްޓޭނެއެވެ. ދުނިޔޭގެ ފެންވަރުގެ މިސާލަކަށް ބަލާއިރު، ތައިލެންޑުގެ ޕޫކެޓް  (Phuket) ރިސޯޓުގައި ވަނީ މިފަދަ ޓޯކަން ނުވަތަ އެންއެފްޓީ ވެރިފިކޭޝަން މެދުވެރިކޮށް ފަތުރުވެރިކަމުގެ ޚިދުމަތް ދިނުންގައި ނުވަތަ ޓޯކަން ގެންގުޅޭ ފަރާތްތަކަށް ހާއްސަ ކުރެވޭ ފަތުރުވެރިކަމުގެ އިނާޔަތްތައް(NFT/Token Gated Hospitality) މޮޑެލްއެއް ބޭނުންކޮށްގެން ބޮޑު ކާމިޔާބީއެއް ހޯދާފައެވެ.

ޓޯކަން ގަންނަ ބޮޑެތި އިންވެސްޓަރުންނަށް ހަމައެކަނި ހިލޭ ހުރުމުގެ އިނާޔަތުގެ އިތުރުން ރިސޯޓުގެ ބައެއް މުހިންމު ނިންމުންތަކުގައި ވޯޓުލުމުގެ ހައްގު (Voting Rights) ދެވިދާނެއެވެ. މިސާލަކަށް، ރިސޯޓު އިތުރަށް ބޮޑުކުރުމާއި، ތިމާވެށީގެ ބޮޑެތި މަޝްރޫއުތައް ކުރިއަށްގެންދާނެ ގޮތާ މެދު ބްލޮކްޗެއިން މެދުވެރިކޮށް ވޯޓުލުމުގެ ފުރުސަތު ދިނުމަކީ އިންވެސްޓަރުން މަޝްރޫއަށް ކުރާ އިތުބާރު ބޮޑުވާނެކަމެކެވެ. އަދި އެމީހުންގެ ބައިވެރިވުން އިތުރުވާނެ ކަމެކެވެ.

ތަނަކަށްފަހު ތަނެއް ތަރައްގީކުރުމާއި ބައިނަލްއަގުވާމީ ހޮޓެލް ޗޭނުތަކުގެ ދައުރު
މި މަޝްރޫއު ކުރިއަށްދާނީ ފިޔަވަހިތަކަކަށް ބަހާލައިގެންނެވެ. ސަރުކާރުން ދޭ ފަސް ފަޅުގެ ތެރެއިން ފުރަތަމަ ފަޅު އެމްޓީސީސީން ހިއްކައި ނިމުމާއެކު، 10 މިލިއަން ޑޮލަރުގެ ފުރަތަމަ ޓޯކަން ސޭލް  ހުޅުވާލެވޭނެއެވެ. އެ ފަޅުގައި ރިސޯޓު ހަދައި ނިމުމުން، ލިބޭ ކާމިޔާބީއާއި އިންވެސްޓަރުންގެ އިތުބާރަށް ބަލައި، ދެވަނަ ފަޅާއި ތިންވަނަ ފަޅު ޓޯކަން އުސޫލުން ތަނަކަށްފަހު ތަނެއް ތަރައްގީ ކުރަމުން ގެންދާނީއެވެ. އަދި އެއަށްފަހު ހަތަރުވަނަ ފަޅާއި ފަސްވަނަ ފަޅު ތަރައްގީ ކުރާނީއެވެ.

ރިސޯޓުތައް ހަދައި ނިމުމުން އޭގެ ހިންގުން ހަވާލުކުރާނީ މެރިއަޓް، ހިލްޓަން ފަދަ ބައިނަލްއަގުވާމީ ހޮޓެލް ޗޭނުތަކާއެވެ. މިއީ ރިސޯޓުގެ ހިދުމަތުގެ ފެންވަރު ދުނިޔޭގެ އެންމެ މަތީ މިންގަނޑުގައި ހިފެހެއްޓުމަށާއި، ބްރޭންޑް ވެލިއު ބޮޑުކޮށް، ބާޒާރުގައި ޓޯކަންގެ އަގު ދުވަހުން ދުވަހަށް މަތިވުމަށް އެޅޭނެ އެންމެ މުހިންމު ފިޔަވަޅެވެ.

ސައިބަރ ސެކިއުރިޓީއާއި އިންވެސްޓަރުންގެ ރައްކާތެރިކަން
މިފަދަ ބޮޑު ޑިޖިޓަލް މަޝްރޫއެއްގެ އެންމެ މުހިންމު އެއް ތަނބަކީ އިންވެސްޓަރުންގެ ފައިސާއާއި ޑޭޓާގެ ރައްކާތެރިކަމެވެ. ބްލޮކްޗެއިން ނެޓްވޯކްތަކަކީ ރައްކާތެރި އެއްޗަކަށް ވިޔަސް، ހެކްކުރުމާއި ސްކޭމްތަކުން ސަލާމަތްވުމަށްޓަކައި ހަރުދަނާ ފިޔަވަޅުތަކެއް އަޅަންޖެހެއެވެ. މިގޮތުން ބޭނުންކުރާ ސްމާޓް ކޮންޓްރެކްޓްތައް ބާޒާރަށް ނެރުމުގެ ކުރިން ދުނިޔޭގެ އެންމެ މަގުބޫލު ބްލޮކްޗެއިން އޮޑިޓް ކުންފުނިތައް، މިސާލަކަށް، ސާޓިކް (CertiK) ނުވަތަ ހެކަން (Hacken) މެދުވެރިކޮށް ސެކިއުރިޓީ އޮޑިޓެއް ހަދަންވާނެއެވެ.

މީގެ އިތުރުން، ކޮންމެ އިންވެސްޓަރަކީވެސް ކާކުކަން ކަށަވަރުކުރުމަށްޓަކައި ކަސްޓަމަރަކީ ކާކުކަން ދެނެގަތުން (KYC) އަދި އެންޓި-މަނީ ލޯންޑަރިން  (AML) ނިޒާމެއް ގާއިމުކުރުމަކީ މުހިންމު ކަމެކެވެ. މިއީ ގަވާއިދާ ހިލާފު ކަޅު ފައިސާ މި ޕްރޮޖެކްޓުގެ ތެރެއަށް ވަނުން ހުއްޓުވުމުގެ ގޮތުން އަޅާ ފިޔަވަޅެކެވެ. އަދި ދިވެހިރާއްޖޭގެ މާލީ ނިޒާމުގެ އަގު ބައިނަލްއަގުވާމީ މައިދާނުގައި ހިފެހެއްޓުމަށްޓަކައި އަޅަންޖެހޭ އެއްވެސް ފިޔަވަޅެއް ނާޅައި ދޫކޮށްލައިގެން ނުވާނެއެވެ.

ތިމާވެށީގެ ދެމެހެއްޓެނިވިކަމާއި ގްރީން ޓޯކަނައިޒޭޝަން
ފަޅު ހިއްކައިގެން ރިސޯޓު ތަރައްގީކުރާއިރު، ރާއްޖޭގެ ނާޒުކު ތިމާވެށި ހިމާޔަތްކުރުމަކީ ބޭރުގެ ބޮޑެތި އިންވެސްޓަރުން ވަރަށް ބޮޑަށް ބަލާ ކަމެކެވެ. އެހެންކަމުން، މި މަޝްރޫއަކީ އީކޯ-ފްރެންޑްލީ މަޝްރޫއަކަށް ހަދަންވާނެއެވެ. އަދި ރިސޯޓުން ލިބޭ ފައިދާގެ ވަކި އިންސައްތައެއް ފަރުތައް އާލާކުރުމަށާއި، އިއާދަކުރަނިވި ހަކަތައަށް ހާއްސަކުރާނެކަން ހާމަކުރަންވާނެއެވެ. މިއަށް ބައިނަލްއަގުވާމީ ބާޒާރުގައި ކިޔަނީ އީއެސްޖީ އިންވެސްޓިން (ESG Investing) އެވެ. ތިމާވެށްޓަށް ގެއްލުން ކުޑަވާނެހެން ޒަމާނީ ޓެކްނޮލޮޖީ ބޭނުންކޮށްގެން ފަޅު ހިއްކުމާއި ރިސޯޓު ބިނާކުރުން ކުރިއަށް ގެންދިއުމަކީ ދެމެހެއްޓެނިވި ގޮތެއްގައި މި މަޝްރޫއު ކާމިޔާބުވުމުގެ ވަރަށްބޮޑު ބާރަކަށް ވާނެއެވެ.

ނިންމުން
ޒަމާނީ ޓެކްނޮލޮޖީއާއި ރާއްޖޭގެ ގުދުރަތީ ރީތިކަން އެއްކޮށްލައިގެން ހުށަހެޅިފައިވާ މި ޓޯކަނައިޒޭޝަން ތަސައްވަރަކީ ދިވެހިރާއްޖޭގެ ފަތުރުވެރިކަމާއި އިގްތިސާދަށް އަންނާނެ ވަރަށް ބޮޑު އިންގިލާބެކެވެ. މިއީ ސީދާ ދައުލަތުގެ ބަޖެޓަށް ބަރޯސާނުވެ، ދުނިޔޭގެ ކުދި އަދި ބޮޑެތި އިންވެސްޓަރުންގެ ފައިސާއިން ގައުމުގެ ގުދުރަތީ ވަސީލަތްތައް އެންމެ ފައިދާހުރި ގޮތުގައި ތަރައްގީކުރެވޭނެ ބްލޫޕްރިންޓެކެވެ.

ސަރުކާރުގެ ދުރުވިސްނޭ ސިޔާސަތުތަކާއި، އެމްޓީސީސީގެ އަމަލީ ގާބިލުކަމާއި، ބައިނަލްއަގުވާމީ ހޮޓެލް ޗޭނުތަކުގެ ތަޖުރިބާ މި ނިޒާމުގެ ތެރެއިން އެކުވެގެންދިއުމުން، ރާއްޖޭގެ ބޭންކިން ނިޒާމަށް ސީދާ އެމެރިކާ ޑޮލަރު ވަންނާނެއެވެ. އަދި ރާއްޖެ ވެގެންދާނީ ދުނިޔޭގެ ރިއަލް އެސްޓޭޓް ޓޯކަނައިޒޭޝަންގެ އެންމެ ކުރިއަރާފައިވާ އެއް މޮޑެލްއަށެވެ. މިއީ ހަމައެކަނި ރިސޯޓު ހެދުމެއް ނޫނެވެ؛ މިއީ ރާއްޖޭގެ މާލީ މުސްތަގުބަލު ޑިޖިޓަލް ޒަމާނަށް ހުޅުވާލުމެވެ. އަދި ދިވެހިރާއްޖެއަކީ ދުނިޔޭގެ އިންވެސްޓްމަންޓް މަރުކަޒަކަށް ހެދުމަށް އެޅޭނެ އެންމެ ހަރުދަނާ އެއް ފިޔަވަޅެވެ.