މިކަމަށް އިލްތިމާސްކޮށް މިއަދު އެ މިނިސްޓްރީން ނެރުނު ނޫސްބަޔާނެއްގައި ވަނީ، މެދުއިރުމަތީގައި ފަށާފައިވާ ހަނގުރާމައާއި ގުޅިގެން މެދުއިރުމަތީގައި، އަދި ވަކިން ހާއްސަކޮށް އެ ސަރަހައްދުގައި ހަމަލާ އަމާޒުވަމުންދާ ގައުމުތަކުގައި ތިބި ދިވެހީން ބޭރަށް ނިކުމެ އުޅުން ވީހާވެސް މަދުކުރުމަށް އިލްތިމާސްކުރައްވާ ކަމަށެވެ.

އެހެންކަމުން، އެ ގައުމެއްގެ ސަރުކާރުން ސަލާމަތާއި ރައްކާތެރިކަމަށް ދެއްވާ އިރުޝާދުތަކާއި އެއްގޮތަށް އަމަލުކުރެއްވުމަށް ވެސް އެދި، އެ މިނިސްޓްރީގެ ނޫސްބަޔާނުގައި ބުނެފައި ވަނީ، އެ ސަރަހައްދުގައި މިވަގުތު ތިބި ދިވެހިންގެ ހާލަތު އެ ވުޒާރާއާއި މެދުއިރުމަތީގައި ހުންނަ ދިވެހިރާއްޖޭގެ އެމްބަސީތަކުން ގާތުން ބަލަމުންދާ ކަމަށާ، އަދި ބޭނުންވެއްޖެ ހިނދެއްގައި ކޮންސިއުލަރ އެހީތެރިކަން ފޯރުކޮށްދިނުމަށް މަގުފަހިކުރުމުގެ ގޮތުން، އެ ސަރަހައްދުގައި އުޅޭ ދިވެހިން، އެންމެ ކައިރީގައި ހުރި ދިވެހިރާއްޖޭގެ އެމްބަސީއެއްގައި ރަޖިސްޓްރީވުމަށް އެދޭ ކަމަށެވެ.

މީގެއިތުރުން މެދުއިރުމަތީގެ ގައުމުތަކަށް ދަތުރުކުރާ ފަރާތްތަކުން އިތުރަށް ސަމާލުވުމަށް އެމްއޭސީއެލް އިން ވެސް އިލްތިމާސްކޮށްފައި ވެއެވެ.